АхIвсса рдуней мшы йадахIвуата Адуней апсуа-абаза конгресс ЙхIаракIу асовет аунашвачпагIв апхIвысква зымгIвагьи насыпи бзазаща пшдзи рзитахъта драйхIвахIвтI.

ЙхIвахIвра апны ауи йшгIаликIгIазла, АхIвсса рдуней мшы швхIаусыгIва бзипI йатаркIвах апхIвысква зымгIвагьи пIатIу ду шрыквхIцIауа гIахIырбарныс, рпшдзари рпшкари йджьащахъву ажва гвапаквала йатахIхIвахырныс ахъазла.

«Ари агвыргъьахъв шIырпшыра амамкIва пхата йхIыртлапIитI: ауи хIанчва, хIахщчва, хIыпхIчва, хIхъапщылачва, йхIыцынхауа ахIвсса – йхIцрийу, йхIаргвану апхIвысква зымгIвагьи – йрызхIыму алахIвара бзиквали ахIврапшдзаквали йырчвыпI», – йхIватI ауи.

Эгьзакь Мусса йгIаликIгIатI ажвлара рпны ахIвсса руыс амагIны йанакIвызлакIгьи йшдуу.

«Швара швакIвпI адуней хIгIаквзыжьуа, пхарали айгвыгIврали хIкIвзыршауа, аунагIва апны атшгIва апхара гIазхчауа, асабиква гIадзынзыргылуа. Ауатква йрыццауата йшвылшитI анхара, аршIыйара йгьи ажвлара уысквагьи дахIврала йшвырхъйарныс», – йхIватI АААК ЙхIаракIу асовет аунашвачпагIв.

Ауи кIьыдата йгIаликIгIатI сабитгIачва нкъвызгауа анчва – ауат уыс щарда адыркIылуа йахъазымкIва «рпшкарагьи, рпшдзарагьи, ргвапарагьи» гьдрыдзуам.

«АпхIвысква швакIвпI абзазара зрылашарауа, гвапарала, пшдзарала, гвыгъарала йзырчвуа. ЙшвзыстахъпI зымгIвагьи анасыпи абзибари анцIрала йшвымата швбзазарныс!» – йхIватI йажва найырдзахуата Эгьзакь Мусса.

АхIвсса рдуней мшы – асквш 1975 йгIашIарышвта ансисквша мартI а 8 атшын адуней акъральква рпны апхIвысква йрымшта йдыртлапIитI.