АкъральыгIва йгьи ажвлара уыснкъвгагIв, абзихагIв, Адуней апсуа-абаза конгресс ЙхIаракIу асовет аунашвачпагIв Эгьзакь Мусса йгIаджвыквицIаз агуманитар проект апкъ йтата Донецк УагIа Республика йауу жвибжьыгIв апхьагIвчва Алагъь къала хъада йгIайтI. Йшалу йгIауахвырквын Санкт-Петербург Донбасс йауата саби 300-гIв райхIа гIаргра ргвыгъапI.
Агвып ргIайра цIыпх декабрь агIан йыззгIайыз ангIалраква рырхъйара йахъвыкIпI. Ауи агIан Донецк апны Эгьзакь й-Фонд, Чернобай Денис зыхьызла ауыс йырхъйуз ДНР апны «АпхъагылагIвчва рымгIвайсра» ашта хъвшара йгьи ДНР а-Фыр, «Йшвыру адивизия» аунашвачпагIв АгIвдза Ахра дызхIвачIвгIвыз «Единая Россия» партия ацIагылагIвчва Рышта Совет аххъатакI рангIалра мачвы ацIарцIатI.
Ари адкIылара йамурад хъадахатI Донбасс асабикви чкIвыныргIи хъатата йаъу зымгIвала цхърагIара рзыгIаныршара йгьи Россия аштаква арыпхьарали культурали рабадырраква рыбагъьара.
Асасчва шIаква йалачпу культура-арыпхьара программа рыздрыхIазыртI. МшквакI руацIа ауат Санкт-Петербург апшдзараква йырпшытI, АкъральыгIва Эрмитаж, Планетарий № 1, «Гранд Макет Россия» музей йаъан, Кронштадт апны йамдауата Атенгьыз Никольск кьльиси Константин форти йырпшытI.
ЙалкIгIу гватра азалхын адырраква йырзынархаз ахъвы. ЧкIвыныргIа Санкт-Петербург политехника университет а-Турых-техника музей йцан аинженер наука атурыхи ауыжвгIанчIви технологиякви тшрыхадыргIвазатI.
Асабиква йъабзазузгьи тшъапсырщузгьи «Гранд Каньон» азхIарта шта апны акIвын, йара ауаъа ауат щарда узырдыруаз агIарбартаква, «Бестиарий» музей, «Акъала аквгыла» аркъан парк йгьи акинотеатр йцатI.
АпхьагIвчва данрынйа Эгьзакь Мусса апроект хачIв хъадата йархъйауа «Донбасс апны йгIадзынгылуа абанпара хIкъраль ду алшараква рнархараква шщарду, гIвынагьи шрымам дырбара» шакIву дацIачIвагъватI.
«Петербург йхIаракIу акультура, йапхъагылу арыпхьара, анаука йгьи кIарагIаныршара йрыкъалапI, – йгIаликIгIатI Эгьзакь Мусса. – ХIара анархара йгьи алшара шIыцква швзыгIахъхIтIырныс, апроект джьащахъваква швыцхIырхъйарныс хIхIазырпI. Донбассгьи Россиягьи руачIвымш зпщылу швара швакIвпI. ХIара чкIвыныргIа рталантква абгата йырзыгIахътIра, рхъагвы аквыта рапхъала йзыпшра ахъазла къарута йхIыму хIгьрайгьдзушым».
Эгьзакь Мусса йшихIвазла, ари агIайра йлырхыз апрограмма ду йаджвыквцIагагIвацапI. Уыжвласыла датшагьи апхьагIвчва ргвыпква Санкт-Петербург йгIайуаштI, ауи акIвымкIвагьи арыпхьара йгьи культура нархара зму йапшым апроектква лырхитI.
«Санкт-Петербург а-Правительства асквш 2022 йгIашIарышвта къала-ащата йачпаз Мариуполь асабиква цхърагIара драдзарала нхара ду акIвнаршитI. Ауи азаман ауацIа саби зкьыгIвпхьадзара ртшпсщара гIамтаква Алагъь къала хъада апны йыргатI. ХIара Донбасс антахьгьыт акъалакви ашIыпIакви рсабиквагьи ртшпсщара адыгIгалуамцара ари магIын ду зму ауыс нахIырдзуштI», – йхIватI ауи.
швталра йа тшаншвцIара атахъыпI.