Логуа Людмила лыхьыз йадзхъагылата лбзазара аурала йгIамгIвайстI ажва «йапхъахауа»: йапхъахауа апсыуа профессионал опера ашвахIвагIв, «Апсны апны йапхъахауа акIармацIис» – араса акIвын ауагIа йшырхIвуз. Ауи йапхъахауа апсыуа опера апны йхъадаз апартия лхIватI, лара ауи лакIвпI йапхъахауата Согъвым апны амузыка хъвлапынква адызгалуа йалагаз.
Капба Арифа
Лткъвымла Логуа Людмила Очамчыра шIыпIала йаныргIалу Пакуашь кыт дауапI, ага асквш 1939 декабрь а 10 атшын Согъвым апны дйызтынгьи. Акыт апны ауи лаба пха йыквын, йажва хвы аквырцIун. Йаргьи йакъыль цIолан, йгIайгвынгIвытI йыхвыгIвсабичва рыуа дзачIвызлакIгьи нчвахъвыта йрылаз йгьи йайрыпхьатI. Людмилагьи дхвыцта амузыка дшхънахуаз гвы анарт йылпырамсуата йлыцIагылтI, йылцхърагIатI.
Тбилиси йгьи Киев рпны апхьара
Ауи апхъапхъа Согъвым йтагылу амузыка училища дгIалгатI, уадыргIвана Тбилиси консерватория дыцIалтI. АмузыкадырыгIв Ашхаруа Аида йшгIалылкIгIауала, ауаъа Людмила гIальаматра ду рзылбатI акомпозитор Шведов Дмитрий камера ашвахIварала йапхьарасахIатква (ауи йгыларта йащтагIайуа атлахан Людмила лыршIыйара бзазара апны кIьыдата амагIны дууызлуштI).
Йхпахауа акурс даннадза Людмила Андрей йпхIа Киев аконсерватория апныла дахъысхын ауаъа дапхьауа далагатI. Ауи дыларыпхьагIвхатI йащтагIайуаз лынцIра аурала педагог хъадата зыхьыз лхIвуз Украина ауагIа рартист Донец-Тессейр Мария Эдуард йпхIа. Согъвым лфатар апны Логуа Людмила Мария Эдуард йпхIа лсурат уыла йшгIацIашвуш апшта йкIныхIата ауралагьи чIахIра азылчпун.
Киевла дангIацапах амщтахь аопера ашвахIвагIв шIа йапхъахауата концерт ъалтыз лцри Согъвым апны акIвпI.
Абар Ашхаруа Аида ауи лгIахъвмарра дшаквчважвауа: «Йапхъахуз аопера ашвахIвагIв дйытI. РахIа йбаргвдзаз ария пшдзаква анылхIвуз лбжьы сопрано цкьата йгун (гIврегистркIи бжакIи гIацIанакIуан), амакъымква цкьата, гвлахIарата аздзыргIвчва аргъаруан. Лквпшыралагьи асцена пшдзата дангIалуата агIахъвмарра дазычпан».
ГIацапахра
Москва атеатр Ду апны тшыбжьара нархарала сквшыкI данынха амщтахь Логуа Людмила сквшквакI Самарканд даъан, ауаъа Самарканд аопери абалети ртеатр апны ашвахIвагIв хъадата дынхатI, атеатр апны ауи длунашвачпагIвын йбергьльу асовет дирижёр Хайкин Борис. УадыргIвана Логуа Людмила лцри Согъвымла дгIацапахын асквш 1971 йгIашIарышвта Апсны къральыгIва филармония дашвахIвагIвхатI.
АмузыкадырыгIв Царгуш Асида йшылхIвауала, Логуа Людмила лыршIыйара йакъагIамтахатI йагIвсыз асквшышв й-70-80-хауа асквшква: афилармония апны ауи дприман, концерт алтуа акъалаква дгIарыкIвшун, ареспублика ауацIа знархарала йапшымыз агIахъвмарраква адылгалуан.
Логуа Людмила лрепертуар ащарда йызлалаз аопера арияква ракIвын: Россини йопера «Севиль цирюльник» апны Розина лария, Верди й-«Риголетто» апны Джильда лария, Пуччини йопера «Мадам Баттерфляй» апны Баттервляй лария, Римский-Корсаков йопера «АпаштахI таца» апны Марфа лария. ЙпщынгIважвахауа асквшква рагIан Тбилиси атеатр асцена апны Логуа Людмила гIальматдзата дгIахъвмартI Джузеппе Верди йопера «Травиата» афыр Виолетта лтурасыла.
«Аве Мария» йгьи «Аламыс»
Логуа Людмила лыршIыйара апны йалкIгIата магIны рыман Пицунда йтагылу ахрам аорган зал апны лгIахъвмарраква. Араъа йапшым асквшква рагIан ауи аконцертква рыцлыргылтI аорганист ъазадзаква Дижур Сергей, Янченко Олег, Фисейский Александр.
