АААК VIII Айззараду апленар алачIвара апны ООН, ЮНИСЕФ йгьи ЮНЕСКО йырзырщтиуаш арезолюцияква нарахвтI.
Адуней апсуа-абаза конгресс VIII Айззараду апленар алачIвара анхара йахъвыкIта йакIвшаз, йапшым ауысква йырзынархаз ауатыкв айчважвараква ООН, ЮНИСЕФ йгьи ЮНЕСКО йырзырщтиуаш арезолюцияква нахврала йалгатI. Ауат адиаспораква ъабзазауа акъральква рпны апсуа-абаза уагIи ауат ркультура квтакви рхвитнагIаква хчара йазынархапI.
АААК VIII Айззараду апрограмма хсекциякI нхушта йалан. Ауатыкв айчважвараква рыуа азакI уыжвгIанчIви дуней апны апсуакви абазакви ръадаб-намыс цIасква йрыщату «Апсуара» агIарысабапра йазынархан. Датшагьи секциякI апны цри бызшва гIащаквыжьри тшауацIнарыхри ауыс апны узынйауа абаргвыраква гIащтIырхтI. Йхпахуз чкIвыныргIа ргIадзныргылра, спорт, псабарахчара йырзынарху ауысква аднакIылтI. «Айшва гьагьаква» йырхъпшылуан СогIвым йаъу а-Конгресс ауысхарта анхагIвчва: АААК йаланакIуа апхIвысква р-Координация совет аунашвахъцIагIв Бебиа Екатерина «Апсуара» асекция акIвлыршун, арыпхьарали жвлара джьгаррали згIвадарахчарали АААК ахъвшара аунашвахъцIагIв Хагба Изольда «Цри бызшва» йъаквчважвуз даъан. ЧкIвыныргIи физкультури тшауацIдрыхрала ахъвшара аунашвачпагIв Берзениа Валерийи ахъвшара апны ауи йыцынхауа Квициниа Эсми «ЧкIвыныргIа, спорт, экология» секция йахъпшылуан.
Абаза уагIа атгIачва рпны рахIа хъадата йырпхьадзауа ацIасква цIахъызтшныс шварагIвару уыжвгIанчIви заман апсахраква дрызхъвыцуата Бебиа Екатерина йгIалылкIгIатI апсуакви абазакви ръадаб-намыс йащату Апсуара йарыбагъьауа абагвынгIвра ацIасква ухчара ахъазла ауи апхьартаква рпрограмма йалацIара шатахъу.
Апсуара йазынархаз айчважвара апны ражва рхIватI Апсны Республика АуагIа Райззара йавице-спикерыз афилософия наукаква ркандидат Гамисониа Эмма, ауысагIв СакIаниа Гвында, Апсуа радиуа ажурналист Ачба Алина, «Абазашта» газет аредактор хъада Къвыл Фардауыс, Апсны Республика Ажвлара палата асекретарь КIьычба Гульи.
Айчважвара йалаз, Ставрополь шта ахьыла АААК VIII Айззараду йаделегату Аджьбакь Мурат ауагIа йырцIасу агвбайара апсуакви абазакви йрыщтагIайуаш абанпараква йрызгIанырыжьра ахIатырла акытква ргIащаквыжьри ртшауацIыхри ауыс амагIны гIаликIгIатI.
«Сара сцри бызшва акыт апны санду йслырдыртI. Йара ауаъа акIвпI суагIа рцIасквагьи, рхабзаквагьи, динта йынкъвыргауагьи ъаздырыз. Апсуара шхIхчуш хIазхъвыцуазтын акыт штшауацIнахIрыхуаш хIалачважвара атахъыпI», – йажва найырдзатI Аджьбакь Мурат.
Хагба Изольда йакIвлыршуз ауагIахъа бызшваква руыс аквчважвара йалан АААК ЙхIаракIу асовет йалу апсуа бызшвадырыгIв йгьи аполитик Чрыгъба Вячеслав, Апсны анаукаква р-Академия апрезидент, акIавкIаздырыгIв, апрофессор ДжьапIуа Зураб, Апсны Республика арыпхьарали абызшва политикали аминистр йтарагылыгIв Кварчелиа Ада.
Чрыгъба Вячеслав йшибауала, уахьчIва апсуа бызшва агыларта зтIахсахаз ауи ъанадрыскIьауи дукI чва ъахъарымбахуи акIвпI. Абызшва ахв щтIухра, ауи ауагIа алачважварныс бзи йырбауата йучпара ахъазла ашIара йырзынарху, гвыбзыгъата йлыху къральыгIва программа атахъыта йпхьадзитI апхьахьа.
«РахIа уызквсра атахъу ашIара ракIвпI. Арыпхьара, хабарргарала аполитика рпны йалакIыта амальква нахвра атахъыпI. Аправительства ахьыла угIалагата асквш 2015 январь а 1 йгIашIарышвта къару зму, ауаса ахъаз ашвъабгъьы йгIанхалыз апсуа бызшва ауысла а-Хабза нырхара атахъыпI», – йгIаликIгIатI Чрыгъба.
Абызшва ауыс йнардзата анузыхIвуш аквтанай апхьартаква йгIарылгаквауа апсуа бызшва абгата йырдыруата, йаущтта йалачважвауата йанцара агIан акIвта йпхьадзитI ауи.
