Апрель а 21 агIан Трыквшта апсыуа диаспора ауысхагIв ду Аргвын Ирфан сквшы 85 йхъыцIуашын. Ауи йынцIра шабгу йцришта йазйымаз алахIвара пха зынгьи дгьамайжьатI, ауи алахIвара акъаругьи Апсны абзира йазынархата йырхъйуз ауысквала йгIайырбатI.
Капба Арифа
Йбергьльыз ахIаракьатчпагIв йгьи ажвлара уысхагIв Аргвын Ирфан Дюздже къала йачвыхъарамкIва йчIву акытчкIвын Анхуа апны дйытI. Йабачва рабачва ауаъа акIвпI йырбзазартахаз ХIХ асквшышв агIан мчыла Апсны йантырга амщтахь (ауи асквшква 1817-1864 рагIан йакIвшаз КIавкIаз айсра йацIыхъватшаран – аредакция ррытаразга). Аргвын дызщтаныкъвуз йаргвандзаквагьи Анхуа кыт йтабзазитI, ауаса Апсны апны. Йшбергьльу апшта, апсыуаква Трыквштала йантырга йара шIыпIакI йауаз атгIачваква, анахьанат ауагIа агIвымашта апынгьи штшадыркIылуаш йащтан, рчIвартагьи хьзыта йахьырцIуз рпсадгьыл акыт йахьзыз акIвын.
Апсыуа цIасла йгIадзынгылыз ахIаракьатчпагIв
Аргвын Ирфан йъачIвагIала дэкономистын, йдырраква ахIаракьатчпара аунашвахъцIара йазынархан. ДаншIаз аныбыжь йгIашIарышвта зшанла йджьгарыз, йгвышхвуз хIаракьатчпагIвта тшгIайырбатI: йапхъала заджвгьи йымчпасыз агIаджвыквцIара шIыцква рхъатакIра дгьачвымшвузтI. Ажва ахъазла, зымгIва рапхъа Трыквшта апны йгIахъитIытI дьюти-фри ткван (ангьльыз бызшвала «duty free» - пошлинадъа ахвгIахвтра йалу аткван – аредакция ррытаразга). ДахIврала тшауацIнахуан йаргьи дрылата гвыпкI йацгIандыршаз атурист фирма. Аргвын Ирфан йхъатачIвын трыкв авиакомпания Turkish Airlines ахъахIара злалаз ахъвыкI.
«Ауи Трыквшта апны йбергьыльдзаз ахIаракьатчпагIвчва дрыуазаджвын, – йхIвитI арепатриант, апхъала йполитика уысхагIвыз, Ирфан аргваныта дыздыруаз, йынбжьагIвыз атакIыгIв ЧхвотIуа Октай. – Ауи унашва зхъицIуз ахIаракьатчпара хъата щардала йалата йауацIыхын. Айсра апхъала, Апсны абзазагIвчва йапхъахауата йангIарабадыр, ауи атрыкв хIаракьатчпагIвчва – апсыуаква, адгьаква – адикIылын «Нарташ» фирма гIанйыршатI. Ари афирма амальквала ауат Апсны йгIатаргатI йапхъахуз акапитал. Ауи атлахан Ирфан йапхъахауата Апсны дгIайтI, ауи асквш 1990 агIан акIвын. Ауат Апсны гвыгъара ду азрыман йтанхарныс ртахъыта, ауаса уадыргIвана айсра гIалагатI (Апсны ауагIа р-Абашта айсра – аредакция ррытаразга), аблокада гIаншатI, йгIаджвыквырцIаз анхарагьи тшгьауацIнамхтI».
Ауаса Аргвын Ирфан ахIаракьатра ахъаз далата гьакIвмызтI дшаъаз: ауи Апсны дырцхърагIарныс злайылшуз хъахIарагьи йыман, йажвагьи алсуан. Аратква ракIвын сквшкъомкI руацIа Ирфан дахIврала дыздынхалуаз: ауи швабыж йтахъын йпсадгьыл сабап азгIайгырныс йгьи заджвы дйапшымкIва хъвдаквыщт ду гIайырбауата ауыс йзынардзун. «Ауи ахъаз йыззшу дгьхIаракьатчпагIвмызтI – ауи апсыуа цIасла, «апсуара» злазкIуата йгIадзынгылыз дгIвычIвгIвысын, – йгIайгвалашвахитI ЧхвотIуа Октай. – Ауи йхIальла дбагъьан, рахIагьи йпIатIу щтIызхуаз аткIьира ангIайырбузгьи гIаншун».
