Москва апсуа диаспора гуманитар цхърагIарата йадыркIылыз тонн 20 йнадзауа афачIв пкъыгIваква Апсны йгIадзатI.
Москва апсуа диаспора гуманитар цхърагIарата йадыркIылыз фачIв пкъыгIва тонн 20 апандемия COVID-19 аъаща йташваз Апсны йгIаргтI. АцхърагIара адгалра гIаджвыквызцIаз Москва апсуа диаспора ахъада Агрба Беслан йакIвпI. АцхърагIара хIатлара прунджьта 13 тоннкI, гречкIата 7 тоннкI йнадзитI.
МАД архъйагIв директор Барганджиа Даур йшихIвазла, Москва апсуа диаспора Апсны апны акоронавирус шIкIгIара ангIаджвыквылбырг йгIашIарышвта ауысква шцауа дырхъвыхитI.
«Щарда хIымхъвыцуата амедицина пкъыгIваква йырхъазымкIва (Москва апсуа диаспори «ХIара хIадгылтI» мгIвайсри рыцIа паса акоронавирус абакIра знархараз айъазара гуманитар цхърагIара адыргалтI – аредакция ррытаразга) афачIв пкъыгIваквагьи нахIщтийырныс йщаквхIыргылтI», – йхIватI МАД архъйагIв директор.
Ауыс гIамта айшысла хIалачважван йщаквхIыргылтI. Уыжвласыла Россия Федерация атшыгIвралыцIква ртгара хабзала йашIаркIырныс амальква ъанарахвуаш ашвхIаусыгIвала афачIв хIатлара тамщахIахауата йаущтра атахъын, йгIахIгвынйыргIвытI Барганджиа Даур.
«Мистраль-Алко» компания (Апсны ачагIырква рэксклюзив дистрибьютор, Россия Федерация ажвчIв пкъыгIваква гIатазгауа анхарта пхатшаква йрыуазакIу, акомпания дахъадапI Агрба Беслан – аредакция ррытаразга) ахIатлара адгалра акврыдзраква зымгIва нанауахвтI, МАД адгалра уысква дырхъйан ауи Апсны йнахIырдзатI», – йхIватI МАД ауысхагIв.
Ауи йшихIвазла, афачIвпкъыгIваква цхърагIара йазыбжу абзазагIвчва йырхъазымкIва айъазара нхартаквагьи йырзыршуштI: ареспублика чымазагIвтара, АжвчIвква ртдзы, КБРЦ (Абашта айсра аветеранква йырзалху ареабилитация квта – аредакция ррытаразга), апсихоневрология диспансер, асаби чымазагIвтараква, арайон сабийыртаква, ауасамцара.
Барганджиа Дауыр йгIацицIахтI МАД «гватшныта ареспублика зтагылу аъаща» йашIамсуа йшдырхъвыхуа.
«ХIара апхъахьылагьи йшхIылшауа апшта цхърагIара адагIгалуаштI», – йхIватI ауи.
АбзазагIвчва ацхърагIара рылазшуш агвчIагIвчпара адкIылара «Кьараз» акIвпI. Ауи аунашвачпагIв Аргвын Кадыр йшгIайхIвазла, тгIачва 2000 райхIа йырцхърагIуштI.
«Йбылуа» алиния нхитI, телефон йхIызгIасуа, цхърагIара йахIвауа рыхьызква ашвъа йанхIцIитI. Телефон йгIасуа щардагIвыпI, хIгватра рыцIа йыззынахIырхауа йнаскIьахьата зхъазы йбзазауа атажв-лыгажвква, асабитгIачваква, чымазагIв ныкъвадыкъва нкъвызгауа атгIачваква ракIвпI», – йгIахIгвынйыргIвытI Аргвын.
ЙшихIвазла, тгIачвипхьадзара йрыквшвуштI прунджь 5-10 килограммкIи гречкIа 3-7 килограммкIи. АтгIачваква арыгъгъ пкъыгIваква йырхъазымкIва датша фачIвгьи рзыршуштI.
«Арыгъгъ пкъыгIваква щардата йрыцырцIуштI хшбахи фачыгIви, датшата йухIвушызтын цхърагIара йазыбжу атгIачваква рщымтачара йнардзата хымызкI йшрызхъуш апшта йадыгIгалитI. «Мистраль» компания йгIарщтийыз арыгъгъ пкъыгIваква афачIв кIлат йащатапI. ХIара ауат йрыцхIцIитI шыла, макIарон, гIайыра масла, кIартIоф, швхы, джьымщы, къвыд, датшагьи. Ауат шалу атгIачва мызкIы йрызхъуш фачIвыта йыхIпхьадзитI», – йхIватI агвчIагIвчпара адкIылара ахъада.
Ауи швабыж дшырзыразу йхIватI агуманитар цхърагIара адгалагIвчва. АфачIвква ршумцара тара кIьыда йъатарцIауа джьгарта йырцхърагIитI Адуней апсуа-абаза конгресс апхIвысква рсоветква йрылу ахIвсса.
«ХIара АААК хIалищтара йцIуа гьсквшыкIым, йгьгIвысквшам, апхIвысква рсовет акцияква зымгIвагьи джьгарта хIрылапI. Абар уыжвгьи азгIва ашварагIварара ашвхIаусыгIвала абзазагIвчва баргвыра йанашIашва хъатакIла хIгьгIанымхатI. ХIунашвачпагIв Ардзынба Гета Москва даъазтынгьи хIынхара шакIвшауа дахъпшылитI.
АуагIа хIырцхърагIуштI, карантин шщаквгылугьи сабап шгIагIгуаш хIащтапI. Амаскаква, анапIтараква йшатахъу апшта йынкъвыгIгитI», – лхIватI ауысква шагвындыргIвуа йауацIыхта далачважвауа АААК АпхIвысква рсоветква йрылу Когониа Людмила.
Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 55 раъара.
Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.
швталра йа тшаншвцIара атахъыпI.