АААК йаланакIуа Ан-абачва рклуб Апсны апхьартаква рпны арыпхьаща йазынарху анйараква акIвнаршауаркIвитI.
Барганджиа Саид
АААК йаланакIуа Ан-абачва рклуб апны арыпхьара агIаршIыцра йазынархаз анйара акIвшатI. Ауаъа йгIачважватI щарда мцIуата Сингапур арыпхьаща ззырдырыз арыпхьагIвчва.
АААК йаланакIуа Ан-абачва рклуб алачIвараква рпны ари гIванхауата арыпхьара ауыс гIащтIырхитI. Ауи апхъала аклуб йалакву арыпхьара аргIапсра уыжвгIанчIви заман йаквыргIапста йшупсахуаш, асабиква уахьчIва абзазара апны йгIартахъхуш дырра рауата йшучпуш йаквчважватI. Ауи агIангьи Сингапур арыпхьаща ауатыкв йгIатаргатI.
Ан-абачва рклуб унашва ахъызцIауа Квициниа Кама гвы алтитI аклуб йалу ауагIа апхьартаква рпны арыпхьара азыгIальаматра ду шазрыму, ауи акIвпI йапынкIылата гIванйаракI ауи ауыс йзазынадырхаз.
«ХIара йхIтахъыпI хIсабиква апхьартаква рпны йшадрыпхьуш аквчважвара ан-абачва рыцIа щардагIвыта йгIалалырныс. ХIа йыгIбитI ажвлара ауи йшазыбжу», – лхIватI аунашвачпагIв.
Ауи йгIалылкIгIатI уахьчIва Апсны апны Сингапур арыпхьаща тшазызбжьаз арыпхьагIвчва шаъу. Ауи адуней апны йагъьу аргIапсщаква йрыуата йырпхьадзитI.
«Ауат амальква ззырдырыз арыпхьагIвчва ршвапха хIымапI, ауат йырдырыз датша зджьакIы йрархIвхырныс йхIазырпI. Сингапур амальква йырхъазымкIва апсуа апхьартаква рпны ужвыгьи шIыцрата йгIаурысабап йауаш хIаквчважвуштI», – лхIватI Квициниа.
СогIвым ахъатачIв апхьартакI апны асабиква музыка гIальма йазызбжьауа, СогIвым амузыка училища арыпхьагIв Хагба Вера йагIвсыз агIапын датшагьи арыпхьагIвчва дрыцта онлайн амальла Сингапур арыпхьаща шыллырдырыз гIалхIватI.
Ауат апхьараква акIвзыршуз абжьагIвы Мухаметшина Лилия апхьагIвчва йауацIыху дырра рызтуа, ауат насып, дахIвра рымата йшгIадзынгылуаш йацхърагIауа арыпхьаща амальква ъалырхуа ауысхарта гIанлыршатI. Мухаметшина апхьагIвчва ХХI асквшышв йатахъу адырраккви ащцалракви шрыладуыркIуаш йазылбжьауата адуней шабгула арыпхьагIвчва йгьи апхьартаква рунашвачпагIвчва зкьы 37-гIв райхIа рыхъазла апхьараква акIвлыршахьатI. Ауи дъанхаз акъральква йрыуапI Сингапур, Колумбия, Малайзия, Къазахстан, Узбекистан, Россия.
Хагба Верагьи ауат апхьараква дангIарылга амщтахь лынхара апны Сингапур арыпхьаща амальква джьгарта йгIалрысабапуа далагатI.
«Ауат анхара йалазжьуа саналага сабап шрылу гIасгвынгIвытI», – лгватраква хIыцагIвылшатI арыпхьагIв.
АААК йаланакIуа Ан-абачва рклуб арыпхьагIвчва рдырраква ан-абачва йрархIвхырныс лшара ъарзыгIаннаршаз Хагба магIын ду амата йылбитI.
«ЙахьчIва магIын ду зму уыс ншатI. ХIара арыпхьарала Сингапур ргIапсра бзиратагьи йамуатагьи йалу гIахIырбун (са схъатала йамуата йызбауа мачIдзапI). Ан-абачвагьи арыпхьагIвчвагьи рыцIа йщардагIвыта йахьчIва араъа йхIхIваз ргIазарквын бзидздзахушын. АуагIа арыпхьара гIаршIыцра йшачвымшвуш гIаргвынуыргIвра ахъазла ауи магIын ду амапI», – йгIалылкIгIатI Хагба.