Аратква зымгIва адукIылхырквын рмагIны швабыж йхIагIата, ЧхвотIуа Октай йшипхьадзауала, айсра гIаламгаскIва Аргвын Ирфан Трыквшта апны Ардзынба Владислав йазалху хъвдаквцIара зквнайыргаз ахыгIв дрыуазаджвхатI. «Ауат ахыгIв, йара, Цушба Атаи йгьи Гогуа Чингиз ацыта, Трыквшта апны йазалху хъвдаквцIара нкъвыргун: ауат адиаспора пIатIу ду зквырцIуз, кърар ззрымаз гIвычIвгIвысын», – йхIвитI Октай.
Апсны йацкIра: йъанатIаламкIва - йщала
Асквш 1992 агIан Апсны апны айсра ангIаджвыквыл Аргвын Ирфан Трыквшта апны Апсны рцхърагIара знархараз КIавкIаз-апсыуа комитет агIаныршагIвчва дрыуазаджвын. Апхъапхъадза акомитет дахъадахатI Цушба Атаи, Аргвын Октай ауи йтарагылагIвчва дрыуан, йащтагIайуата ахъадара йыквшватI Ардзынба Джемалеттин, уадыргIвана 16 сквша руацIа акомитет унашва ахъицIатI Аргвын Ирфан.
«Акомитет мурад заджвыкI архъйауата зымгIвалагьи Апсны йырцхърагIун – политика амальла, дипломатия амальла, ахIаракьатчпара анархарала, арепатриация ауысла. Датшата йухIвушызтын, Апсны йапщылаз ауысква зымгIва йалкIгIата ари акомитет ракIвын йзырхъйуз. Ирфан ауи шабгу унашва рхъицIауата йадигалуан», – йхIвитI ЧхвотIуа.
Аргвын Ирфан щардала дгIайуан Апсны, Апсны йгьи адиаспора руысква знархараз аконференцияква дгIарыдгылуан, акомитет дъахъадаз гIапхьадзахауата йызнымкIва апсыуа-абаза уагIа райззара дуква дрылан.
«Йгьымцхарым акомитет анхара апроцент 80 йара Ирфан йхъатала йшйырхъйуз схIварыквын, – йгIаликIгIитI ЧхвотIуа Октай. – Ауи йаццауата анхара ащардагьи акврыдзраквагьи абгата йара йнайахвлун. Акомитет ракврыдзраква райхIара Аргвын Ирфан йхъатачIв хъахIара йгIалихуанта йалайцIун, адиаспора анахьанат ауысхагIвчва йаларцIуз ахьахьла».
ЧхвотIуа Октай йшгIайгвалашвахуала, Аргвын «Апсны ахьыз злаз ауысква зымгIвагьи дрылалуан». ЙъанатIа йырхъйауата гьакIвмызтI, йщала, дгIазхъшахъыцIыз рахькIьала йборчта йпхьадзун.
«Ауи Апсны йцаныс зтахъыз зымгIва дырцхърагIун, Трыквшта йгIайуаз зымгIва дырпылуан: ажурналистква, апхьахьаква, арыла айъазара, апхьара агьи йхIщтиуаз ауагIа зымгIвагьи (Апсныла йтыцIта – аредакция ррытаразга). Сшхъвыцуала, уыскIгьи, гIаншаракIгьи гьаъамызтI ауи йымдыруата, дацымхърагIауата. Ауат ауысква йырхъйун акомитет апны, ауаса ауи йахъазымкIва йара Ирфангьи йхIальын ауатква: ауи йгIаншауа зымгIва йдырра атахъын, йатахъхузтын дацхърагIун».
ЧхвотIуа Октай араса йхIвитI багъьата: Апсны ахъазла Аргвын йырхъйаз ауысква, йгIанйыршуз ацхърагIара йрыуата йдыруа гьщардам – Ирфан нхарата йакIвйыршуз гIвыната йамаз заджвгьи йгьйымдыруазтI, йхъатала зынгьи дгьаламчважвузтI, тшгьалаймыртшхъвузтI.
ЙгвашIаз йгьи йгвыпшказ
ДхъацIа алыхын, дхIагIан, йабадучва рпсадгьыл ауысква рырхъйара апны дайрышын, акъральыгIва уыснкъвгагIвчва рпны йажва рейшан, йъанатIа йа йхIаракьат уысква дрылхъвдахапIхIва дгьымшвузтI – абараса акIвын дшаъаз Аргвын Ирфан, аргваныта дыздыруаз зымгIвагьи йшырхIвахуала.
