Барганджиа Саид

Ставропольшта йту абазаква йгIарыквчважвауа абзазара йгIахъыху афильм ашIыпIа телебарала январь ацIыхъва йгIадырбатI. Ауи пщхъвыкIта йыршан январь а 28 йгIашIарышвта а 31-дза йгIарттI.

Афильм гIаныршара гIалазгаз йрыуазаджву «Абаза» жвлара адкIылара аунашвачпагIв, АААК ЙхIаракIу асовет йалу Чагва Армида йшылхIвауала, афильм Ставрополь край йаланакIуа Ставрополь, Нарцана, Невинномысск къалаква, Кочубеевск йгьи Предгорна районква рпны йту абазаква рбзазара йазынархапI. Ауат ашIыпIаква рпны уахьчIвала абазата 4000-гIв райхIа бзазитI.

Телебарала йангIадырба амщтахь акино Интернетгьи йгIатарцIатI.

«Афильм хIшазпшуаз ацкIыс рыцIа йагъьта йгIацIцIтI. ХIа хIшхъвыцуазла, ауи зымагIальаматхуш хIхаквлагIвчвагIваца ракIвын, ауаса хIгIващатI. Ауи йгIацIанакIыз ашта агалагьи рыцIа йгъагъапI. Йшаквчважвауала йгIауахвырквын, ауи Москвагьи, Питергьи, Европагьи, Азиягьи, Апсны апынгьи йапшитI. Зынла йсхIвапIта, ужвы ари асахIат афильм агIвыма къральква рпны йбзазауа хIайщчва рыхъазла абаза бызшвалагьи йхIрыхIазыритI», – лхIватI Чагва Армида.

Ауи йгIалылкIгIатI акино ахъыхра нхара ду шапщылаз, материал джьащахъва щарда шазыркIкIыз, ауи «амаль амамкIва ужвыгьи йшгIадрысабапуаш».

«ХIычкIвынчва, хIсабиква рыхъаз йхIхIвуш хIымапI, хIара ауат хIуагIа рцIасквала йшгIадзынхIыргылуаш хIащтапI», – йгIацылцIахтI Армида.

Ставропольшта йту абазаква йгIарыквчважвауа афильм ъагIацIцIыз магIын ду амата йпхьадзитI АААК ЙхIаракIу асовет аунашвачпагIв Эгьзакь Мусса.

«Адуней апсуа-абаза конгресс ЙхIаракIу асовет йалу «Абаза» уагIахъа-культура автономия аунашвачпагIв Чагва Армида пшдзата унашва зхъылцIауа Ставропольшта абазаква йнардзу уыс ду акIвдыршатI абаза уагIахъа рцIасква, рыбызшва, ргвбайара рпшдзара Россия абзазагIвчва йырхъазымкIва адуней апны йбзазауа апсуа-абаза диаспора шабгу йддырбара ахатырла. ХIара абари йапшу апроект джьащахъваква гIахIрысабапта хIапхъанчIвиква йгIаршIхIкIгIаз хвду зму адырраква йгIадзынгылуа абанпараква йрыладхIыркIра хIборчпI», – йхIватI ауи.

«Акино йапшыз щардагIвы ргвгIанаграква ауи йадынхалкваз йгIарархIвитI.

«Абзазара йгIахъыху афильм джьащахъвапI, пхара, бзибара, айгвыгIвра алата йчпапI. ХIуагIа рыхъазла угвыргъьауа уачпитI. АдахIвраква рымазтI ауат, апхъахьылагьи абзири акъагIари ракIвызтI йзынйуш», – лхIватI Кълыч Ирина.

Абаза бызшвала йгIацIцIуа «Абазашта» газет аредактор хъада Къвыл Фардауыс афильм «лгвы чIвауа, абаза уагIа дъарыуу ахъазла лхъа духауа» дшапшыз гIалылкIгIатI. Ауи йшылпхьадзауала, Ставропольшта апны абазаква йырмагIну злардыруа хIуагIа гIаншара щардала йырчву рыжвлара йгьи ркультура бзазара афильм апны нахвата йгIарбапI. Ауи йгIацылцIахтI хIыгIвычIвгIвысипхьадза йыхъазла лхъа шдухауа.

«Згвы бзира ту, хIапхъахьыла бзигвыгъала узайгвыгъуш чкIвыныргIа рпны йгIашIарышвта зыхьыз дута йзыргахьаз хIахIбачва бергьыльквала уалгауата дзачIвызлакIгьи рхъа ду йырбахуа абазара нкъвыргитI. Сара чIыдала ужвыгьи зны саквшахIатхатI ауагIахъа ркъару, рмагIны злаудыруаш рпхьадзарала шакIвым – анаука, арыпхьара, акультура, аспорт рпны ауат рыхьыз хъара йзыргауа, йызрыпшдзауа агIвычIвгIвыс гвыбзыгъаквала, агIвычIвгIвыс пшдзаквала шакIву. Са йсгвапахатI афильм апны хIуагIа радкIылра къару ду алазцIата уахьчIва йхIыцхым абазаква рунашвагьи ъархIваз. Афильм абзирала ауат ужвыгьи заман ауыра ауагIа ргвы пхата йтазлуштI», – лгвгIанаграква хIыцагIвылшатI ауи.

«Ставропольшта абазаква» кино ахъыхра згIаджвыквцIару Ставрополь край апны йбзазауа абазаква руагIахъа-культура автономия «Абаза» жвлара адкIылара акIвпI. Афильм агIаныршара ахчала йацхърагIатI АуагIахъакви акъазакъкви руысквала Ставрополь край акомитет.

Абзазара йгIахъыху афильм Ставрополь край йаланакIуа Ставрополь, Нарцана, Невинномысск къалаква, Кочубеевск йгьи Предгорна районква рпны йту абазаква рбзазара йазынархапI. Ауи

ауат уахьчIва йшбзазауа, уыста йызпщылу, рцIасква шынкъвыргауа, рыбызшва шырхчауа, йъату ашта атшауацIыхра къарута йаларцIауа гIанахIвитI.