Къарча-Черкес ауагIа руысагIв, агIвгIвы, атакIыгIв йысквш 70 йадахIвуата АААК ахабарргарта портал ауи йгIайыквчважвауа бзагIвра арыхIазыртI.
Асабихъи ачкIвынхъи
Асквш 1953 май а 17 Гвым кыт апны дйытI Къарча-Черкес Республика ауагIа руысагIв Аджьбакь ХIаджьисмель. Ашвъаква рпны агIвгIвы йыхьыз Александр-та йаныпI, ауаса алитература дызлалалыз йанхьыз ХIаджьисмель акIвпI.
Асквш 1971 агIан ХIаджьисмель Гвым аквтанай апхьарта дгIалгатI. ДанцIайыз уалагата литература бзи йбун, агIвымакъраль бызшваква ййырдыруан, дчкIвыныркIвата атакIраква йчпун.
Апхьара дъацуш ауысла щарда далыхуашта йгьаъамызтI. ХIаджьисмель Псхваба апедагогика институт агIвымакъраль бызшваква рхъвшара дыцIалтI.
Пушкин Александр, Лермонтов Михаил, Рубцов Николай, Джалиль Мусса, Асадов Эдуард, Гейне Генрих, Тарба Иван, Чаниа Терент датшагьи щардагIвы Аджьбакь ХIаджьисмель йбзирала зуысаква абаза бызшвала йгаз уысагIвпI.
«Ауи атурых ахъа Псхваба апны агIвымакъраль бызшваква ринститут санапхьуз йгIаджвыквылтI, – йгIайгвалашвахитI ХIаджьисмель. – Кабер Клара Герман йпхIа хIзылрыпхьуз фонетика хIанахъысуаз зны Гейне Генрих йуысакI алхIыргауа хIалагатI. АрыпхьагIв дгIахIцIгIатI; «Дызда аурышв уысагIв дуква дрыуата ари ауыса урышв бызшвала йатазкIыз?» ХIара йацы апхьарта хIгIацIцIхгIвацан, хIыуа заджвгьи ауи джьауап гьизамттI. Ауи лгвы йастI. УацIыхъван йгIахIалхIвхтI ауи зчпаз Лермонтов Михаил шйакIву. Ауи ауыса ауи гIвбата йатайкIтI. Ларгьи ауат Гейне йыршIыйара йгIалхыз аэпиграфгьи рыцта дгIарыпхьатI. ХIара ауи аъара хIпхащан – йара ауи атшын хIшгвыпыз абиблиотека хIцатI. Ауаъа пщтомкI йнадзауа Лермонтов йуысаква разкIкIра гIахIахвын ауат ауысаква гIахIаутI. Абарауи агIан сгвы апны закI «гIашIыхатI». Схъагьи арса йгIанагтI: «Гейне Генрих йуысаква абаза бызшвала йатакIында». Ауи йыршIыйара атакIрала анхара саквнаргвышхватI, гыларта кIьыдагьи азалсхитI».
Псхваба дапхьауата ауи уацIыхъван пхIвыста йгIайгхыз, Евпатория йауаз Натальягьи длабадыртI. Ауат сквш 47 цIитIта йацыпI.
Арыпхьари алитература ршIыйари
АгIвымакъраль бызшваква рхъвшара дангIалга Аджьбакь ХIаджьисмель нхара Тува АССР дырщтитI, ауаъа ауи асабиква намыца йгьи ангьльыз бызшвала йайрыпхьауа далагатI. ТшытракI анцIы ауи Кочетовск агIсквша апхьарта, уацIыхъван Сосновск аквтанай апхьарта дирдиректорхатI.
Асквш 1981 агIан Кърым дцатI. Ауаъа ауи сквшыкI Евпатория йаъаз асаби санаторий апны бжьагIвыта дынхатI.
Къарча-Черкес ХIаджьисмель асквш 1982 агIан дгIайхтI. Йпсадгьыл дангIайх ауи «Коммунизм алашара» (ужвы – «Абазашта») газет аредакция нхара далагатI. Йцри бызшвала йгIацIцIуа агазет апны анхара Аджьбакь ХIаджьисмель алитература ршIыйара ахьыла дацанарпатI. Асквш 1985 агIан ауи Апса ФатIимати Йуан ГIальиси дрыцта «Абзазара ахIврапшдзаква» ахьызта руысаква разкIкIра гIацIырщттI. Асквш 1989 агIан адуней йгIаквылтI абзазара йгIахъыху ахабаргIвыра «ЙачIваджьыргIа ргIашIыхамта».
