Адуней апсуа-абаза конгресс апресс-квта апны АААК ауысхагIвчва Мараташварта Европа акъральква рпны йшцаз йгьи йтыцIхуа асквш ауацIа йакIвшаз анхара агIарбараква йаквчважватI.
Барганджиа Саид
Ашвахьа декабрь а 23 атшын Адуней апсуа-абаза конгресс АААК ауысхагIвчва гвып Мараташварта Европа акъральква рпны уыста йахъвдаквырщтыз йаквчважватI йгьи асквш 2019 ауацIа адкIылара йакIвнаршаз анхара агIарбараква гIархIватI.
Апресс-конференция йалан Адуней апсуа-абаза конгресс ЙхIаракIу асовет йалу Чирикба Вячеслав, АААК архъйагIв секретарь Гицба Инар йгьи а-Конференция ахабарргарта портал аунашвачпагIв Лазба Амина. Скайпла аконференция дгIалалтI АААК ЙхIаракIу асовет аунашвачпагIв Эгьзакь Муссагьи.
Эгьзакь Мусса асквш 2019 ауацIа а-Конгресс бзита йынхата йпхьадзатI. Ауи апсуа-абаза диаспора йъанызлакIгьи йабардырра, йадкIылра шатахъу гIаликIгIатI.
«ХачIв хъадата хIпахь йгылапI хIайщчва, хIахщчва рыуа заджвгьи гватрата дгIаныгIымжьуата йъанызлакIгьи хIрызцарныс – Апсны апынгьи агIвыма къральква рпынгьи. УахьчIвала адуней акъральква рпны йгIахъхIтIыз ашта хъвшараква 11 йнадзитI, Апсны йгьи Трыквшта рыкъалакви ркыткви рпны ашIыпIа хъвшараква рсоветква – 26. ЦIабыргыта, хIара Апсны акъалаква, акытква зымгIва рпынгьи хIнадзарныс хIгвыгъан, ауаса сынчIва агIамта гьхIзымхъатI. Ауи анхара джьгарта йакIвшитI, хIапхъа ауи ацIыхъвадза йнахIырдзуштI. Швабыжта йхIтахъыпI дзачIвгIвычIвгIвысызлакIгьи йгвы йту гIдыруата хIынхара адыгIгалырныс. Йкъва-йсарыгьи ауи хIазцуштI, кьангьаш аламкIва. СынчIва, йшспхьадзауала, а-Конгресс анхара сабап ду алата йакIвшатI. ХIынхара ужвыгьи йщаквгылыркIвитI – хIаргьи хIынхара гIахIрыкIапгIвацитI, ауахьауатгьи гIвымакIгьи ймайгвгъауата рхъамаль дара ркъарула йырбара шатахъу гIаргвынхIыргIвитI. ХIхъвыцраква шабгу абзихара, акъагIара, адахIвра йырзынархапI. ЙшыгIбауала, йгIаджвыквхIцIаз ауысква гIахIдахIвитI», – йхIватI а-Конгресс ЙхIаракIу асовет аунашвачпагIв.
Ауи йгIайззаз йгIадйыргвалашвахуата йатайхIвахтI апсуа-абаза уагIахъа йрыуу ауагIа уахьчIва адунейла шта щарда рпны йшбзазауа: Апсны, Трыквшта, Мсыр, Иордания, Аджария, Европа акъральква, Россия аштаква – Къарча-Черкес, Къабард-Балкъар, Адыгейшта.
«ХIуагIахъа ъанызлакIгьи ауат шадхIкIылуаш акIвпI хIара хIызщту. ХIара насып ду хIымапI, йызлахIыму дакъикъипхьадза абзира хIазхъвыцитI, штшадхIкIылуаш хIазхъвыцитI. ХIыгвква цкьата хIабабарыквын – ауи акIвпI йнасыпу», – йхIватI АААК ЙхIаракIу асовет аунашвачпагIв.
Эгьзакь Мусса йшгIаликIгIазла, а-Конгресс гватра ду рзалнахитI йгIадзынгылуа абанпараква.
