ПIатIу зквыз АААК апрезидент Шамба Тарас йхъмаштылгата а-Конгресс асквш 30 йазынарху алалраква анакIвшауа амшква рагIан СогIвым апны чвахъабага син гIахъартIытI.
ПIатIу зквыз АААК апрезидент, Апсни России рпны жвлара-политика уыс нкъвызгуз Шамба Тарас йчвахъабага син агIахътIра йазынархаз айззара СогIвым апны ахаша, декабрь а 7 йакIвшатI.
Воронови Дбари рурамква ъалысуа апны йаныргIалу, СогIвым абзазагIвчва «ЛокI»-хIва йызпхьауа апарк апны йдыргылыз ахъмаштылга гIахъыртIытI Апсны Республика а-Президент Бжаниа Аслани АААК ЙхIаракIу асовет аунашвачпагIв Эгьзакь Мусси. Асин лчпатI Чачба Александр йыхьыз зхъу СгIвым агвацчпа квтанай ъачIвагIагIацIгарта апхьарта йгIалгата ауаъа арыпхьагIвта йынхауа Юлина Аврора.
Айззара апны ауагIа йгIарылархIватI ужвы йнанаркIыта ауи апарк Шамба Тарас Мирон йпа йыхьыз шахъызлуш.
Шамба Тарас ужвы Адуней апсуа-абаза Конгресста йырчпахыз Апсуа-абаза уагIахъа р-Дуней адкIылара (МАААН) йапхъахуз даунашвачпагIвын, сквш 25 ауи дахъадзгылан.
Асин ъагIахъыртIуаз йгIадгылтI Апсны Республика ажвлара йгьи аполитика уыснкъвгагIвчва, аршIыйара интеллигенция йрыуу, Шамба йъачIвагIалагIвчви йыгIвзачви.
Эгьзакь Мусса Адуней апсуа-абаза конгресс ащаквгылри абаза уагIа радкIылри рпны Шамба Тарас уыста йхаз магIын ду шаму гIаликIгIатI. АААК ЙхIаракIу асовет аунашвачпагIв йшихIвазла, аорганизация пIатIу зквыз апрезидент ауасаражври апатриотизми дыршвапхан.
«Сайщчва, сахщчва тлапIаква, уахьчIва хIара хвы зквцIауачву агIаншара хIашахIатпI. ХIара зпсадгьыли зуагIахъи рзынхара зпхыцIахаз, нцIра уыста йыззалыз агIвычIвгIвыс ду чвахъабага син йзыгIахъхIтIитI. Сквш 25 руацIа ауи Адуней апсуа-абаза конгресс унашва ахъицIун – йабашталагIвчва рбзазара шагъьхуш дазынхауата. Са схъа ду йызбахитI Апсны ауагIа рпа дудздза съайабадыруаз, съайыцынхуз», – йхIватI Эгьзакь Мусса.
АААК ЙхIаракIу асовет йалу Кобахиа Беслан Шамба Тарас йчвахъабага син Адуней апсуа-абаза конгресс VIII Айззараду анхара анджвыквнацIауа амш йъагIахъыртIуа магIын кIьыдакI алибгIатI. Ауи йшихIвазла, адкIылара йапхъахуз апрезидент абаза уагIа дырпатриотын, дапхьахьа, дыжвлара уысхагIв дудздзан.
«Шамба Тарас а-Конгресс зтшын йгIаншаз йгIашIарышвта дахъадзгылан. Ауи адуней шабгу йбзазауа апсуакви абазакви адикIылуата уыс ду йхатI: адкIылара ауи унашва ъадзахъицIуз къраль 52 рпны йбзазауа хIабашталагIвчва а-Конгресс ахабар рдыртI. УахьчIва Адуней апсуа-абаза конгресс сквш 30 ахъыцIитI, Шамба Тарас Мирон йпа йуысгьи мгIвайсыркIвитI», – йгIаликIгIатI Кобахиа.