ЧхвотIуа Октай багъьата йхIвитI: ауи Апсны къральыгIва аполитика йапырасуаш уыскIгьи архъйара зынгьи дгьадымгылуашызтI.
«Ирфан йхътIыта дрызгылан хIкъральыгIва ахвитнагIаква атрыкв къральыгIва уысхагIвчва рпахь – апрезидент, апремьер, аминистрква. Апсны агIальаматраква ргIахчара ауысла ауи багъьарата, айрышрата йгIайырбуз уахьчIвала щардагIвы рыхъазла йшвапхапI. ЙаъапI апротоколква, архив швъаква, ауат зымгIва рхъвых йауаштI. Ауат гIахъыртIрыквын зымгIва рпны йбергьыльхуштI Апсны ахъазла ауи уыста йчпадзуз, апсыуарата йынкъвигуз, дшпатриотыз, айхIа схIвапIта – дшфырыз».
Абари афыр – йайрышыз, йткIьийыз йылубгIауата дгвыпшкахун, дтIатIахун Апсны апны йцри шIыпIаква, Анхуа кыт рунашва ауатыкв йангIаталрыз.
«Апсны агIархвитхра ахъазла зхъа щтIазцIаз рхабарква данрыздзыргIвуаз йыладз гIахъагылуан, йгвы дрыпшкун хIара щцалрата йхIзалхьу агIаншаракванадзара. ХIара, хIпсадгьыл йазгIацапахкваз, йапхъахауата хIабадучва рчIвыла аныгIба патриот лахIвара мчыта йхIзыгIацIсыз азакIын. Ауаса Аргвын Ирфан заджвгьи дгьйапшымызтI, ари ахъацIа мчхъа йыхъазла Апсны лкIгIара ду зму дунейын, рахIа йпшдзу алахIвараква йыртыпын, йаргьи йбзазара, йуысква шабгула ауи йырцIабыргауата дгIамгIвайстI».
«ХIпны» – зымгIва датшадзапI
ЧхвотIуа Октай йшгIаликIгIауала, Ирфани йари адызкIылуаз рхъвыцщи ргвыгъаракви азакIын, ауат зымгIва «Апсны йапщылан».
«Трыквшта санцарыз, йара араъа дангIайрыз хIанйалун, – йхIвитI Октай. – ЙцIыхъвахуз асквшква Ирфан йзгIвадара швабыж йщаквыстI, йызнымкIва аркъьара йхъыстI, уадыргIвана хIпныла дгьызгIамихтI. ДъазгIамихуаз швабыжта йылсуан, Апсны гIайгвалашвун. Трыквштала телефон дсызгIаслун мышкIы агIвсырквын йгIвымшкIхауа».
ЧхвотIуа йшгIайгвалашвахуала, ареспублика аъаща, ашIыцраква йрылачважвауата, рдырква гIаргвалашвахуата Ирфани йари телефонла «цIабыргыта сахIатпхьадзара» йзайчважвун. Ауи бзи йбун Апсны далачважварныс.
«ЙгIаншун дангIасыхIвуз Трыквшта йпссгIауа заджвы йыстта йсыргарныс апсыуа уагIахъа фачIвква. Ауат Трыквшта апны йырзыммацIауата гьакIвмызтI, ауаса «хIпны» йырмацIауаз афачIвква рхъгIара датшата йпхьадзун. Йари сари хIанбжьагIвын, кърар хIызбжьан. ПIатIу ду йыквсцIун, йара уыжвгьи, ауи данхIылахым, щардала дгIасгвалашвахитI, йгIасгвалашвахитI хIайчважвараквагьи», – йхIвитI ЧхвотIуа Октай.
Аргвын Ирфан асквш 2016 август а 27 атшын адуней йхIваджьтI. Ауи йцри къала Дюздже апны йчIвылахъв йаухтI. Йпсхъа аннардасуаз йгIайззатI адиаспора ауысхагIвчва дуква, Апсны ащтийыгIвчва гвып дырхъадан репатриация ауысла акъральыгIва комитет аунашвачпагIв Харазиа Вадим.
Аргвын Ирфан йпа Мурати йпхIа Севдеи йызнымкIва йсасхьатI Апсны апны йгьи апсыуа къральгIвра нкъвыргитI.
швталра йа тшаншвцIара атахъыпI.