«Асабиква згIвадата адуней йшгIаквылуаш, анчви абачви гвыбзыгъата асаби йлымхIа хIыбызшва, хIмакъымква штадрысуаш гIдыруата – абарат ауысква хIрыдынхалитI. Апхъахьыла хIдуней шцуш хIазхъвыцуата акIвпI уахьчIва асабиква гIадзынхIыргылра шатахъу», – йхIватI Эгьзакь Мусса.
Апресс-конференция йалакваз йауацIыхта йалачважватI АААК ауысхагIвчва гвып декабрь мыз агIан Европа акъральква рпны йшцаз. Ауат йгIалыркIгIатI АААК ЙхIаракIу асовет аунашвачпагIв йхъвдаквцIарала Мараташварта Европа акъральыгIваква рпны ашта хъвшараква пщба йнадзауата йшгIахъыртIыз.
АААК ЙхIаракIу асовет йалу Чирикба Вячеслав Великобритания акъала хъада апны а-Конгресс ашта хъвшара шгIаншаз даквчважватI, Лондон апны АААК ахъвшара дахIврала йшгIахъыртIыз йхIватI.
«Лондон йту адиаспора рпхьадзара гьдууым. Ауат йрыуата щардагIвы здыритI – Апсны йапхъахуз апрезидент Ардзынба Владислав хIйыцта Лондон апны асквш 1990 агIан йакIвшуз аконференция хIанца йгIашIарышвта. Ауищтара чкIвынргIа гIадзынгылын адиаспора йгIаджвыквырцIауа акция, культура уыс щарда джьгарта йрыдынхалитI», – йхIватI Чирикба йырхъвыхраква гIайрахауата.
Ауи йшипхьадзауала, Лондон апны абашталагIвчва рынйара дахIврала йакIвшатI.
«Араъа йгIайззаз ауагIа рныбыжьла йгьапшымызтI. Сара АААК амурадква, апхъахьыла йыздынхалуаш, Лондон адиаспора уыс кIара гIаджвыквырцIузтын АААК атланыкъвала йызларцхърагIарныс рылшуш агьиква срыквчважватI. Ауат йщаквдыргылтI Лондон апны ашта хъвшара гIахъыртIырныс, Йешим Атрышпха дырхъадата рыцIа йджьгару апхъагылагIвчва алырхтI. ХIара зымгIвагьи гвышхвара дута йхIзалтI ари агIаншара, Лондон йту хIайщчви хIари джьгарта хIшзацынхуш йазхъахIцIитI», – йхIватI ауи йгIачважвара далгауата.
АААК архъйагIв секретарь Гицба Инар а-Конгресс ауысхагIвчва Бельгии Голландии йшцаз гIайхIватI. ЙгIаликIгIатI Нидерланды апны йадыргалуаз анйара апхъала гвыргIва шрылаз, йауа ухIварыквын «тамамта йгьрымдыруазтI уагIата зъарагIв гIадгылуаш, ауат а-Конгресс, ауи амурадкви ахачIвкви гIальаматра рызрымазлуши йрызрымамызлуши».
«Анйарта хIанадгыл хIгвы тынчхатI: ауагIа щардагIвын, апещ йгьыгIвнамшвузтI. Голландия йтабзазауа хIабашталагIвчва хIуыс гIальаматра ду азырбатI. ХIара а-Конгрессгьи, ауи здынхалуаш ауысквагьи, а-Конгресс алалрала амальквагьи хIрыквчважватI», – йхIватI Гицба Инар.
Ауи йхIваз йацицIахтI Голландия йту апсуа-абаза диаспора рычкIвынчва джьгарта тшшгIадырбаз. ШIыцта йгIандыршаз ашта хъвшара дахъадахатI ауысхагIв шIа Ашуба Эргьун.
ЙащтагIайуата ауат Бельгия ПаштахIыгIва йцатI. АААК архъйагIв секретарь йшгIаликIгIазла, ауаъагьи анйара пхарала йырчвыта йакIвшатI, ауи йаквшахIатта Бельгия апынгьи шта хъвшара гIахъыртIытI. Ахъвшара дахъадахатI Аламиа Даур, Апсны ажвлара йгьи аполитика уысхагIв ду, йбергьльу ауысагIв Аламиа Геннадий йпа.