Йлитература ршIыйара рыцIа йджьгарыз йагIамтата йалтI асквш 2000-ква. Ауи уысатагьи прозатагьи 15 азкIкIракI гIацIищттI. Асквш 2002 агIан Аджьбакь ХIаджьисмель Россия АгIвгIвчва радкIылара днарахвтI. Ауи зыршIыйара рахIа хвы аму ауыжвгIанчIви абаза литераторква дрылапхьадзапI.
Йара йгIвыраква данрыдынхалуазгьи ауи анахьанат агIвгIвчва ргIвыраква абаза бызшвала ратакIрагьи гьныймыжьуазтI. РахIа гватра ззалихуаз Гейне Генрих йуысара акIвыркIван.
Йюбилейу, 15-хауа йазкIкIра «СыгIамта алахъвгIахъасраква» асквш 2023 агIан йгIацIцIтI. Ауи ауысаквала, апоэмаквала, анамыца уысагIвчва йырчIвыта быжьбалладакI ратакIраквала йалапI.
АшIалахIвара гIащаквыжьрала анхара
Аджьбакь ХIаджьисмель джьгарта абаза шIалахIвара азикIкIитI. Асквш 1994 агIан ауи апхьахьаква ТIыгв Владимири ХIвран ШахIымбии дрыцта «Ауасаражвква рытшгIва» азкIкIра гIацIырщттI. Ауи йаншвалтI Гвым, датшагьи Къарча-Черкес акытква рахIбачва йырхIвахуата йанырцIаз ахабарыжвкви атурыхкви.
«ХIара «Ауасаражвква рытшгIва» агIвра хIаналага агIан ахабарыжвква азызкIкIуаз ауагIа мачIгIвын. ХIара ауи агIвщтра йшхIылшуз апш йгIахIыррайшахтI. Ауаъа йану ахабарква гIамтата йгIарыцIаркIуа сквш 500 айхIа йнадзитI. СгвыгъитI заман щарда анагIвсрагьи ауи агIвыра ахв ымдзуашта», – йхIвитI Аджьбакь ХIаджьисмель.
АшIалахIвараква аншвалтI «АхьыкъвыбгIан ащтаква» азкIкIрагьи. Ауат ракIвымкIва ауи йалалтI ХIаджьисмель апсуа бызшва йгIахъихта абазала йатайкIыз Басариа Симон йгIвыра «КъарчачкIвын округ апны абаза кыт» йгьи Лакрба Михаил йгIвыз «Йапхъахауа акнига».
Асквш 2019 агIан йгIацIцIтI азкIкIра «АхабаргIвоуква руасйат». Ауи «Алашара» Дуней адкIылара «Асквшква 2017-2019 рагIан абаза уагIахъа рыбызшва, ркультура, ргвбайара гIащаквыжьра йгьи тшауацIдрыхрала ЙалакIу апрограмма» апкъ йтата йгIацIнащттI. Акнига Аджьбакь ХIаджьисмель 80-90-хуз асквшква рагIан йазикIкIыз шIалахIвара текстта 80 раъара аншвалтI.
«Турыхипхьадза йалата йугIитI ауи уыжвхIзамандза йгIазырдзаз ауагIа руасйат, – йгIвытI ХIаджьисмель азкIкIра апхъажва апны. – ХIуагIа ражва швхча, ауи амагIны тамамта йгвыншвкIылта швсабиква йдшвырдырх, швкъаруква адшвкIылта ауитIакIв швхча – сшвыхIвахитI!»
Хвду азубушта йаъапI азкIкIра йацу, абаза хабаргIвоукви убых бызшва йцIыхъвахауата йалачважваз Эсенч Тевфики рбыжьква зну аудиодиск.
Абаза бызшва архъвыхра
Аджьбакь ХIаджьисмель уыста йхауа йанархаракIта йалитI абаза бызшва архъвыхрагьи. УахьчIвала ауи абаза бызшва рыцIа цIолата йыздыпуа аъачIвагIагIвчва дрыуазаджвыпI.