Кварчелиа Аида лгIачважвара цри бызшва гIащаквыжьра йгьи тшауацIнарыхра ауысла Апсны апхьартаква рпахь йгылу абаргвыракви ахачIвкви йырзыналырхатI. Ауи йшылхIвазла, апсуа бызшвали литературали арыпхьара апрограмма сабап ъалам, абызшва арыпхьара йазалху асахIатква ъапшым, апхьартакви акласскви рпны абызшва ардырра анадзараква кIара ъагIвыргауа, арыпхьагIвчва йнардзу уыжвгIанчIви методика материал ъарымам акIвпI апсуа бызшва хъачвамщара азырбауа йызцаз. ЙгIачважвуз ари ауыс апны рыцIа гватра ззыбачIву анархараква гIалырбатI.
«Апхьартаква, аклассква зымгIва йрыквшвауа программа гIаныршамкIва, ауи йаквыргIапста апхьагакви арыпхьагIвчва рыхъазла ацхърагIагакви лыхымкIва амаль гьамам. Ауи акIвымкIвагьи Интернет апсуа бызшвала уталра атахъыпI», – ажва гIалгтI Кварчелиа.
Берзениа Валерийи Квициниа Эсми чкIвыныргIи спорти экологии йырзынархаз рсекция анхара джвыквырцIауата ЙадкIылу ауагIахъаква р-Организация (ООН) йазынарху, Апсны акъральгIвчви ажвлара адкIыларакви ООН а-Устав йгIанахIвауа ахвитнагIаква рытра ауысла ажванахъаква зну арезолюция апроект асасчва ахадыргIвазатI.
Ари асекция акIвйыршун АААК Айкьангьашырта клуб аунашвахъцIагIв Зантариа Рустам. Аэкспертква – каратэ-до Шотокан–Рю Казэ Ха Адуней федерация авице-президент Абыхвба Ахри аэколог Кириа Михаили – рыцта «айшва гьагьа» йадзхъачIвакваз дара рышта апны йзынйауагьи адуней шабгу ахъазла магIны змугьи аэкология уысква йгьи Апсны апны спорт атшауацIыхрала уызквгвыгъушта йаъу алшараква йрыквчважватI.
«УахьчIва хIычкIвынчва ашвъа йаным адуней анйараква йцауа, йапшым адкIылараква йрылалуамцара рыхьыз адуней шабгула йдыргарныс лшара рымапI. Са йшспхьадзауала, ауат алшараква гIарысабапра атахъыпI. Швгвышхва, аорганизацияква гIашвау, рхъвыхра нхара акIвшвырша. ЗакIы штшапсахуаш уаззыргвыгъауа лшара аъапI – аэкология ауысква рпынгьи», – йгIаликIгIатI Кирия ашIаква рыцIа йшджьгарызлуш йаквгIазшIитуата.
Арезолюция апроект аквчважвара «айшва гьагьа» асасчвагьи гIалалтI, ауат ауи йалацIа йауаш нархъагаквакI гIархIватI.
Ажва ахъазла, ажвлара уысква джьгарта йрылу Аршба Валерия арезолюция ООН апны йалархIвауа ашвъаква апсуа паспортквагьи шрылазлуш ауысла ажванахъа алацIара атахъыта йылхIватI. Лажва налырдзауата ауи йгIацылцIахтI апсуа спортсменква адуней анкъвакъвраква йшрылазлуш тшанырцIара ахъазла рпаспортква гIадрысабапырныс йахвитзара шатахъу.
«Айшва гьагьаква» зымгIва рпны айчважвараква алдыргауата адуней организацияква йырзырщтиуаш арезолюцияква нарахвтI. «Апсуара» секция апны йнарахвыз арезолюция апсуа-абаза диаспора адуней шабгу апны абаза уагIа йшрыуу, хвитнагIагьи шырквнагу, апсуакви абазакви ъабзазауа къральква рпны акультура квтаква гIныршара шатахъу гIанахIвитI. Ауи ашвъа ЮНИСЕФ йырщтиуаштI. «Цри бызшва» секция арезолюция хъадата йгIалнакIгIитI АААК йгьи ЮНЕСКО апсуа бызшва гIахчара, тшауацIнарыхра, ауагIа йрылагара йазынхуш агIаджвыквцIараква. Асекция ахъпшылыгIвчва ауи ашвъа ЮНЕСКО йазынадырхитI. АшIара йырзынарху аполитика, спорт, экология йанрыквчважва амщтахь йнарахвыз, ООН йазырщтиуаш ашвъа асекция апны йгIархIваз анархараквала ООНи Адуней апсуа-абаза конгресси рацынхарала лшарата йаъу гIанарбитI.
Адуней апсуа-абаза конгресс VIII Айззараду СогIвым апны декабрь а 7-8 руацIа йакIвшитI. VIII Айззараду йазынарху алалраква йапшым аформатквала декабрь а 11-дза йаъазлуштI.
Адуней апсуа-абаза конгресс айззарадуква хвысквша рпны зны йакIвшалитI. Адуней шабгу йбзазауа абаза уагIа ргIащтийыгIвчва тшазыркIкIитIта адкIылара анхара агIарбараква йрылапшитI, унашвачпагIви ЙхIаракIу асовет йалазлуши алырхитI. Ауи акIвымкIвагьи айззараду апны апхъахьыла анхара апрограмма лырхитI, анхара анархара хъада дрыбагъьитI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.