Адуней апсуа-абаза конгресс ЙхIаракIу асовет аунашвачпагIв Эгьзакь Мусса Апсны дцан агIваша, апрель а 5, а-Президент Бжаниа Аслан дйынйатI.

Анйара СогIвым, а-Президент й-УнашвахъцIарта апны йакIвшатI, йаргьи йаргвану апсуа йгьи абаза бызшваквала йырхIвуз асальам пхаквала йджвыквылтI.

«Бзиала уаабеит!» (апсуа бызшвала – «Бзила уыгIбатI!» – аредакция ррытаразга) – тшизынайырхатI а-Президент Бжаниа Аслан амеценат, Адуней апсуа-абаза конгресс ЙхIаракIу асовет аунашвачпагIв Эгьзакь Мусса. – УахьчIва хIанйара сайгвыргъьитI. Щарда цIуата хIгьабамбахсызтI, хIызлачважвуш хIымапI. ХIуагIа йырпщылу уыс щарда хIпахь йщтIапI, акъраль апны хIыззхъвыцра атахъу абаргвыраква гьмачIым. Са сшапшуала хIара [ауат] ауысква хIрылачважварквын закIы хIзазгIайуаштI», – йхIватI Бжаниа.

А-Президент йгIаликIгIатI Адуней апсуа-абаза конгресс Апсны ахъазла уыста йахауа хвду шаквицIауа.

Эгьзакь Муссагьи акьазу анизыгIадза абаза бызшвала джьауап айтуата а-Президент ага уыс йщардазтынгьи анйара заман ъазалихыз ахъазла дшизыразу йхIватI.

«ЙсгвапапI заман гIауаута хIъабабауа. Ауысква щардапI. Адуней йгьмайрам. Зны йапшымкIва адгылра хIымата, хIуысква цIолата, цкIы-цкIы йалыхIхуа хIрылачважварныс йстахъыпI. А-Конгресс щъата ауыс йшацIагылуаш, йшзацIагылуаш – ауатква ахабар уасхIвырныс йстахъыпI, хIнапIква багъьата йабаркIыта ауысква хIрымгIвайсырныс», – йгIаликIгIатI Эгьзакь Мусса.

«Амин Анцэа их,эааит!» (апсуа бызшвала – «Амин! Анчва йуыцихIватI!» – аредакция ррытаразга) – джьауап гIариттI а-Президент Эгьзакь Мусса йажваква.
Ауи амщтахь анйара ажурналистква гIвнамкIва йакIвшатI.

Сальам атакIрадъа зымгIвагьи йгIаргвынгIвуа, йазаргвану рцри бызшваквала йыртийуа йцIасхатI а-Президент Бжаниа Аслани Эгьзакь Мусси ранйараква рыхъазла. ЙгIащвгвалахIыршвахпI, ари апхъала а-Президенти а-Конгресс ахъади асквш 2021 август агIан, ужвы апшта Эгьзакь Мусса Апсны нхара уысла данаъаз, йанйатI. Ауи агIан Бжаниа Аслан Эгьзакь Мусса СогIвым апны йаныргIалу АААК ауысхарта данирайгва ауаъа дцан а-Конгресс агвып дрынйатI.