«ХIара (АААК – аредакция ррытаразга) ашта хъвшара Аламиа Геннадий йпа Даур даъахъадахаз йалкIгIата хIхъа аладухитI, йшпакIву ухIварыквын йбергьльыпI Аламиа Геннадий апсуа-абаза уагIахъа рэтнокультура байара агIахчарагьи а-Конгресс анхарагьи къарута йалайцIаз шIырпшыра амамкIва йшдуу», – йгIаликIгIатI Гицба.
УадыргIвана апресс-конференция апны Адуней апсуа-абаза конгресс ахабарргарта портал аунашвачпагIв Лазба Амина ажурналистква йралхIвтI АААК ауысхагIвчва Германия апны нхарата йакIвдыршаз аунашва. Ауаъагьи Мараташварта Европа акъральква рквтала йпщбахауата а-Конгресс ашта хъвшара гIахъыртIытI.
Лазба йшылхIвазла, Германия апсуа-абаза диаспора руагIапхьадзарала Европа апны зымгIва рацкIыс йщардагIвыпI, адунейла йгIахIахвырквын Трыквшта амщтахь йгIайитI. Ауи йшщаквлыргылызла, Германия апны апсуа-абаза уагIахъа йгIарыцIанакIуата 10000-гIв райхIа бзазитI.
«Германия апны сквшы 27 цIитI Апсуа культура квта нхауищтара. Ауи йалапI апсуа-абаза диаспора йрыуата уагIа 100-гIв райхIа. Ауат мзигIадзапхьадза йанйитI йгьи тгIачвакIта йалапI. ХIара хIанйарагьи атгIачва шабабауа апшта пхарала, гвапарала йырчвыта йакIвшатI. ХIайчважвара наскIьапхьадза адиаспора а-Конгресс агIаджвыквцIараква шрымагIальаматхуз нахвата йыгIбун. Дара йшырхIвахызла, Апсны агIащтийыгIвчви дари абараса йанйарныс щарда цIуата йыртахъын», – лхIватI АААК ахабарргарта портал аунашвачпагIв лгвгIанаграква хIыцагIвылшауата.
Ауи йшылпхьадзауала, айззара апны зымгIва рацкIыс йхъаду уыста йгIащтIырхыз ари акIвпI: айчважвара йалаз йщаквдыргылтI йащтагIайуа асквш апны Германия шабгу гIацIанакIуата апсуа-абаза диаспора ргIащтийыгIвчва ранйара акIвдыршарныс.
«Акультура-спорт фестиваль «Абаза» акIвыршара ауысла йхIыму апышва гIахIрысабапырквын абауи йапшу ауыс дугьи хIзахъвдаквыщтуаштI», – араса йылпхьадзитI Лазба Амина.
Апресс-конференция апны ажурналистква йддырбатI АААК ауысхагIвчва гвып Мараташварта Европа акъральква йангIарыкIвшуз йхъырхыз авидеогIвыраква. Авидео
апны Европа акъральква йырту апсуа-абаза диаспора рхъа йаквчважвитI, АААК ащтийыгIвчва – а-Конгресс амурадкви ахачIвкви йрыхадыргIвазитI. Ауат асюжетква рпны йубитI апсуа-абаза диаспора йрыуу абзазагIвчва АААК йъабадырыз гвыхътIыла йшайгвыргъьауа.
Адуней апсуа-абаза конгресс ауысхагIвчва гвып Мараташварта Европа акъральква рпны нхара уыс дырхъйауата декабрь а 6 йгIашIарышвта декабрь а 16-дза йаъан. Апсуа-абаза диаспораква ъабзазауа акъральква ргIарыкIвшара АААК амурадква йгIарыцIанакIуа анархара хъадаква йрыуазакIыпI – уахьчIвала адуней йапшым акъральква, аштаква рпны йхъылапсата йбзазауа абаза уагIахъа радкIылра.
швталра йа тшаншвцIара атахъыпI.