«ЗымгIвагьи бзита йырдырхитI хцIарала йгIалкIгIаз ауи лпрограмма «Аве Мария». Ари апрограмма апны ауи йапшым авторква йандыргIалыз аршIыйара «Аве Мария» лхIватI», – лхIвитI Царгуш Асида.
Асквш 1984 агIан «йапхъахауа апсыуа кIармацIис» – араса акIвын Логуа Людмила щардала йшлыпхьуз – йапхъахуз апсыуа опера «Аламыс» апны йхъаду апхIвыс турасыла дгIахъвмартI, аргылчIв акомпозитор Шведов Дмитрий йчIвын – Тбилиси апны Людмила Андрей йпхIа камера ашвахIварала йлыдынхалуаз йара ауи арыпхьагIв.
«Ари аопера аргылра дагIаджвыквцIагIвын адирижёр Джергения Лев, – лхIвитI Царгуш Асида. – Аспектакль апшыгIвчва зны ахIа йгьддмырбатI, опера театр гьаъамызтIта Апсны адрама театр акIвын аргылчIв ъакIвшуз. Ахор рцынхъвы акапелла гIахъвмаруан, асимфония оркестргьи йаладырхIатI, Лев Григорий йпа ашвахIвагIвчва азикIкIын апартияква дйырдыртI, йхъатала ауысква зымгIва унашва рхъицIун».
Апсыуа культура апны гIаншара шIыцта хцIара змаз ари аопера апны ръазара ду гIадырбатI йбергьльыз ашвахIвагIвчва. Ауат йрыуан Амичба Борис, Кокоскир Томас, Аджапуа Тото, Чакмач-ипа Вили, датшагьи. Логуа Людмила аспектакль апны, амузыкадырыгIв Ашхаруа Аида лхIваща, «бзибара ду ззыкIуаз, ауи анысла сквшышвпхьадзарала йщаквгылыз ацIасква йырхъыпарныс йхIазырыз» апхIвыспа шIа Назира лтурасы гIалырбатI.
Айсра архъвыхра хьантаква
Логуа Людмила лбзазара апны йалкIгIата йырхъвыхра хьантан асквшква 1992-1993 рагIан йакIвшуз Апсны уагIа р-Абашта айсра. Айсра анакIвшуз азаман лчва йтшаз ащаквыхраква швабыж йлылстI, лзгIвадара дыртIахсатI, ауи йаццауата лбыжьгьи йазарархатI.
«Айсра агIан ауи лцри кыт Пакуашь дтан. Ауи азаман йгIаншуз швабыж йлылнардзгIун, йызнымкIвагьи дчмазагIв хIатлахатI, – лхIвитI азъазарадырыгIв Царгуш Асида. – Ауаса йшаъазгьи лнапIква акврышв дгьчIвамызтI, йлылшузла айсыгIвчва дырцхърагIун – дмацIауан, дджвджвун, далыргун, ауатра нкъвылгун. Лхъа закIылагьи дгьамайгьдзузтI… Ага дартистызтынгьи, допера ашвахIвагIвызтынгьи, зхъа зыргIачIвара атахъу пхIвыс пшдзата уыла дгIацIалыргьи. Абараса сквшыкI дбзазатI, йаргьи ауи лтамакъ йамзарархушта йгьаъамызтI. Айсра амщтахь хIанйата аргваныта хIанабадыр гIамта ауыра лхъа дайъазауа дгIамгIвайсхьан, закIгьи гьлымхъвузтI, лбжьы гьгIатымцIхуазтI, ашва гьылзымхIвахуазтI».
Айсра амщтахь Логуа Людмила мачIын асцена дангIаквылуаз: зны – афилармония асцена апны апианист Бжания Нинель длыцта, уадыргIвана дызцынхуз йгьи йлынбжьагIвыз Амичба Борис йюбилей атшын (ауат зны дахIвра дула «Аламыс» апны йхъаду атурасквала йацгIахъвмаруан).
Арыпхьара
Лбжьы аныдз амщтахьгьи Логуа Людмила амузыка йазлымаз абзибара гIалхчатI йгьи ауи абзибара йалрыпхьуз ашIаква йшрылалцIуш ацIыхъва дтагылтI. Ауат дрыуазаджвын аопера ашвахIвагIв Квициния Астамур. Йапхъахауата Астамур ауи лунагIва асквш 2000 агIан даъан, даквзыргвышхвазгьи Людмила лыгIвза, апианист Адамия Этери лакIвпI. Ауи азаман Логуа Людмила Согъвым йтагылу акъральыгIва музыка училища апны дгьнымхахуазтI, апхьагIвчва лунагIва йлызцалун.
