Июль а 23 атшын Апсны апны акъральыгIва баракъ амш дыртлапIатI. Ари агвыргъьарамш ансисквша адунейла апсуа-абаза зымгIва йацдыртлапIитI.
Барганджиа Саид
АгIваша июль а 23 атшын Апсны акъральыгIва баракъ амш Согъвым аквта апны ауагIа щардагIвыта йгIайззан гвыргъьарала йнардастI. Агвыргъьарамш Адуней апсуа-абаза конгресс йадыргалтI.
Ага йгIагъырдзуа йалагазтынгьи, хъвлапны асахIат а 7 аннадза Апсуа драма театр апахь ауагIа тшгIазыркIкIуа йалагатI: агвыргъьарамш асасчва йджьащахъву апрограмма рызпшуан.
Сурат зхъызхырныс зтахъыз рыхъазла йазалху ауатыкв дрыхIазыртI, ауаъа агвыргъьарамш атемала баннер, Диана Воуба йылчпаз афигураква йгьи агIвымакъраль апсуа-абаза диаспора ъатабзазауа акъральква гIазырбауа агеография карта зкIыдыз астенд дыргылтI.
Атурыхла абаза уагIа зынзаман йынкъвыргуз абаракъква рстенд апны рыуа запшызлакIгьи йгIаквчважвауа ашвъаква кIьыда-кIьыда йгIарбан. УахьчIвала йщаквгылу акъральыгIва баракъ астенд кIьыдан. Йара араъа йкIыдын ауи абаракъ шгIаншаз, йангIаншаз, ауи агIан ажвлара-политика гIаншараква шаъаз йауацIыхта йгIарыквчважвуз ашвъа.
Агвыргъьарамш адызгалыз йрыуазаджву, Адуней апсуа-абаза конгресс апхIвысква рсоветква рунашвачпагIв Ардзынба Гета йшгIалылкIгIазла, ари амш Апсны ауагIа зымгIва рыхъазла лкIгIара шаму апшта АААК рыхъазлагьи йамапI.
«Йащтацауата гIвысквша руацIа хIара гвышхвара ду хIылата Абаракъ амш тшазхIрыхIазыритI. Ари амш йадахIвуата хIтурых ауагIа йатаркIвах йъагIадхIыргвалашвахуа магIны азыгIбитI. Агвыргъьахъв акIвшатI, ауагIа йыргвапахатI, йразыпI, ауи рлактаквала йубитI. Ари йапшу агвыргъьарамшква ауагIа адыркIылитI. Ари атшын хIыуа дзачIвызлакIгьи дъапсыуу йхъа аладухитI», – лхIватI Ардзынба.
Асасчва рыхъазла гвыргъьахъв концерт акIвшатI, ауи йалан апшыгIвчва бзи йырбауа Хунцариа Отар йыхьыз зхьзу ауагIахъа оркестр, амузыкантква Хагба Темур йгьи Кварацхелиа Мадина.
«ЙанакIвызлакIгьи йсгвапапI абараса магIны зму агвыргъьахъвква рпны сгIахъвмарныс. ХIара хIуагIа ахъахвитра йазцауата гIвагвана ду гIамырдатI, ауи ухъа аладухушта йаъапI, уахьчIва агвыргъьарамшгьи ауи йаквшахIатпI», – лхIватI ашвахIвагIв Кварацхелиа Мадина.
АРИ АГIАНШАРА АСУРАТЛЕНТА АПШРА>>
Агвыргъьарамш йагIаншара хъадахатI ауагIа рымгIвайсра. Ауат атшыгIвчви афакелнкъвгагIвчви рылагылата Апсны акъральыгIва баракъ ду (аган метр 20, аура метр 30 йнадзун) рымата АмхIаджьырква рдзтшпурамла йымгIвайстI.
АРИ АГIАНШАРА АВИДЕО АПШРА>>
«Ауи швабыж йджьащахъван. Саргьи сынасып йгIанакIытI ауагIа срылата бзи йыгIбауа хIбаракъ нкъвызгарныс. Абари йапшу агвыргъьахъвква хIадыркIылитI, хIбзазара апны йхъаду хIпсадгьыл, хIтгIачва, хIпха, хIацIагылра шракIву рахIагьи йхIылахIдырхIвитI», – лхIватI агвыргъьахъв асас, Согъвым абзазагIв Дарчам Марина.
Фашала йгIвычаз асасчва дугьи хвыцгьи щардагIвы йнадзун. Ауат дрыуазаджвта даъан жвсквша йырту Барцыц Миланагьи, ауи рыцIа паса агвыргъьарамш тшазылрыхIазырын лани лаби лыцта дгIайтI.
«Йащтацауата гIвысквша цIитIта хIгIалалитI ари агвыргъьарамш, ауипхьадза сара хIуагIахъа фаша сшвысцIитI. Ари хIара йхIбаракъпI, саба ауи ахабар гIасайхIвтI», – лхIватI апхIвыспачкIвын лгвтара хIыцагIвылшауата.
Ахъвлапын ацIыхъва акъральыгIва ансамбль «Шаратын» агIахIвра «Аибаркыра» гIадырбатI. АгIахIвыгIвчва йырхъазымкIва апшыгIвчва йрыуата йызтахъу зымгIвагьи ауи йалалырныс рылшун. АААК апхIвысква рсоветква рунашвачпагIв дгвыгъитI ауи ацгIахIвра Абаракъ агвыргъьарамш знархару цIас бзита йшщаквгылуашла.
«Ауи агIахIвра цIабыргыта зымгIвагьи шаднакIылуа ахьызлагьи йгIаугвынгIвитI. ХIара хIхъа аладухитI ауи адыгIгалырныс ъахIылшаз, хIайгвыргъьитI ауагIа агIахIвра йгIащтIнахта йацзакIыта ауи йъагIалалыз», – лхIватI Ардзынба Гета.
Агвыргъьахъв анакIвшуз йызтахъу зымгIвагьи анкета йтагIвыта АААК йалалырныс амаль рыман. Ари ахъвлапын агIарбараквала а-Конгресс щардагIвы алалтI. Агвыргъьарамш апрограмма аналгагьи ауагIа амцIымцIхуата щарда йалан: апсуа ашваква рхIвун, йгIахIвуан.
Апсны Республика ауыжвгIанчIви къральыгIва баракъ рыбагъьахатI Акъва (Согъвым) къала апны Апсны Республика ЙхIаракIу а-Совет асессия ащаквыргылрала асквш 1992 июль а 23 атшын. Ауи асхъан асквш 1978 агIан йнарахвыз Апсны АССР а-Конституция анхара ашIарысхатI, асквш 1925 агIан йлырхыз Апсны ССР а-Конституция гIащаквдыргылхтI. Асквш 2005 йгIашIарышвта Апсны Республика АкъральыгIва баракъ Амш июль а 23 атшын хабза щата амата йдыртлапIитI.
хороший получился праздник!
швталра йа тшаншвцIара атахъыпI.