Ласурия Мушни йюбилей знархараз агвыргъьахъв хъвлапны Чанба Самсон йыхьыз зхъу Апсны акъральыгIва драма театр апны ахаша декабрь а 12 атшын йакIвшатI.
Барганджиа Саид
Апсны уагIа руысагIв Ласурия Мушни йюбилей Чанба Самсон йыхьыз зхъу Апсны акъральыгIва драма театр апны ахаша декабрь а 12 атшын йдыртлапIатI.
Аюбиляр йайхIвахIвырныс йгIайззатI акультури анауки руысхагIвчва дуква, аполитика уысхагIвчва, ауи йаргванкви йынбжьагIвчви. Апсны акъральыгIва драма театр азал уагIала йырчвын. ГIвсахIаткI раъара йащтацауата асцена апны йгIачважваквуз зымгIвагьи ауысагIв ахIвахIвра ажваква йзынадырхун, швабыж йшизыразу рхIвун, йгIатгараква йрыквчважвун.
Ауи апшта, Апсны АуагIа Айззара аспикери адепутаткви рыхьызла йгIазпхьаз ахIвахIвра тшазынархара йгIанахIвун Ласурия Мушни йыхьыз ареспублика апны йахъазымкIва хъарата йшбергьльу, ауи пIатIу шйыквырцIауа. Адепутатква йгIаргвалашвахтI «Россия йгьи Апсны райгвара, рацынхара йгьи ркультура азазаъащаква ртшауацIыхра арыбагъьара» ауысагIв йалацIара шдуу.
Ласурия Мушни йара йгIвыраква ргIаныршара йахъазымкIва нцIрата йыму аурала апсыуа бызшвала йатайкIуа дгIамгIвайситI адуней литература агIвыраквагьи. АтакIраква йрыуапI «Ауасйат ШIыц», Пушкин А.С. йроман «Онегин Евгений», Лермонтов М.Ю. йпоэмаква, датшагьи йбергьльу гIвыра щарда.
Ареспублика авице-премьер Аршба Даур апшыгIвчва ргватра азынайырхатI апсыуа литература апны йазалху агыларта шаму Ласурия Мушни уыса квпшыра йтагылата йгIанйыршаз ароман «Абашта».
«Уара ауралагьи ушынхуз апшта уахьчIвагьи уамайчуата уынхитI, апхьагIвчва агIвыра шIыцква рзыгIануыршитI, апсыуа йгьи аурышв литература рквтала «цхIа хъуцIитI», апсыуа бызшвала йатаукIитI адуней классика йауата йагъьу агIвыраква», – йхIватI Аршба Даур аюбиляр дйайхIвахIвуата.
АгIачважвараква рымщтахь асасчва йгIаддырбатI ауысаквала йалаз аспектакль: араъа йгIарыпхьатI Ласурия Мушни йгIвыраква йрыуата 20 раъара – йэпика романква рпны йгIашIарышвта алирика уыса айшысква рпныдза йгIарылхыз ашIчIвараква.
АуысакI дгIапхьатI Апсны къральыгIва телерадиуакомпания аунашвачпагIв йтарагылагIв Аргун Рада.
«Аспектакль салалырныс сангIадрайгва сайгвыргъьан садгылтI. Сара абари ауыжвгIанчIви уысагIв ду йыршIыйара йауата щарда срыпхьахьатI. Ласурия Мушни апсыуа уагIахъа хIхъа йыладупI. Ауи уахьчIва йъагIадзазгьи дынхитI йыршIыйара хIагIала апхьагIвчва йыргвыргъьауата», – лхIватI Аргун Рада.
АршIыйара хъвлапны хвсахIаткI раъара йакIвшун. Ласурия Мушни йгIачважвара апны араъа йгIадгылыз зымгIвагьи тшырзынайырхауата швабыж дшырзыразу йхIватI.
Ласурия Мушни Апсны уагIа дыруысагIвпI, датакIыгIвпI, длитературадырыгIвпI, дцIбацIбагIвпI, Апсны анаукаква р-Академия далапI, афилология наукаква дыркандидатпI, Гулия Дырмыт йыхьыз зхъу а-КъральыгIва согIат далауреатпI, Руставели Шота йыхьыз зхъу а-КъральыгIва согIат далауреатпI, Россия шабгула Дельвиг Антон йыхьыз зхъу асогIат далауреатпI, Апсны агIвгIвчва р-АдкIылара далапI, СССР агIвгIвчва р-АдкIылара далан, Россия Федерация агIвгIвчва р-АдкIылара далапI. Ауи йкъару алапI гIвтомкI йнадзауа «Апсыуа уысара антология» адгалрагьи.
Асквш 2010 агIан Россия Федерация апрезидент Медведев Дмитрий Ласурия Мушни Россия йгьи Апсны райгвара, рацынхара йгьи ркультура азазаъащаква ртшауацIыхра арыбагъьара йалацIара ъадуу гIайпхьадзауата Пушкин Александр ймедаль йквнайыргатI.
швталра йа тшаншвцIара атахъыпI.