«Сара сабагьи дсыцта лпны хIцатI дсыздзыргIвырныс ахъазла, – йгIайгвалашвахитI Астамур, – йгьи йджьасщаз хIуыс джьауапкIра лымата дшадгылыз акIвпI. Апхъапхъа ауырата, гвыбзыгъата йгIасгвынлыргIвытI амузыка шуыс баргву, джьауапкIра шапщылу, щтахьла сгIатымхъауата, йшатахъу апшта сынхарныс смурадызтын дшсыдынхалуаш. Саргьи тIакIв сшватI, йшпакIву ухIварыквын ауи асхъан багъьата йгьгIасгвнымгIвуазтI ашвахIвара тшадскIылуаши тшадсымкIылуаши, уадыргIванагьи гвы счпатI».
Уыла йуызгIацIамыжьуашта нхара ду акIвлыршатI Логуа Людмила азъазара йазычпаз чкIвынргIа ауи йадылкIылырныс ахъазла, лдырра цIолаква, лъазара рыцагIвылшауата лунагIва апны ашвахIвагIвчва шIаква дрыдынхалуан, ауыгьи файда дазымпшгIауата йылчпун. «Людмила Андрей йпхIа амузыка зджьара йгIанымхауата дазцIабыргын, лынцIра шабгу ауи йалтатI, зынгьи дымшыркъвалун данчкIвыныз йгIалайлахIуз ачкIвынчва шмачIгIвымыз, ауаса лылахь зпылщылыз лъачIвагIа шакIву», – йхIвитI Астамур.
Логуа Людмила лхIальла драйшан, дткIьийын, ауаса дыздынхалуаз ашIаква ргвы дгьамсуазтI, аныкI лапшта дрызтIатIан. Араса акIвпI ауи ргвы дшгIатахаз Квициния Астамургьи, ауи йымщтахь дыздынхалуаз ашвахIвагIв Сакания Баталгьи.
Дыздынхалуаз ашIаква рпны йгIалырбуз аткIьийра лара лхъагьи йазлымаз цIасын.
«Зны ауи ачвымла дгIакIашван лщапIы шIылчIватI, дгьызнымкъвузтI, дзычIвагIвацун, ахьыгIа дарыгIапсун, ауаса Людмила Андрей йпхIа арыпхьара ашIалрысырныс лгвы йгьгIаталмыршватI, – йгIайгвалашвахитI Астамур. – Сара ауи синтезатор сымата слызцалун. Апхъала апшта дсыдынхалуан. ЗаманкI анахъыс йгIасгвынгIвытI араса лызгIва дшачвырдуз, ауи акIвымкIвагьи лынцIра шабгу дыздынхалырныс лща йалаз амузыка дашIамсуата дазынхара атахъыта йшылпхьадзуз».
Логуа Людмила лмузыка салон
Айсра амщтахь йбаргвыз асквшква рагIан Логуа Людмила акультура бзазара, аконцертква, амузыка гIаншараква дрыздзышуан. Швабыж дахъгвыргIвун акультура заджвгьи уыс азйымамызшва йылбауата. Ауи асхъан йгIалхъвыцтI Апсны ахъазла зынгьи йнымшасыз аунагIва музыка хъвлапынква.
Лыгвлачва бзита йырдыруан мызкIы апны зны ртдзы йхпахауа аэтаж апны Апсны ауагIа рартист лунагIва музыка хъвлапны шакIвшалуз. Людмила Андрей йпхIа йшацIасыз апшта айшва адылгалуан, асасчвагьи аргванквагьи йрыцгIаргуан айшва ахъазла джьыкIьахбаста тшытквакI. Ауи йлызгIайлун амузыкантква, аршIыйагIвчва, аполитиканкъвгагIвчва, лыгIвзачва, азъазара гвхътIыла бзи йызбуз зымгIвагьи.
Арат аунагIва музыка хъвлапынква рпны ащарда йгIахъвмаруаз Логуа Людмила йалрыпхьуз ашIаква ракIвын.
