АААК ауысхагIвчва йапшым анархараквала асквш 2019 агIан анхара шакIвшаз йаквчважватI. А-Конгресс архъйагIв секретарь Гицба Инар агIвыма къральква рпны, АпхIвысква йгьи ЧкIвынргIа рсоветква, АшIыпIа хъвшараква рсоветква рпны йакIвшаз анхара агIарбараква гIайхIватI.
Барганджиа Саид
АААК архъйагIв секретарь Гицба Инар асквш 2019 ауацIа гIвымакъраль уыста йхъйаз йгьи АшIыпIа хъвшараква рынхара шакIвшаз, ауат апхъахьыла хачIвыта рпахь йдыргылуа дрыквчважватI.
Ауи йатайхIвахтI АААК хачIв хъадата апахь йгылу адуней акъральква йыртабзазауа апсуа-абаза уагIахъа радкIылра, ауат ращтаныкъвара арыбагъьара шакIву. Ари ахачIвы дырхъйауата ЙхIаракIу асовет аунашвчпагIв Эгьзакь Мусса йхъвдаквцIарала АААК ауысхагIвчва йагIвсыз асквш аурала апсуа-абаза йгьи аубых диаспораква гвып-гвып йъабзазауа акъральква йгIарыкIвшатI: Трыквшта, Мсыр (Египет), Иордания, Великобритания, Нидерланды, Бельгия, Германия.
«Трыквшти Иордании рпны нхара уысла йхъатала даъан Эгьзакь Мусса. ЗымгIва шалу а-Конгресс 11 шта хъвшаракI гIаннаршатI. Ауат йрапшу ахъвшараква ргIаныршара знархару ауыс йадынхалитI Мсыр апынгьи Иордания апынгьи», – йхIватI Гицба.
Датшагьи ауи йшихIвазла, а-Конгресс Апсны апынгьи Трыквшта апынгьи АшIыпIа хъвшараква ргIаныршара джьгарта йадынхалыркIвитI. Гицба йшгIаликIгIазла, мурад хъадата йрымапI Апсны, адунейла абаза уагIахъа ъабзазауа анахьанат акъральква йгIарыцIанакIуа кытипхьадза, къалипхьадза апны АшIыпIа хъвшараква гIандыршарныс.
«АААК агIвымакъраль уысква гIахIахвырквын хачIвыта хIпахь йхIыргылыз абгата йхIырхъйата йспхьадзитI. АшIыпIа хъвшараква ргIаныршара ауыс акIвызтын, агIарбараква шгвымхам гIалскIгIитI, ауаса багъьата йхъасцIитI: асквш 2020 агIарбараква рыцIа йагъьхуштI, йауа ухIварыквын хIапхъа хIыздынхалырныс йыхIгвыгъу ауысква рщарда Апсны ауацIа акIвпI нархарата йрыму. Ауи йгьгIаныцIуам хIапхъа а-Конгресс гIвымакъраль уыс йаднымхалуашта. Ауи анхара тшауацIнахуа, ащайдза рыцIа-рыцIа йбагъьахауа йымгIвайсуаштI. ХIайщчва, хIахщчва ъабзазауа йъакIвызлакIгьи хIнадзуштI. Ашта хъвшараква, ашIыпIа хъвшараква рынхара ъаджвыквырцIахьу акъральква рпны хIэтнокультура абайара агIахчари арыбагъьари знархару апроектква абзазара йацалагIыжьуаштI», – йхIватI АААК архъйагIв секретарь.
Ауи йшипхьадзауала, АААК ашIыпIа хъвшараква Апсны акытква зымгIва рпны йгIахъыртIрыквын абзазагIвчва йырхъйачIву ажвлара уысква азаъащата йрызрыму тшапсахуаштI, ауат зынйауа абаргвыраква йызлацрыцIсуаш амальква ргIаура йацхърагIуштI.
«ХIкытква рпны къару ду тапI, ауи акъару йырхъйачIву ауысква рыдынхалра апны йгIарысабапра атахъыпI. ХIацIагылырквын хIбзазаща агала йхIызрыпшдзуштI, акъральыгIвчва ртшдырра щаквгылуаштI, йащтагIайуата ауи хIыжвлари хIкъральыгIви ртшауацIыхра йацхърагIуштI. ЗымгIва зынла йаквымшварныс ауаштI. Ауи гвынгIвырапI. Ауаса ауыс апхIымрышвтуата хIадынхалырныс акIвпI йхъаду», – йхIвитI Гицба багъьата.
