Апсни Къарча-Черкес Республики рпны АААК ЙхIаракIу асовет аунашвачпагIв Эгьзакь Мусса йцхърагIарала йадыргалыз хвитта абакIрала анкъвакъвраква ргIарбараква гIархIватI.
Барганджиа Саид
Гудаута апны ноябрь а 28 Эгьзакь Мусса йыхьыз зхъу йбыжьбахуз анкъвакъвраква алгатI, мшквакIла рыцIа йпасата Къарча-Черкес апны хвитта абакIрала аклуб «Абаза» ауацIала анкъвакъвраква акIвшатI.
АгIванкъвакъвракIгьи АААК ЙхIаракIу асовет аунашвачпагIв Эгьзакь Мусса йцхърагIарала йадгалан. Йара Мусса йыхьыз зхъу атурнир Апсны апны ари быжьныта йакIвшитI. Ауи дуней статус амата йаъан: ансисквшагьи ауи йалан Къабард-Балкъар, Къарча-Черкес, Чечня, Дагъстан, Краснодар край, Ростов область рабакIыгIвчвагьи. СынчIва ауи йгIалалыз Апсны абакIыгIвчва йырхъазын, йаргьи республика анкъвакъврата йалтI.
Хвитта абакIрала Апсны афедерация авице-президент, «Абаза» спортклуб адиректор Боджгуа Леонид йгIаликIгIатI сынчIва абакIыгIвчва рхIатларала 18 гвыпкIта, рныбыжьлагьи пщгвыпкIта йшшаз. ЗымгIва шалу араъа йабакIыз 200-гIв райхIа йнадзитI. Ауат ареспублика арайонква зымгIва йгIартыцIын йгIайтI.
«ХIспортсменква рнадзара швабыж йбзипI. Ауат рщардагIв хвы зму артшхъвагаква гIарынхахьатI. ЙгIалкIгIара атахъыпI йара ауи апшта знадзара дуу абжьагIвчва рынхара», – йхIватI Боджгуа.
Хвитта абакIрала Апсны афедерация апрезидент Хутаба Раш ари агIаншара даквчважвауата атурнир йанакIвызлакIгьи апшта бзита йшадгалаз гIаликIгIатI.
Ауи багъьата йазхъайцIауата йхIватI ари анкъвакъвра ахв апхъахьыла рыцIа-рыцIа йшалахIуш, кIьыдата даквгIашIастI Апсны апны абакIра атшауацIыхра Эгьзакь Мусса йкъарута йалу.
«Сквшщарда руацIа ауи хIбжьагIвчва нхаша хIакъ рититI, йыззыбжу зымгIва рзихвгIитI, хIабакIыгIвчва адуней анкъвакъвраква йызрылалра ахъазла ахчала дырцхърагIитI», – йхIватI Хутаба.
Эгьзакь Мусса йыхьыз зхъу анкъвакъвра апны йайгIайкваз зымгIва асогIаква, амедальква, артшхъвага швъаква рырттI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса йцхърагIарала йакIвшатI Къарча-Черкес апны хвитта абакIрала аклуб «Абаза» ноябрь а 24 йаднагалыз анкъвакъвраквагьи. Ауат йхынхауата йакIвшатI.
Хвитта абакIрала аклуб «Абаза» апрезидент, «Алашара» адкIылара Черкесск апны йгIаныршу ахъвшара аунашвачпагIв йтарагылыгIв Чква Расул йшгIахIгвынйыргIвызла, Эгьзакь Мусса запхъа дгылу ацхърагIагIвчва рбзирала аспортсменква асквш ауацIа йапшым анкъвакъвраква йрылазлитI, асквш ацIыхъвагьи йайззахитIта рабакIыща ъагIадырбауа арат анкъвакъвраква йгIарылалитI.
«Араъапны хIара асквш ауацIа тшыззыгIбжьаз гIахIырбахитI», – йхIватI ауи.
Расул йшихIвазла, сынчIва арат анкъвакъвраква Эгьзакь Мусса йцри кыт Гвым апны йакIвшатI: ужвы ауаъа Мусса йцхърагIарала йдыргылыз ауыжвгIанчIви спорт тдзы гылапI.
«Ужвы агвымква аспорт тыдз гIальамат рымапI, ауаъа рахIа йхIаракIу анкъвакъвраквагьи адгал йауаштI. Ан-абачвагьи рсабиква штшырбжьауа, йшабакIуа йапшырныс йызгIайитI», – йхIвитI Чква Расул.
«Абаза» клуб йаднагалыз йхпахуз анкъвакъвраква Къарча-Черкес йауу спортсмен 155-гIв алан. ЦIыпх ауи йалаз 80-гIвы ракIвын, датшата йухIвушызтын, рпхьадзара гIванла йалахIатI: анкъвакъвра йгIалалырныс зтахъкву рыцIа-рыцIа йщардагIвхитI. Йапхъахауата ауи Черкесск апны асквш 2016 агIан йакIвшатI.
швталра йа тшаншвцIара атахъыпI.