Абаза уагIа рпахь йгылу ахачIв хъадаква, хIыбызшвалагIвчва рапхъанчIви Псадгьыл йазгIацапахра ахъазла йчпачIву, аэтнос атшауацIнарыхра знархару апрограммаква руысла йинтервью швгватра азынахIырхитI Адуней апсуа-абаза конгресс ЙхIаракIу асовет аунашвачпагIв, Абаза-апсуа уагIахъа ртшауацIыхра ацхърагIара знархару Адуней адкIылара «Алашара» апрезидент Эгьзакь Мусса.
Айчважвара акIвлыршатI Ардзынба Аста.
– Уымш бзита, Мусса ХIабальа йпа! Йапхъахауа сазцIгIара ззынарху ари акIвпI: уахьчIвала апсуа-абаза уагIахъа рпахь йгIаншаз архъвыхра дуква хIышпарылсра атахъыйа? Амальта йнахвчIвйа, йчпачIвыйа хIэтнос тшауацIнахуа ймгIвайсырныс ахъазла?
– ХIара зымгIвагьи датшата хIзайчважвауа, хIзыдзыргIвуа, хIзагвынгIвуа шIыц-шIыц тшазыгIбжьахра атахъыпI. ХIадкIылата йхIызгIарыбергьыльра атахъыпI йырхъйачIву ахачIвква, ауат ахачIвква рырхъйарала йнахвчIву амальква. Араъа магIны амапI зымгIвагьи йгIахIгвынгIвуа бызшвакIла хIчважварныс, хIштгIачвакIу гIахIгвынгIвуата хIазазаъахарныс, хIыуа дзачIвызлакIгьи йдырырныс йара йхъауыс, йхъвыцраква, йажваква, йырхъазымкIва, йаргванква рыхъазлагьи джьауап шикIуа. ХIтгIачва рыуа заджвы йызниуа, дзынйауа арахьарат гвалымста тшазырчпа йгьауашым, хIыуа дзачIвызлакIгьи дазхъвыцра атахъыпI йара йхъазымкIва арахьарат зымгIвагьи рбзазара шбзийызлуш.
ХIара хIуагIахъа тгIачва дукIта акIвпI сара йшызбауа, атгIачва рпны заджвгьи дгьгIвымам!
– Абзазара апны ауи хIшпазгIайра атахъыйа?
– Лагъь КIавкIаз апны хIара швапха бзи хIымапI. ЙаразакIы зны йхIва йауаштI, йгIванхауа йухIварныс сабап гьалам. ЙзачIв ажвазлакIгьи уыс ащтагIайра атахъыпI. Ауысква йырнархарата апрограммаква лыхIхитI, ауат рырхъйара тшгIадызкIылуа хIуагIа рыцIа-рыцIа йшщардахуш хIащтапI.
Швапхата йгIазгпI хвысквша рапхъала гврыдзгала збзазара рчвыз кыткI – ажвра ъащардаз, ауагIа рылапшква ъамцыраз, йчпачIву заджвгьи йъайымдыруаз, адгьыл шварахъвала йъацIакIыз. ГвырбзигакIгьи гьаъадзамызтI. УахьчIвала акыт абзазагIвчва гIвыджь гIахIахвырквын азаджв йбизнес-план йымапI, абзазагIвчва дара-дара акыт аурамква дырчIаджьтI, парк гIандыршатI, Акультура тдзы дырчIаджьхтI. ГIвысквша-хысквша рапхъала адгьыл йадынхалуаз мачIгIвын, ужвы араъа йызднымхалуа адгьыл гьубахуам. АуагIа тшгIащтIырхын йынхауа йалагатI.
– ЙачIвыйа згвы ыдзыз ауагIа рдунейпшыща злапсах йауашта йаъу? Агврыдзра йалцIта ауагIа бзазара гIальамат йшпаззцуш?
– ХIара апхIвысквагьи ахIбачвагьи рыжвлараква гIанхIыршатI. Къарча-Черкес апны йаъапI быжьсквша цIуата аэтнос ргIахчари ртшауацIыхри знархару апрограммала йынхауа «Алашара» адкIылара. АдкIылара апны йапшым анархартаквала аунашвачпагIвчва нхитI - чкIвынргIа руысла акIвызтынгьи, атгIачви асабикви, аспорт, азгIвадарахчара, арыпхьара уысквала ракIвызтынгьи. Анархарта унашвачпагIвчва йагъьу аъачIвагIагIвчвала йалу аэксперт советква гIандыршитI. ХIацацхърагIумцара йырхъйачIву ауысква гIахIрыбергьльитI, апрограмма йалахIцIитI, уадыргIвана абзазара йацалагIжьитI. Абараса хIынхитI быжьсквша цIуата.
