Акоронавирус абакIра апны май мыз зымгIва рацкIыс йхьантахуш гIамтапI, йхIватI апресс-конференция апны Апсны азгIвадарахчара аминистерства ахъада Цахнакиа Тамаз.
Акоронавирус абакIра апны Апсны ахъазла зымгIва рацкIыс йхьантахуш гIамтапI йгIаталуа май мыз, араса йпхьадзитI Апсны азгIвадарахчара аминистр, акоронавирус шIкIгIара абакIра ауысла акъральыгIва штаб ахъада Цахнакиа Тамаз. Араса йгIайхIватI ауи ахаша апрель а 22 атшын йакIвшаз апресс-конференция апны.
Ауи йаццауата аминистр йшихIвазла, акъраль ауацIа аъаща рхъвыххауата йымгIвайсуазтын, агIапын ацIыхъвадза ахъаркIьыдара бзазаща багъьата йымгIвайсырквын, «абаргвыра дуква гIанымшарныс ауаштI».
«УахьчIвала Апсны апны ауыс аъаща уарыразуата йымгIвайситI», – йгIацицIахтI Цахнакиа Тамаз.
Ауи йатайхIвахтI ареспублика апны апхъала апшта ашIакIра амальква шщаквгылу.
«Сара йатаркIвах йгIалскIгIитI ахъаркIьыдара бзазаща. УахьчIвала хIара чымазагIвта йхIымаз хгIвы йъанадзуз, ауат йрыуу азаджв дбзихахта дъацIгIыгIвгIахыз йгьгIаныцIуам хIбальарыгъуашта. ХIара хIгватшныта йхIырхъвыхитI адуней апынгьи йхIыгвлу акъральква рпынгьи аэпидемиология аъаща шымгIвайсуа. Ауат рпны аъаща швабыж йшмайрам хIгвы йасуата йыгIбитI», – йхIватI Цахнакиа.
АшIакIра амальква шынхауа
Апсны апны мартI ацIыхъва йгIашIарышвта апрель а 20-дза къральыгIва унашвала ГвжважвагIва аъаща щаквгылан. Ужвы ауи аъаща нырххтI. Ауаса акъраль аунашвачпагIвчва абзазагIвчва аквгIазшIыртитI ахъаркIьыдара амальква йапымшвтуата йынкъвыргарныс.
Датшагьи щаквыргылра нарахвтI Гагра йгьи Гал районква рпны комендант сахIат нырххырныс. Апсны акъалаква зымгIва рпынгьи аквта базарква рынхара джвыквырцIахтI, ауат мчбжьыкI апны хымшкI йтIызлуштI. Апхъала апшта йаркIыркIвапI апхьартаква, асабигIзартаква, ауниверситет. Ажвлара транспортгьи гьынхум.
Россия йгIарщтийыз ацхърагIара
Апрель а 18 атшын акоронавирус абакIра ауысла Апсны йацхърагIарныс йгIайтI Россия а-Черномор флот йаланакIуа арадиация, ахимия йгьи абиология къвырльыкъвхагIвчва гвыпква. Ауи ауысла Апсны апрезидент йхъвдаквцIараква зырхъйауа Бганба Валерий Апсны апны йаныргIалу РФ акIьыкIварта ауысхагIвчвагьи Гвдауыта йтагылу Россия ахъыхчара министерства архъв агIащтийыгIвчвагьи дрынйатI.
«Кьангьаш аламкIва Апсны апны акоронавирус ауысла аъаща акъральыгIва аунашвачпагIвчва йшдырхъвыхуа жвдыритI. ХIара йнахIахвыз амальква тIакIв йгIахIырльальатI, Гал йгьи Гагра районква рпны акомендант сахIат ныхIххтI. ЙчмазагIвхаз йрыщтаныкъвуз зымгIвагьи гIахIрыбергьыльтI, йхIыркIьыдатI. Абгата йгIауахвырквын аъаща уарыразитI. Абазар анхара йабгамкIва йатаджвыквылхтI», – йхIватI анйара апны Бганба Валерий.
Датшагьи ауи йшгIаликIгIазла, анхартаква рызбжа, абазарква рынхара ъатаджвыквырцIахыз ахъазла адезинфекция уысква рырхъйарала Россия ацхърагIара йакьазута йгIайтI.
Аоперштаб ахабарква
АуагIа акоронавирус шIкIгIара ачвхъыхчара знархару аоперштаб йшгIархIвазла, асквш 1925 ййыта апхъала йчмазагIвхаз абзазагIв уахьчIвала Гвдауыта ачымазагIвтара дыцIапI, ауи лаъаща хьантата йырпхьадзитI. Арахьарат агIвыджь бзихахтI. Азаджв ачымазагIвтара даъаркIвата айъазагIвчва йхъпшылитI, йгIвыджьхауа йунагIва дадгылхтI.
Апсны апны ГвжважвагIва аъаща щаквдыргылищтара коронавирус шIкIгIара агIарыбергьыльра йазынархата 200-гIв райхIа атестква йырхъыстI.
Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 55 раъара.
Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.
швталра йа тшаншвцIара атахъыпI.