АААК Иреиҳаӡоу ахеилак ахантәаҩы Мусса Егзакь ицхыраарала Аԥсныи Ҟарачы-Черқьесиеи имҩаԥысыз зхы иақәиҭу аиқәԥаразы аицлбарақәа реихшьаала ҟаҵоуп.
Саид Барганџьиа
Абҵара 28 рзы Гәдоуҭа ихыркәшахеит Мусса Егзакь ихьӡ зху зхы иақәиҭу аиқәԥаразы VII-тәи атурнир, Ҟарачы-Черқьесиа аиԥш зеиԥшу аицлабрақәа мҩаԥнагеит аспорттә клуб «Абаза». Арҭ аспорттә еицлабрақәа аҩбагьы рымҩаԥгара алыршахеит Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь иҟаиҵаз афинанстә цхыраареи адгылареи ирыбзоураны.
Мусса Егзакь ихьӡала зхы иақәиҭу аиқәԥаразы атурнир Аԥсны имҩаԥысуеижьҭеи быжь-шықәса ҵуеит. Иара еснагь жәларбжьаратәи аҩаӡара аманы имҩаԥысуан: уи иалахәын Ҟабарда-Балкариантә, Ҟарачы-Черқьесиантә, Чечентәылантә, Даӷьсҭанынтә, Краснодартәи атәылаҿацә, Ростовтәи аобласт уҳәа рҟынтә аспортсменцәа. Сынтәа атурнир иалахәыз аԥснытәи ақәԥаҩцәа мацара роуп, убри аҟнытә аицлабрақәа атәыла аҩныҵҟатәи астатус роуит.
Зхы иақәиҭу аиқәԥаразы Аԥсны Афедерациа ахада ихаҭыԥуаҩ, аспорттә клуб «Абаза» адиректор Леонид Боџьгәуа иазгәеиҭеит сынтәа атурнир ишалахәыз акапантә категориақәа жәааи, ақәратә категориақәа ԥшьбеи рыла аспортсменцәа. Иааидкыланы Аԥсны араионқәа зегьы рҟынтә еицлабуан ҩышәҩык ақәԥаҩцәа.
«Ҳаспортсменцәа рыҩӡара даара иҳаракуп. Аӡәырҩы аҳамҭа дуқәа ирыԥсахахьеит. Иазгәаҭатәуп азыҟаҵаҩцәа рџьабаагьы, урҭгьы рыҩаӡара иахьынӡахәҭоу иҟоуп», – иҳәеит Боџьгәуа.
Зхы иақәиҭу аиқәԥаразы Аԥсны Афедерациа ахада Рашь Хәытаба ари ахҭыс дахцәажәауа иазгәеиҭеит, атурнир еснагь еиԥш зеиӷьыҟам ала ишымҩаԥысыз. Агәра шиго иҳәеит, атурнир есааира ахыԥша бзиа ишацлало, Мусса Егзакь Аԥсны аспорт аҿиаразы, хаҭалагьы зхы иақәиҭу аиқәԥара аганахьала иҟаиҵо ацхырааразы иҭабуп ҳәа иеиҳәеит.
«Акыршықәса раахыс ҳазыҟаҵаҩцәа руалафахәы рзишәоит, иаҭаху аспорттә маҭәахәқәа раахәараҿы ацхыраара ҟаиҵоит, лассы-лассы ҳақәԥаҩцәа афинанстә цхыраара риҭоит, жәларбжьаратәи атурнирқәа рҟны иқәгыларц азы», – ҳәа еиҭеиҳәеит Хәытаба.
Мусса Егзакь ихьӡ зху зхы иақәиҭу аиқәԥаразы атурнир аҟны аиааира згаз иранашьан ахраҿақәеи, амедалқәеи аҳаҭыртә бӷьыцқәеи.
Адунеизегьтәи аԥсуа-абаза конгресс Иреиҳаӡоу ахеилак ахантәаҩы Мусса Егзакь ицхыраарала абҵара 24 рзы Ҟарачы-Черқьесиа, аклуб «Абаза» имҩаԥнагеит зхы иақәиҭу аиқәԥаразы ахԥатәи арбагатә турнир.
Зхы иақәиҭу аиқәԥара аклуб «Абаза» ахада, иавтономтәу, икоммерциатәым аиҿкаара «Алашара» ақалақь Черқьесск иҟоу, зхы ҳәаақәызҵо аҟәша анапхгаҩы ихаҭыԥуаҩ Расул Чыкәа иҳаилиркааит, Мусса Егзакь зхаҿы дгылоу аспонсорцәа рыбзоурала, аспортсменцәа ашықәсынтәарак атәыла анҭыҵ еиуеиԥшым аицлабрақәа рхы шрыладырхәуа, ашықәс анҵәамҭазы арбагатә турнир шымҩаԥырго.
«Абри атурнир аҿы ҳара иааҳарԥшуеит шықәсык ала иахҵаз, ҳаизҳара ахьынӡаҳаракхаз», – иҳәеит иара.
Чыкәа еиҭеиҳәеит сынтәа атурнир шымҩаԥысыз Мусса Егзакь иқыҭа гәакьа Гәымлоуқыҭ аҟны: уаҟа уажәшьҭа аус ауеит ҳаамҭа иақәшәо Аспорт ахан, Егзакь ицхыраарала иргылаз.
«Уажәшьҭа Гәымлоуқыҭ Аспорттә хан хазына ҳазгылоуп, ара иҳаракӡоу аҩаӡара змоу аицлабрақәа рымҩаԥгара алшоит. Ахәыҷқәа рҭаацәарақәа ракәзар, иааины аицлабрақәа ирыхәыԥшлар рылшоит», – ҳәа ациҵеит Чыкәа.
Зхы иақәиҭу аиқәԥара аклуб «Абаза» еиҿнакааз ахԥатәи атурнир иалахәын 155-ҩык аспортсменцәа. Ҵыԥх иалахәыз 80-ҩык ракәын, сынтәа рхыԥхьаӡара ҩынтә рыла еиҳахеит, абасала иубартә иҟоуп атурнир ахыԥшра азҳара ишаҿу. Раԥхьаӡа акәны иара мҩаԥысит Черқьесск ақалақь, 2016 шықәсазы.
шәҭалароуп, ма шәыҽҭажәыҩроуп.