Арежиссура шIа ацхърагIара знархарата Россия Федерация акультура аминистерства йакIвдыршуз анкъвакъвра апны Акъ МухIарбакь йыхьыз нкъвызгауа Черкес драма театр апхъагылара гIатнагатI.
Барганджиа Саид
ТхIайцIыхв Бемырза йроман йгIахъыху Черкес драма театр аспектакль «Нышв напIыкI» арежиссура шIа ацхърагIара знархарата Россия Федерация акультура аминистерства йакIвдыршуз анкъвакъвра апны апхъагылара гIатызгакваз йрыларпхьадзатI. Ари ахабар гIалцхIатI атеатр аунашвачпагIв Акъ Дина.
Ауи йшылхIвазла, сынчIва аспектакль апычIв гIарбара йаздрыхIазыруаштI, йапхъахауата йангIадырбуш хIапхъа йапхъахауа асквшбжа агIан акIвпI. Россия апны йгIаталуа асквш атеатр йасквшпI. Дина йгIацылцIахтI атруппа ари апьеса Къарча-Черкес республика апны йахъазымкIва анахьанат ашIыпIаква рбзазагIвчвагьи йддырбарныс шыргвыгъу.
Ароман «Нышв напIыкI» гIазквчважвауа КIавкIаз айсра акIвшауата ХIХ асквшышв агIан абазаква Осман къральыгIва ахьыла йшквачхуаз акIвпI. АгIвыра апны автор гIвнархара дукI гIайырбитI: пхIвыспакI лпхыцIа шхьантахаз кIьыдата йгьи уагIахъакI шабгу йрылахьхаз дрыквчважвитI.
Аспектакль дарежиссёрпI Валиев Гиви – Къабард-Балкъар республикала йгьи Лагъь Осетияла гIатгара зму артист, режиссурала ГИТИС афакультет йгIалгаз. Аспектакль асцена йазадигалуата ТхIайцIыхв Бемырза йроман дадынхалтI адраматург шIа, алитературадырыгIв Бемырза Зураб. Ауи АААК ахабарргарта портал йшгIарайхIвызла, хачIвыта йпахь йгылаз архъйара гьмайрамызтI.
«Акъ МухIарбакь (Къарча-Черкес йгьи совет актёр – аредакция ррытаразга) йыхьыз нкъвызгауа Черкес театр апьеса асцена апны йшдыргылуаш апшта садынхалырныс тшангIасзынадырха садгылтI, ауаса йгIасгвынгIвуан йбергьльу агIвгIвы йтекст атакIра, адынхалра джьауапкIра ду шапщылу. Аклассикква рпрозагIвыра алачпаква атеатр абызшва йаквыргIапста йадынхалырныс ззыхъатакIуа гьщардагIвым», – йхIватI адраматург, уадыргIвана йгIацицIахтI ари ауыс апны алитератор гIвхъатакIла джьауап шикIуа: «йара йажва абыжьгаща ахъазлагьи йгIазхъихуа агIвыра аджыпха агIахчара ахъазлагьи».
Ауаса Зураб йшихIвауала, агIвгIвы ТхIайцIыхв Бемырза пIатIута йыквуи агIвыра атематики йгвыгIвбара дрыдзтI.
«Сара сщала атурых зкьыгIвпхьадзарала йаладзыз аубыхква ртынхаква срыуазаджвыпI йгьи апсыуа-адгьа уагIа йрыуу дзачIвызлакIгьи сйапшта КIавкIаз айсра атема нцIарата йсыму гIальаматра азсымапI. ХIыуа дзачIвызлакIгьи апхъанчIвиква рпахьла хьыгIата, хIуагIа рпныла йшвачIву борчта йгIайыквхазапI. Сара ауи аборч ауагIа йгIасыларцIаз сыршIыйара къарули сбзазарали йсшвитI», – йхIватI Зураб.
Датшагьи ауи йшгIаликIгIазла, аргылчIв йадынхалуаз агвып зымгIвагьи ймайрамыз нхара ду акIвдыршатI, йшпакIву ухIварыквын «ауат апхъанчIви гIаншараква уыжвгIанчIви театр бызшвала йрылачважвара» атахъхатI.
«Атеатр аунашвачпагIвчва ауи апш токьаль ъарчпауа зквшахIату ари акIвпI: аршIыйара тшауацIнадрыхырныс рмурадта змагIны дуу, йалачпу ахачIвква рпахь йдыргылитI, апшыгIвчва рпны ауат рырхъйарала хъыхчарагьи нкъвгара шатахъу рылархIвауата. Сшхъвыцуала, ауыс араса уанадгылра апхъахьыла ауи алшара шIыцква гIаннаршитI», – йажва цIхъва айтитI адраматург.
Черкес драма театр апхъалагьи йрылалуан арежиссура шIа ацхърагIара знархарата Россия Федерация акультура аминистерства йакIвдыршауа анкъвакъвраква. Атеатр асцена апны уахьчIва йъагIадзазгьи дахIварала йдыргылитI арежиссёр шIа Исупов Тимур йспектакль «Айныжви амца гъычи», ауыгьи Бемырза Зураб йпьесала йдыргылтI.
Арежиссура шIа ацхърагIарала Россия Федерация акультура аминистерства йакIвдыршауа анкъвакъвраква мурадта йрымапI акъраль атеатрква аспектакль шIыцква андыргылуа арежиссёр шIаква ркъару аларцIарныс, атеатрква йхIазыру анхагIвчва шIыцква рызгIайырныс знархару аргвышхвараква ргIаныршара.
швталра йа тшаншвцIара атахъыпI.