Апсны апны 17.04.2020 18:50 7781

Аоперштаб ахабар шаргазла, Апсны апны апхъапхъадза коронавирус гIазахвыз агIвычIвгIвыс дбзихахтI.

COVID-19 апхъапхъадза йгIазахвыз Апсны абзазагIв дбзихахтI, ари апш хабар аргатI апрель а 17 атшын абазагIвчва акоронавирус шIкIгIара рачвхъыхчара знархару аоперштаб. АчымазагIв айъазара курс даналга амщтахь тестла гIван ддырхъвыхтI, архъвыхраква коронавирус гьгIадмырбатI.

Аоперштаб аунашвачпагIв йтарагылыгIв, Апсны Республика азгIвадарахчара аминистр йтарагылыгIв Конджариа Алхас йшихIвазла, ауи абзазагIв Гвдауыта аквта чымазагIвтара апны айъазагIвчва йхъпшылыркIвитI, гIамта айшысла дыцIыргIвгIахырныс ргвыгъапI.

«Коронавирус шIкIгIара» гIазахвыз ауахьауат агIвчымазагIвчва йшатахъу апшта йрайъазитI. Асквш 1925 агIан ййыта азгIва гIазахвыз абзазагIв кIьыдата йхъазы дбзазаркIвитI. АгIвыджьгьи рзгIвадара аъащала йамайчвахауата йщтIапI», – йхIватI Конджариа.

Ауи датшагьи йшгIайхIвазла, Апсны апны йагIвсыз ауахъи атшыни руацIа атестква жвагIвы рхъыстI. Заджв йпынгьи «коронавирус» гьгIадымрыбергьыльтI.

Асквш 2020 мартI а 24 йгIашIарышвта Апсны аунашвачпагIвчва акоронавирус ашIашIкIгIара згIва Covid-19 йабакIуата Апсны абзазагIвчва ргIахчара знархару амальква нарахвтI. Ауи апшта, уагIа щарда злу айззараква гьакIвдыршахуам, апхьартаква амцIырщттI, акъральыгIва нхартаква рынхаразаман ахъадрыстI, афачIвтйыртаква, йхъаду абзазага пкъыгIва тйыртаква, аптакьква ракIвымкIва анахьанат аткванква зымгIва адыркIытI, ауагIа хвитта йгьынкъвырыжьуам, ауасамцара.

Асквш 2020 мартI а 28 йгIашIарышвта ГвжважвагIва аъаща хабза щата амата араса йщаквдыргылтI: гIамтакIла Апсны йгьи Россия ркъральгIвына хъысырта хъыргIватI, ахъысра йахвиту арра къвырльыкъвхагIвчви адипломаткви йырхъазыпI. АкъральгIвына ахъысра дрымчтI ареспублика ахьыла йгIацапахуа Апсны акъральгIвчва рыхъазла.

Апсны ахIаракьатчпагIвчва йгIащаквдыргылхыз агвчIагIвчпара мгIвайсра «ХIара хIадгылтI» йгьи Москва апсуа диаспора ауысхагIвчва Апсны абзазагIвчва ргIахчара йгьи азгIва шIыц абакIра йырзынархата Апсны йызлацхърагIуш ахча шазыркIкIуа ахабар дыргатI. УахьчIвала ахчата йазыркIкIхьатI сом мильуан 55 раъара.

Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.