АшвахIвара анкъвакъвра «Орфей» йалаз Азизова Саида апсыуа ашва шIыц астудия апны йанылцIарныс ахъазла апсыуа макъымныршагIв Гумба Анри дйынйатI.
Барганджиа Саид
Адуней апсуа-абаза конгресс йазалху асогIа зквнадыргаз Азизова Саида агIваша февраль а 26 атшын амакъымныршагIв Гумба Анри дйынйатI. А-Конгресс асогIа ашвахIвара анкъвакъвра «Орфей» апны апсыуа бызшвала йагъьу агIахъвмарра йазалхын. Амузыкантква уыжвласыла апсыуа бызшвала ашва шIыц анырцIуштI.
Апсыуа макъымныршагIв, амузыкант Гумба Анри ашвахIвагIв шIа лбжьы даздзыргIвын йгвапхауата лталант джьайщатI.
«Ашва шIыц аквайчIвагIвыра сыман, ауаса ауи шцуш сыла йгьсызгIацIамыжьуазтI, ауи ахIатырла хIабадырындзыкIьара сазпшуан. Саида хъгалра щарда лымапI, ауат зынла гвы рысттI: лбжьы агIатыцIща, апшдзара, абыжьква рхIваща – ауатква ракIвпI апшгIвы дхъызкъьалуа. Сара ауи «лмузыка шан» шаъу збатI. Сшхъвыцуала, хIыздынхалуаш ашва пшдзазлуштI, щаласра ацIазлуштI, лныбыжь йаквшвауата йаъазлуштI», – араса йгвгIанаграква хIыцагIвишатI акомпозитор.
Лара Саида йшылхIвауала, йахьчIва щарда цIуата йынкъвылгуз лгвала гIалыдахIвтI – йапхъахауата днашылтI ашваква ъанырцIауа апрофессионал студия.
«Астудия саннашыл зынла спсып акIытI. Сбыжьгьи гIатымцIхуазшва сцатI, уадыргIвана тшгIабыстхын ашва схIватI. Ауи шIала йузымхIвушта анцIрала сгвы йгIатахатI. Анчва дырзыразхатI а-Конгресс ари асогIа ахъазла. Сшхъвыцуала, хIанкъвакъвра (ашвахIвара анкъвакъвра «Орфей» - аредакция ррытаразга) йалаз ачкIвынчва, ахIвсса щардагIвы стара йгIаташвазарквын йайгвыргъьушын», – лхIватI ашвахIвагIв шIа.
Саида Очамчыра къала апны дйытI, дгIадзынгылтI. Ауи 10 акласс дапхьитI. ЛтгIачва рпны заджвгьи ашва гьихIвум, ларгьи апхъала ашвахIвара йылъачIвагIахарныс дащтата зынгьи дгьаднымхалтI.
«Сара йазалху амузыка дырраква гьгIасыквымшватI. Ауаса ссабийищтара уарад схIварныс бзи йызбитI. Ателевизор садзхъагылата йсхIвалун. Ажваква ласдза йсгвынскIылитI. АшвахIвара схънахитI, ауаса апхъахьыла сайъазагIвхарныс стахъыпI – Россия апны сапхьата Очамчыра сгIацапахырныс, сцри къала апны сбзазарныс йгьи сынхарныс», – лхIватI Саида.
АААК ахIвсса рсоветква рунашвачпагIв Ардзынба Гета йшгIалылкIгIазла, апроект «Орфей» ауагIа йыргвапхатI, Очамчыра район абзазагIвчвагьи хIкъраль анахьанат абзазагIвчвагьи ргватра азынадырхатI.
«Орфей» швапха бзита йгIанарбитI ауагIа рпахь хачIвы шдыргылыз йгьи ауи абзазара йаларыжьныс шырзахъвдаквыцIыз. Апроект йалалыз зымгIвагьи асцена йапхъахауата йгIаквылтI, ауат апхъала йазалхта ашвахIварала рхъа йгьаднымхалтI. Ажва ахъазла, Азизова Саида йахьчIва йапхъахауата йылбатI профессионал студия ззырхIвауа. А-Конгресс йрылшатI ауи дансабийыз
йгIашIарышвта йлымаз агвала дырхъйарныс. Абари ашвхIаусыгIвала, датшагьи швхIаусыгIва щарда гIахIпхьадзауата хIара ари апроект йацхIкIитI», – лхIватI Ардзынба Гета.
«Орфей» – Очамчыра район апны йакIвшауа музыка анкъвакъврапI. Анкъвакъвра йалу Очамчыра район акытква йгIартыцIыз, талант зму асабиква ракIвпI. Ауат рщардагIв апхъала микрофоннадзара шыркIуа гьрымдыруазтI. АшвахIвара проект «Орфей» апны йагъьу ашвахIвагIв хьзы йазабакIитI 17-гIв йнадзауа ачкIвынчви ахIвсси. Ауат дрылапI апсыуа бызшвала йагъьу агIахъвмарра ахъазла АААК йазалху асогIа зквнадыргаз Азизова Саидагьи. Анкъвакъвра агIвхъвыкI акIвшахьатI. СынчIва апрель мыз агIан апхъагылагIв дъагIабергьыльхуш афинал акIвшуштI.
швталра йа тшаншвцIара атахъыпI.