Ауи швапхата йгIайырбатI акъала-фыр Гвдауыта ашIыпIа хъвшара. Араъа гIамта айшысла ашIыпIа хъвшара асовет агвып йацIагылата джьгарта йъанхауа абзирала хпроекткI абзазара йырзалажьтI: аворкаут уатыквква гIандыршатI, амышвкъваратараква рхвгIан йдыргылтI, ашIыпIа апхьарта дзыла йадыргалтI.
АААК архъйагIв секретарь Гицба Инар кIьыдата дрыквгIашIастI АпхIвысква йгьи ЧкIвынргIа рсоветква рынхара.
Ауи йшгIаликIгIазла, ЧкIвынргIа йгьи АпхIвысква рсоветква а-Конгресс анхара шIыцрата йгIалалтI, йхъаду хачIвыта арат ахъвшараква рпахь йгылапI ажвлара рпны ашIаква йгьи апхIвысква кIьыдата рыдынхалра, ауат йырзынарху ауысква йнардзата рырхъйара.
«Адуней апсуа-абаза конгресс аидеология нархараква щаквзыргылуа адкIыларапI, ажва ахъазла, атгIачва амагIны, азгIвадара арыбагъьара, агвбайара йгьи апатриот бжьара», – йгIаликIгIатI Гицба Инар.
АгIвнархаракIгьи – АпхIвысква йгьи ЧкIвынргIа рсоветква – рынхара пычIвта йшджвыквырцIаз гIапхьадзахузтын, йагIвсыз асквш ауацIа йрылшаз бзидздза йнадзитI, йпхьадзитI Гицба.
«Апхъапхъадза йхIвара атахъыпI асоветква рквта хъвшараква рпны ацIагылыгIвчва гвыпква шщаквгылыз. АпхIвысква рсоветква рунашвачпагIв Ардзынба Гети ЧкIвынргIа рсоветква рунашвачпагIв Торчуа Левани зымгIвалагьи йагвынгIвуата йъацынхауа абзирала гIаджвыквцIара ду щарда абзазара йалалтI. Ауат йрыуапI Асабиква рхчара адуней мшы, Апсны Республика акъральыгIва баракъ амш рыртлапIара, Апсны апны йапхъахауа акультура-спорт фестиваль «Абаза» акIвыршара. «Агвы апхара» зхьзыз агуманитар акцияква акIвшатI, Апсны акыткви акъалакви рпны жвлара йгьи бзазара уыс бзидздза дахIврала йахъвдаквыцIтI, ХIХ-хауа асквшышв агIаншара чвгьаква йрыладзыз, амхIаджьырра йагаз ауагIа рджьабатI», – йхIватI АААК архъйагIв секретарь асоветква ракция хъадаква гIашIипхьадзауата.
Ауи йгIацицIахтI арат ауысква йрыццауата АпхIвысква рсоветква «АААК асатырква йрыладырхIарныс йащтата ауи алалра знархараз ахIвара швъаква шазыркIкIуаз».
Адуней апсуа-абаза конгресс (АААК) – зтурыхи зтынхи байу адкIыларапI. Ужвы азаман АААК анхара арат анархара хъадаквала йадгалапI: адиаспора гвып-гвып йъабзазауа адуней акъральква рнархарала, ашта нхара анархарала, апсуа-абаза уагIа йрыуу апхIвыскви чкIвынргIи рыдынхалра, бызшва щардала йынхауа ахабарргарта портал атшауацIнарыхра, датшагьи. А-Конгресс йахачIв хъадапI адуней акъральква рпны йбзазауа апсуа-абаза уагIа зымгIва радкIылра. АдкIылара далалырныс йылшитI абаза уагIахъа йрыуу дзачIвызлакIгьи, адунейла дъабзазалакIгьи. Ауи ахъазла Адуней апсуа-абаза конгресс ахабарргарта портал апны аонлайн ахIвара швъа атагIвра акIвпI йчпачIву.
швталра йа тшаншвцIара атахъыпI.