Барганджиа Саид

Ардзынба Владислав йнаука нхара знархару ашвъаква йгIархъыху афильм «Ахеттолог йкъальам» (ахеттква апхъанчIви индоевропа уагIахъапI – аредакция ррытаразга) апрезентация репатриацияла ареспублика министерства апны октябрь а 18 атшын йакIвшатI. Афильм дарежиссёрпI атурыхдырыгIв Инджгиа Джамбул.

Инджгиа АААК ахабарргарта портал йшгIарайхIвызла, апхъанчIви хетт уагIахъа ртурых йазынархата ауи йгвалан данстудентыз йгIашIарышвта фильм хъихырныс.

«Зны сара Ардзынба Владислав йкнига гIаснапIыцIашватI. Ауи асхъан ауи адунейла дхеттолог бергьыльхахьан. Ауи азаман йгIашIарышвта сыла йыцIан йхъысхуа афильм шаъазлушыз. Йаргьи ауи акIвпI йшцаз. «Ахеттолог йкъальам» агIвычIвгIвыс ду Ардзынба Владислав йнаука нхара йгIаквчважвауа фильмпI», – йхIватI атурыхдырыгIв.

Ауи йшихIвазла, афильм ахъыхра асквш 2015 йджвыквицIатI: архив суратква, авидеогIвыраква адикIылуан, Ардзынба Владислав йыцынхуз апхьахьаква интервью гIарыквихуан.

«Сара йапхъахуз хIпрезидент йхъапщыла тшылзынасырхатI. Джергения Светлана йгIасылтыз ашвъаква рархив апхъала йауацIыхта йбергьльымыз щарда рылан, ажва ахъазла, Ардзынба Владислав дансабийыз йхъырхыз асуратква», – йгIаликIгIатI атурыхдырыгIв.

Инджгиа йшихIвазла, афильм данадынхалуаз Трыквштагьи дцатI, Хетт паштахIыгIва апхъанчIви къала хъада Хаттус апны даъан (ауи акъала километр 145-ла Анкара йачвыхъарата йчIвапI, апхъанчIви ахьызгьи гIащаквхатI – аредакция ррытаразга). Ауи хеттология нархарала йынхауа ауниверситет апынгьи даъан, ауаъа зыбызшвала йабазу, йапсыуу аъачIвагIагIвчвагьи нхитI.

«Ауниверситет апны хIлабадыртI апсыуата тшызпхьадзауа атурыхдырыгIв Езлем Сир Галаш. Ауи йшылхIвазла, данстудентыз асхъан ауи агIан трыкв бызшвала йатаркIгIвацаз Ардзынба Владислав йкнига данапхьа амщтахь ауи аъара даргвышхван ахеттква ртемала диссертация лгIвытI», – йхIватI Инджгиа.

АтурыхдырыгIв йшипхьадзауала, афильм данадынхалуаз агIан баргвыра хъадата дзынйаз аматериалква ъайзымхъуз акIвпI.

«Ардзынба Владислав йполитика нхара уысла материал гьмачIым. ЙаъапI асуратква, авидеогIвыраква, ашвъаква, йынхара зыла йабакваз ауагIа, датшагьи щарда. Ауаса йнаука нхара уазцарыквын ауыс рыцIа йалачпахитI. Швабыж йбаргвын йнаука нхараква ргIаура, йалкIгIата данстудентыз дыздынхалкваз», – йгIахIгвынйыргIвытI Джамбул.

Инджгиа датшагьи йгIацицIахтI афильм йащтагIайуа ахъвгьи дадынхалырныс шимураду.

Ашвъаква йгIархъыху афильм «Ахеттолог йкъальам» йапхъахауа ахъвы дакъикъа 52 йымгIвайситI йгьи йаланакIитI Апсны йапхъахауа апрезидент Ардзынба Владислав йнаука нхара асквш 1945 йгIашIарышвта асквш 1980-ква рцIыхъвадза. ЙащтагIайуа ахъвы гIазквчважвуш асквш 1980-ква рцIыхъва йгIашIарышвта йбзазара далцIындзыкIьара йакIвйырашаз анаука нхара акIвпI.