«Ауи хIара хIыхъазла рхъвыхразшва йакIвшун, – йгIайгвалашвахитI Астамур. – Арат ахъвлапынква рпны ашва хIхIвун саргьи Сакания Баталгьи, щардала йаъазлун анахьанат амузыкантква, зыхьыз бергьльыз аршIыйагIвчва – ашвахIвагIв Гицба Альиса, апианистква Отырба Алла, Бжания Нинель, йаъазлун ауи атлахан зыршIыйара джвыквызцIагIвацузгьи, ажва ахъазла, аскрипач Алхазов Михаил, апианист Шанава Тамара, ашвахIвагIв Воронова Тамара, агитарист Бусловский Максим, ахщчва Окуджава Нора йгьи Ирена. Арат ахъвлапынква рпны лара Людмила Андрей йпхIа лхъатала зынгьи ашва гьлымхIвузтI, апшыгIвчва дрылачIван. Ауат хIгIахъвмарраква хвы рыквырцIун, ахIвахIва ажваква хIзыгIанадырхун. Ауатква хIара хIыхъазла апхьарта дудздзан, ауи акIвымкIвагьи апрофессионал музыкантква хIъарабадыруаз швабыж магIны ду аман. Амузыка хъвлапынква щардала амузыкадырыгIв Царгуш Асида йакIвлыршалун. Бзидздзата йыздырхитI Людмила Андрей йпхIа ауи дылмыртынчуата амузыка ъачIвагIа дшазгIацалырпахуаз. Ауи апхъала ауыс зквызла, Асида тыхIа данца гIамта ауыракI лъачIвагIа тшачвылрыхъаратI, Логуа Людмила ауи лдыруанта арат амузыка хъвлапынква ракIвыршара лыхъвдаквылцIун, амузыка дшалачважвуш апшта длыргвышхвун. Абараса ауыгьи датшагьи щардагIвы амузыка йазгIацалырпахтI».
Логуа Людмила лунагIва апны йакIвшуз амузыка хъвлапынква дара рпсыпнкъвгарала йырчвын. ЙпщынгIважвижвабахуз асквшква йгIвбахуз ръарагIвшара атлахан, акъала апны щардала электрокъару анаъамыз, йанхьтаз, йанымлаз, ашвахIвагIв лфатар шIырпшыра змамыз культура-музыка дунейхатI. Тшвата айшва йадзхъачIваз, пианино ъагIвнагылаз йдучвам апещ апны, акнига квцIартаквали сквшщарда зхъыцIыз афишаквали йкIвыршата гIвба-хпа сахIатла ауаъа йгIайззалуз ауагIа абаргвыраква, арыцхIагIаква зымгIва рхъаштылуан, йырхъаштылуан щарда мцIуата айсра шакIвшазгьи.
Царгуш Асида йшгIалылкIгIауала, Людмила Андрей йпхIа амузыка хъвлапынква радгалра йшатахъыз апшта дадгылуан: анйарипхьадза атемаквагьи афырквагьи кIьыдан, ащарда ауат акомпозиторква ракIвын, темипхьадза йазалхта репертуар адыргалуан. Зны абарат ахъвлапынква рпны Гицба Альиса лыршIыйара йазынархата йдучвам айззарагьи акIвдыршатI: ауи лыршIыйара йауата ашва шIчIвараква лхIватI, швабыж йджьащахъваз амузыка хабарквагьи гIалрахатI.
Логуа Людмила йгIанлыршатI адуней апны йчIащыгIвамыз, ауаса айсра амщтахь Согъвым ахъазла шIырпшыра змамкIва йчIащыгIваз амузыка хъвлапынква рцIас.
«Ауи ахъаз музыка салон ззырхIвауа ацкIыс рыцIа магIны аман, – лхIвитI Царгуш Асида, – араъа йхъадаз абабара акIвын. Людмила Андрей йпхIа йшылхIвузла, Согъвым хIангIаталх ауи йыба чва ахъысызшва, пхаракIгьи тахмызшва йаъан, зымгIва рацкIыс йагхузгьи ауагIа ращтаныкъвара акIвын. Логуа Людмила лсалон йгIадгылуаз ауагIа ръачIвагIаквала йгьапшымызтI: аспортсменква гIайуанта йрыдуымцIушта руысаква йгIарыпхьауа йалагун, йгIайлуз амедицина нхагIвчва амузыка швабыж йхънахуан. ЙыздырхитI, зны абари апш хачIвы сызлыргылтI: анйара айъазагIвчва ъагIадгылуаш ахъазла амузыки амедицини злаквшвауа салачважварныс – амузыкагьи ъазагIва шалу».
Логуа Людмила амузыки абабари знархараз ахъвлапынква лгвы цкьата, лгвы хътIыта йакIвлышун сквшкъомкI рурала, ауат радгалра ауыслагьи нхара ду лхъатала йакIвлыршауата.
Апсны ауагIа рартист, «йапхъахуз апсыуа кIармацIис», лдуней лхIваджьтI асквш 2013 декабрь а 16 атшын. Согъвым амузыка анхагIвчва дуква зны йъанйуз ауи лфатар ужвы ймцырахатI, ауаса ауи абльынква йрыгIвнапI лтынха, лархив. Асквш 2019 Логуа Людмила лыршIыйара абзибагIвчва зымгIва рыхъазлагьи юбилей сквшхуштI – ауи дгIадрийищтара сквшы 80 цIуаштI. ХIгвыгъитI ахъмаштылра айззараква йрыланакIуата ашвахIвагIв ду лархивгьи ауагIа тшахадыргIвазарныс рылшушта.
швталра йа тшаншвцIара атахъыпI.