Асквш 2019 агIан АААК апны хъвшара шIыц гIаншатI – Таниа Кан дызхъадахаз АААК ауысхарта. Асквш ауацIа нхарата йакIвшаз йахъазымкIва ауи а-Конгресс ахъахIараквагьи акврыдзраквагьи дрыквчважватI.
Барганджиа Саид
Адуней апсуа-абаза конгресс ауысхарта аунашвачпагIв Таниа Кан ахъвшара анхара, 2018 йгьи 2019 асквшква рпны а-Конгресс ахъахIаракви акврыдзракви руыс зквыз даквчважватI.
Таниа Кан йатайхIвахтI АААК ауысхарта адкIылара анхара а-Устав йгьи АААК ЙхIаракIу асовет аунашвачпагIв йхъвдаквцIараква рырхъйара йшазынарху. Ауи йшихIвазла, ауысхарта йалкIгIата агватра ззынарху а-Конгресс ашта йгьи ашIыпIа хъвшараква рацынхара акIвпI.
«Ауысхарта ахачIв хъадаква йрыуазакIыпI АААК ЙхIаракIу асовет аунашвачпагIв йрыбагъьауа а-Конгресс асквш план арыхIазырра, ауи абзазара йшалалуа архъвыхра, ахча йа датша уысла джьауап кIра, а-Конгресс аунашвачпагIв дызлу айззараква радгалра, акъральыгIвчва ртшазынархараква рыдынхалра, аунашвачпагIв йхъвдаквцIарала датша йгIагылуа ауысква рырхъйара», – йхIватI ауысхарта аунашвачпагIв.
Датшагьи ауи йгIайхIватI 2018 йгьи 2019 асквшква рагIан АААК ахча шандыргIалыз. Таниа йшгIаликIгIазла, а-Конгресс ахъахIара злащаквгылу ауагIа ргвчIагIвра цхърагIара акIвпI.
2018 йгьи 2019 асквшква рагIан ахчаква рщарда алазцIаз а-Конгресс ЙхIаракIу асовет аунашвачпагIв Эгьзакь Мусса йакIвпI – сом мильуан 32. ЙгIалукIгIушта йаъапI Москва йту апсуа диаспора рхъада, АААК ЙхIаракIу асовет йалу Агрба Беслан йцхърагIарагьи – сом 10 мильуанкI. Датшагьи а-Конгресс йгIахъахIитI ауи йалакву ралазара ашвачIвы апхьадзара дууымкIва.
Акврыдзраква гIахIахвырквын йагIвсыз асквш ауацIа Ахабарргарта портал анхара йазалырхтI сом 11 мильуанкIи зыкь 200, ажвлара проектква рырхъйара йаквдрыдзтI сом 8 мильуанкIи зыкь 500.
Датшагьи АААК йапшым анаука программаква ахчата йырзалырхтI сом зыкь 910. Согъвым апны йаныргIалу аквта уысхарта арчIаджьри ъамапсымала адгалри йрыквыдзтI сом 5 мильуанкIи зыкь 600. АнхагIвчва рынхаша сом 7 мильуанкIи зыкь 800 йнадзатI. Нхара уысла агIамдараква, агIвыма къральква Трыквшта, Иордания, Мсыр, Великобритания, Нидерланды, Бельгия рцара сом 4 мильуанкI агатI, ахабарргага йгьи ачвахъабага пкъыгIваква радгалра сом зыкь 625 аквыдзтI.
Адуней апсуа-абаза конгресс (АААК) – зтурыхи зтынхи байу адкIыларапI. Ужвы азаман АААК анхара арат анархара хъадаквала йадгалапI: адиаспора гвып-гвып йъабзазауа адуней акъральква рнархарала, ашта нхара анархарала, апсуа-абаза уагIа йрыуу апхIвыскви чкIвынргIи рыдынхалра, бызшва щардала йынхауа ахабарргарта портал атшауацIнарыхра, датшагьи. А-Конгресс йахачIв хъадапI адуней акъральква рпны йбзазауа апсуа-абаза уагIа зымгIва радкIылра. АдкIылара далалырныс йылшитI абаза уагIахъа йрыуу дзачIвызлакIгьи, адунейла дъабзазалакIгьи. Ауи ахъазла Адуней апсуа-абаза конгресс ахабарргарта портал апны аонлайн ахIвара швъа атагIвра акIвпI йчпачIву.
швталра йа тшаншвцIара атахъыпI.