Апсны АшварагIварадара Совет асекретарь Шамба Сергей йащахIба црийыз йгьи йбжьагIвыз дгIайгвалашвахуата Тарас Мирон йпа йынцIра шабгаз абаза уагIа дшырзынхаз йхIватI.
«ДстудентыркIвата, асквш 1958 агIан, Тарас Москва апсуа диаспора адикIылын сквшбзидздза унашва ахъицIун. Йынхара шабгаз ззынархаз хIара хIзахвата хIхъахвитра хIшазабакIуа адуней зымгIва йхъадйырцIарныс акIвын. УахьчIва ауи хIкъральыгIва ащаквгылра апны йалацIара йаквнагауа хвы аквырцIатI», – йажва алйыргатI Шамба Сергей.
Шамба Тарас йыцынхаз, йыгIвзаз асасчвагьи ргIагвалашвахраква йгIайззаз йрыцагIвыршун, пIатIу зквыз АААК апрезидент йбзазара апны дызквымцIуата дызквгылаз йхъвыцщаква, ймурадква йрылачважвун.
АуысагIв, ажвлара уыснкъвгагIв Аламиа Геннадий Шамба Тарас дйыгIвзан, сквшщарда дйыцынхатI. Ауат йацыта арат асквшква зымгIва МАААН апны йынхун. Аламиа адкIылара дасекретарь хъадан. Ауи йгIагвалашвахраква пхата ауагIа рлымхIаква йыртасуан.
«Тарас адуней йагIвыната дъанызлакIгьи йгвы йанакIвызлакIгьи Апсны йаъан. Ауи йанакIвызлакIгьи й-Псадгьыл йгвы йтан. ЗныкI ауи йаба Шамба Мирон Тарас Апсны дакъвгата амаль шамам гIасайхIвтI. Сара зымгIвагьи йыжвгIауата йшвасхIвитI: ауи й-Псадгьыл зынгьи йгьнимыжьтI, йынцIра шабгаз ауи дацбзазун. УыжвгIанчIви Апсны Тарас даламкIва уыла йгьуызгIацIажьуашым», – йажва найырдзатI Аламиа Геннадий.
РыцIа щажьыта, декабрь а 7 ащымта, ЙхIаракIу асовет аунашвачпагIви АААК ауысхагIвчви датшагьи чвахъабагакIгьи – асквшква 1992-1993 рагIан йакIвшаз Апсны ауагIа р-Абашта айсра йаладзкваз рхъмаштылга син – хIврапшдза азыщтIарцIатI.
АААК ЙхIаракIу асовет аунашвачпагIв, йбергьльу ажвлара йгьи акъральыгIва уыснкъвгагIв, абзихагIв Эгьзакь Мусса ари асахIат Апсны даъапI, Адуней апсуа-абаза конгресс VIII Айззара ду йапщылу ауысква дрылапI. Ауат ауысква йрыуапI йапшым акъральыгIва, ажвлара уыснкъвгагIвчва, ауагIа гвыпква рынйараква. Айззараду СогIвым апны декабрь а 7-8 агIан йакIвшуштI.
Йбергьльу апсуа йгьи россия жвлара-политика уыснкъвгагIв Шамба Тарас Абаза-апсуа (абаза) уагIахъа р-Дуней конгресс сквш 25 унашва ахъицIатI, адуней шабгу апны адиаспора йрыуу хIуагIа радкIылра апны уыс дудздза йхатI. Ауи йнапIы акъральыгIвара, ахабзанкъвгари ахабзахчари йырзынарху наука нхара 300 райхIа гIацIцIтI. Асквш 2018 агIан ауи «апсуа къральыгIвара тшауацIнарыхра, КIавкIаз ауагIахъаква рабадырра рыбагъьара къару ду ъарылайцIаз йгьи сквшщарда анхара йъайтыз ахъазла» «Ахьдз-Апша» (апсуа бызшвала «Акърари артшхъвари» – аредакция ррытаразга) орден I астепень гIайквнадыргатI. Шамба Тарас асквш 2020 агIан сквшы 83 дыртата Москва апны дпсытI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.