ЦIыпх хIара абаза жвлараква йара организациякI апны йадхIкIылтI, ауи «Апсадгьыл» ахьызпI. ТгIачвакI рапшта йацахъуа «Апсадгьыл» хIпрограммаква абзазара йаларжьитI. Апрограммаква йауацIыхта хIрыдынхалитI, кытипхьадза рыхъазла кIьыдата, абзазагIвчвагьи анхара йгIалалуата. Дара абзазагIвчва рагъь гIвымакIгьи йгьидырам акытква руыс зкву. Апрограмма хIанадынхалуа акыт къарута йрымугьи гIахIпхьадзитI – акъыльла, млыквла, датшала. ЙащтагIайуата акыт абзазагIвчва ауыс йызлацхърагIуш лшарата йрыму хIырхъвыхитI. Акыт абюджет анхIпхьадзауа йгIахIрыбергьльитI арайон, ареспублика, афедерал квта ртланыкъвалагьи ауи ахчата йазалху.
– Ауи ажвлара нхара азазаъащата йазрымайа атачIв къральыгIва уысхартаква?
– АкъральыгIва уысхартаква гвынгIвыра цIола гIадырбауата йхIзаъапI. Ауи хIара хIыхъазла магIны ду амапI. Уызуу ареспублика акIвызтынгьи заджвгьи закIгьи йумырдыруата ахъаз угIайта, ауагIа азукIкIыта, закI гIаргвынуыргIвырныс уалагауа – ауатква гьангIалуам. Апхъапхъа хIара культура, спорт, анахьанат анархартаквала йлырххьу ареспублика программаква тшрыхахIыргIвазитI. Ауат апрограммакви хIара хIчIвкви шаццуш апшта хIрыдынхалитI, уадыргIвана, абзазара йаналагIыжьуа, ацынхара хъгалрата йаму ауагIа йшырбуш апшта.
– «Алашара» адкIылара ашвапха йгIахъыхта Адуней апсуа-абаза конгресс анхара апны йгIарысабап йауаш ачIвыйа?
– ХIара АААК аустав апкъ йтата хIуагIа ъабзазауа ашIыпIаква рпны атачIв хъвшараква гIанхIыршара атахъыпI, ауат рцхърагIарала АААК атланыкъвала йлыххауа апрограммаква абзазара йалагIыжьуаштI. СынчIва асквш аурала адиаспора рыхъазла апрограммаква хIрыдынхалуаштI: къральипхьадза, штипхьадза – кIьыда-кIьыда. ГвынгIвырапI йъакIвызлакIгьи дара ркъральыгIва хабзаква шщаквгылу, ауат йгIархIвауа ажванахъаква йрыквыргIапста хIынхара адыгIгалуаштI.
Ауи акIвымкIва гватра азыхIчпалуштI агIвымакъральква рпны йгIаджвыквхIцIауа ауысква рырхъйара ауаъа йбзазауа хIабашталагIвчва шазыхIазыру. Архъвыхраква акIвхIыршауамцара ауат ргIарбараквала хачIвыта йгылу рыдынхалрала амальква гIахIрахуштI.
– Йзапш хачIв хъадаквайа АААК здынхалра атахъу?
– Йхъаду ахачIвква пщба йнадзитI. Йапхъахауата, хIабашталагIвчва йъанызлакIгьи йгIаута хIынхара йгIадкIылра атахъыпI. ЙгIвбахауата, къарута йхIыму адхIкIылта хIуагIахъа пхьадзара йалахIара акIвымкIва йшалымдзгIушла амальква нахIахвуаштI. Ауи йаццауата ахIаракьатра йалу хIуагIа адкIылра атахъыпI, лшарата йхIыму шхIызгIарыбергьыльуаш апшта. ЙцIыхъвахауата, Апсны къральыгIва агIахчари атшауацIнарыхри анархарата йалачпу апрограмма хIадынхалра атахъыпI.
Адунейла хIаракьат къарута йхIыму адхIкIылта хIацынхуштI Апсны анархартаква зымгIвалагьи джьгарта штшауацIнахуаш апшта. Араса акIвпI хIайщчви хIахщчви дара-дара рапхъанчIви Псадгьыл йазгIайхырныс рылшауата амаль шхIзыгIаныршуш. Апсны апны апсуаква рхъазы ауи гьрылшушым, зымгIва хIацIагылата хIацынхуштI, йшпакIву ухIварыквын ауи зымгIвагьи йацхIпсадгьылпI. ХIара хIкъраль хвыц зылшара дуу къральта йхIчпара атахъыпI, ауи ауысла хъгалрата йаъу щардадзапI.
швталра йа тшаншвцIара атахъыпI.