Цибулевская Мая СогIвым йгIвбахауа аквтанай апхьарти STEM laboratory ахьызта СогIвым йтагылу аинформация ргIапсраква йапхъахауа рапхьарти рпны биология йалрыпхьитI, Апсны акъральыгIва университет апны дметодистпI, арыпхьагIвчва ръазара йъаладырхIауа аквта апынгьи арыпхьагIв ахIбата дынхитI. Ауи йшылпхьадзауала, Сингапур арыпхьаща апхьарта апны йызхъысуа йамгIанпредметызлакIгьи йаквыргIапспI, ауи йгIалцIла швабыжта йсабаппI.
«Ауат амальква зымгIвагьи йрыквшвитI, гуманитар дырра анрутуашгьи, анаука тамамква андуырдыруашгьи, апсабарадырра тшаназынауырхауагьи йгIаурысабап йауитI. Ан-абачва йгIаргвынгIвра атахъыпI асабиква пышвт амамкIва дара-дара рхъа йшадынхалуа. ХъпшылыгIвдъа йгIанхауата гьакIвым – арыпхьагIв ауат йъатахъула йнайырхитI. Ауи акIвпI аргIапсща ахв щтIызхуа», – лхIватI ауи.
Цибулевская йгIалылкIгIатI «арыпхьагIви апхьагIви йрапшдзата ангьи абагьи арыпхьара йшаланакIуа». Ан-абачва йгIаргвынгIвра атахъыпI рсабиква апхьарасахIатква рпны йызшIашвауа, ауи акIвпI ан-абачва урынйаларныс швабыж магIны заму.
Цибулевская Мая амаль шIыцква лапхьарасахIатква рпны йшгIалрысабапуаш дащтапI, ауаса йцIалымкIуата йылхIвитI уахьчIвала ауат амальква йщаквгылхьаз арыпхьаща «йшаквылцIагIвацауа».
«Ауи арыпхьаща зымгIвагьи хIызгIаланаркIуазтын асабиква дыррата йгIахIдырбахуаш агалагьи рыцIа йщардазлуштI», – йылпхьадзитI арыпхьагIв.
Ан-абачва рклуб алачIвараква йрылазапыту, хсабикI зму ДжьопIуа Арда йшылбауала, Сингапур арыпхьаща Апсны апны йщаквгылхьаз аргIапсра йалаужьырквын «бзирагьи» «чвгьарагьи» гIалцIуаштI.
«Ажва гьалам, йъакIвызлакIгьи ауи аргIапсра хIара хIарыпхьаща йалаужьра апхъала ауат амальква цкIы-цкIы йууырдырта Апсны апны йщаквгылу аъащаква йрыквыргIапсра атахъыпI. Уапшра атахъыпI. Йщаквгылхьаз арыпхьаща гьхIзыкIарышвдзушым, ауаса сара ауи шIыцраквакI гIалалзарквын бзи йызбун», – лхIватI ауи.
Сингапур арыпхьаща йащатапI арыпхьара апны йапшым амальква гIарысабапра, асабиква дырра рылазцIауа аматериал йахъазымкIва хъвмаррата йырзалуашгьи алацIара. Гватра ду азалхпI йалакIу, азаджв азаджв дъайайгвыгIвуа, дъайыздзыргIвуа, йхIвауа ъайгIауа, йъайыцикIуа гвып (класс) гIаныршара.
Ан-абачва рклуб – Адуней апсуа-абаза конгресс а-Дискуссия клуб йаланакIуата йазалхта йгIандыршаз проектпI. Ауи анхара асквш 2019 ноябрь агIан йджвыквнацIатI. Аклуб саби дызму дзачIвызлакIгьи далал йауитI. АдгалагIвчва йшырхIвауала, араъа йхъаду «азыгIальаматри агвышхвари» ракIвпI. Аклуб апны апсихологква, айъазагIвчва, асабиква рарыпхьари рбжьари йапшым рнархараквала йынхауа аъачIвагIагIвчва рынйараква адыргаллитI.
швталра йа тшаншвцIара атахъыпI.