АААК ауысхагIвчва Гвдауыта район йаланакIуа Уатхара кыт апхьагIвчва ауагIахъа хъвмарщаквала тшыбжьари рыпкъ тамамта йшыркIуашла мастер-класси рзадыргалтI.
Асабиква рхчара амш апхъала Гвдауыта район йаланакIуа Уатхара кыт апны АААК апхьагIвчва ауагIахъа хъвмарщаквали апкъ акIыщали атшыбжьараква рзадыргалтI.
Уатхара аквтанай апхьарта 5-11-хауа аклассква рапхьагIвчва рыпкъ тамамта йыркIуа тшадрыщцара ахъазла йырчпара атахъу дйырбатI фитнесла абжьагIвы, спорт амастерра акандидат, хIатлащтIыхрала Апсны ачемпион Трапщ Мамсыр.
«ХIыпкъ згIвадазтын хIаргьи хIызгIвадапI!» – дацIачIвагъватI аспортсмен уыбгъа ажьышвква зрыбагъьауа ахIвынчIараква гIайырбауата.
«Планка», «кIьанджьа», пщщапIыкIла угылата унапIкви ущапIкви щтIыхра – арат майрата йузычпитI, дара уыбгъа йапшым ахьыгIаква йырчвырхчитI. Ауат хIатлакIгьи уцрахIвамкIва йучпитI, умахъа-щахъаква ракIвпI йгIаурысабапуа. Уызквгылуаш джьаргьанчкIвынкI акIвмызтын датша закIгьи гьатахъым», – йгIаргвынйыргIвытI абжьагIвы.
АпхьагIвчва джьгарын, йгIардйырбаз рчпахныс йхIазырын. ЙалкIгIата 5-хауа акласс йцауа Кардиа Дамир, Аристава Рамин, Аристава Даниэла. Ауат йпхаща тшырымчпауа абжьагIвы йчпуз йыцырчпун.
11-хауа акласс апхьагIв Сичинава Анита аджьаргьан дыквымлыргьи, йшылхIвазла, амастер-класс йлыхъвуш щарда гIалылкIгIатI.
«Амастер-класс щарда унардыруата йаъан. Ауи апхъала сара-сарагьи «планка» счпун, ауаса, йшгIацIцIызла, ауи анучпауа уыпкъ ацгIащтIухра атахъыпI. Са тамамта йгьсымчпузтI. Ужвы йшучпуш здыртI», – лхIватI апхIвыспа.
Амастер-класс алйыргауата Трапщ Мамсыр зымгIвагьи физкультура тшадыркIылырныс, щымтипхьадза зарядка рчпаларныс дрылабжьатI.
АцIайква йапшым апсуа хъвмарщаква дйырбатI Берзениа Валерий – АААК апны ашIыпIа хъвшаракви чкIвыныргIа рджьгарри агвынзыргIвуа. Ауи 15 хъвмарщакI ртурыхи рхабзакви гIазхIвауа материал йыцгIайгтI, цIабыргыта, зымгIва дйырбарныс дгьахамдзазтI йгIанхаз физкультурала арыпхьагIв йыйттI.
«Аматериал апсуа уагIахъа хъвмарщаквала арыпхьагата йуызгIарысабапуаштI. Ауат разкIкIра апны АААК йрыгIвзу Пачалиа Лариса дгIахIцхърагIан, ауи ахъазла швабыж хIылзыразпI. АрыпхьагIвчва ахъвмарраква физкультурала апхьара сахIатква йрыларцIалуштI – Уатхара кытгьи анкъвакъвраква йрылалуаш гвып шрымазлуш апш. ХIара хIгвы йтапI ауагIахъа хъвмарраква тшауацIдхIрыхта Лыхнашта, Мыквашта тшрыгIвраква йрапшу, ансисквша йакIвшауа анкъвакъвраква рпрограмма йалахIцIарныс», – йгвала хIыцагIвишатI Берзениа.
Ауи «мадзакIгьи» гIацIихтI: ужвы АААК апны йапшым акытква рквта апсуа уагIахъа хъвмарщаквала анкъвакъвраква адгалра ауысла проект йадынхалитI.
Уатхара апхьарта апны атшыбжьараква акласс айцIбаква рарыпхьагIвчвагьи рылан – уацIыхъван ауат ахъвмарраква рынхара апны йгIадрысабапуаштI.
Берзениа Валерий зхабзаква гIаргвынйыргIвыз ахъвмарраква йрыуапI «АщапIыквсра». АцIайква гвып-гвып тшыршан ауыла йхъвмартI.
Ахъвмарща шаъу ари акIвпI. ЧIвы дрышвитIта йызквшваз йылаква хъгIвата йьагIвуа ахъа апны зквхъа дщтIалитI. Ауи йгвып йырпшIагылу агвып йалакву йщтIу йщапIы хчIвырхъакIла йачвыхъарата йалагылитI. АхъвмарыгIвчва рыуа заджвы йщтIу данихьысра зымгIва агIвырта ацIыхъвадза йыгIвитI.
ЙщтIу йшгIайхьысбыргуа дгIащтIчIвитIта йыцIшвткваз дрыщталитI – заджв дгIайкIра ахъазла. ЙзымкIуазтын датащтIалхитIта йара ауаса атарчпахитI. Заджв дгIайкIуазтын агвыпква тшамырпсахитI.
Ари ахъвмарра апны Гочуа Уасман дзапхъагылагIвыз 10-хауа акласс ргвып «Уатхара» рыцIа мчыта тшгIадырбатI, 11-хауа акласс ргвып «Нартаа» згIалахаз рыцIа йымчу рхъвмарыгIв дъарыламыз акIвта рхIватI.
«Арахь Дауыт дгьаъамызтI, ауи зымгIва драпхънысуашын», – ргвква цIыркIгIун ауат йрылаз ахIвссаква.
АрыпхьагIвчва йшырхIвазла, уыжвласыла Уатхара апхьарта апны «Йкьахву апхънысраква» акIвшуштI, йаргьи АААК атшыбжьараква йаназаманыз йаднагалтI: ужвы ауи анкъвакъвра ауагIахъа хъвмарраквагьи алацIа йауаштI.
швталра йа тшаншвцIара атахъыпI.