«ЙаъапI уагIа – зынцIра, зкъаруква, здырраква руагIи рпсадгьыли рзынхара йаквызцIауа, ауыла патриотизм ашвапха гIазырбауа. Аджьбакь ХIаджьисмель ауат дрыуапI. Сквш 30 «Къарча-Черкес» телерадиуакомпания апны сйыцынхан – багъьата йсзыхIвуштI ауи абаза бызшва адыррала йгIайанкъвакъвуаш ауагIа шмачIсачIу. Ауи йанакIвызлакIгьи здырраква цIолу, зхIаль мчу дгIвычIвгIвысын», – лхIватI Аджьбакь ХIаджьисмель дйыквчважвауата арадиуа акорреспондент Хвына Фатима.
Апсны ауагIа йрыцкIра
Аджьбакь ХIаджьисмель Апсны ажвлара йгьи акультура бзазара щардала даларпапI. Айсра йгьи айсра амщтахь йбаргвыз асквшква рагIан ауи йшйылшуз Апсны дацхърагIун.
«Тува сбзазауата асквш 1980 агIан ХIваста санаторий сырщтитI. Абарауи агIан акIвпI сара атурист гвып срыцта йапхъахауата Апсны санца. ХIара Рица гвал хIыргатI. Ауи амщтахь сара-сара СогIвым сцатI, акнигатйыртаква сырнашылтI, апсуа бызшвала книга щарда гIасахвтI. Тува санцах ауатламца апсышва ссырдыруа салагатI. Абарауаса Апсны спсы йалалтI, бзибара ду азыскIтI», – йлахIвараква хIыцагIвишатI Аджьбакь ХIаджьисмель.
Асквшква 1988-1989 рагIан ХIаджьисмель СогIвым дгIайын апсуаква ртшгIащтIыхра йацикIтI. Апсны ауагIа р-Абашта айсра анакIвшуз асквш 1992 агIан гIвымызкI Пицунла даъан. Октябри ноябри руацIа аквырджь-апсуа айсра ахабар йыргун, агIаншараква дгIарыквчважвун.
«Апсны сгвы апны тып кIьыда азалхпI. ЙрыцхIагIаз агIамта сайщчва йрыцсымкIкIва амаль гьамамызтI. Ауи акIвпI ауаъа сцарныс йзаквскIыз. Сара ауаъа йыншуз ахабарква ансцIун. Ауат аматериалква «Къарча-Черкес» ГТРК арадиуала йгIарттI. МшгIвырагьи сырцун, ауаъа йану ужвыгьи йгьгIацIымцIстI. Апхъахьыла ауи айсра йгIаквчважвауа гIвыракI сзыгIаныршушта сгвыгъитI», – йхIватI Аджьбакь ХIаджьисмель.
Далан ХIаджьисмель асквш 1992 агIан Лыхны апны йакIвшаз Апсуа-абаза уагIахъа р-Дуней адкIылара (МАААН, ужвы АААК) йапхъахуз айззарадугьи.
«ЙыздырхитI Лыхны апны йакIвшуз айззараду апны Апсны йапхъахуз рпрезидент Ардзынба Владислав дшгIачважвуз. Ауи агIан хIара йгIахIгвынгIвытI Апсны ахъахвитра ахъазла ацIыхъвадза хIшайсуаш», – йгIайгвалашвахитI Аджьбакь ХIаджьисмель.
УахьчIвазаман
Асквш 1989 йгIашIарышвта уахьчIва йъагIадзаз Аджьбакь ХIаджьисмель «Къарча-Черкес» къральыгIва телерадиуакомпания апны абаза бызшвала арадиуагIатраква адызгалуа агвып драхIбата дынхитI, «АтшгIва» йгьи «Алитература анйараква» гIатраква акIвйыршитI.
Аджьбакь ХIаджьисмель йгIанйыршаз арадиуажурнал «АтшгIва» йапхъахауата асквш 1990 август а 4 атшын аэфир йгIаталтI. Ауи рахIа йыззынарху агвбайара, аъадаб-намыс ракIвпI. ЙгIарыквчважвитI ауаъа Абашта айсра Ду атурыхгьи, чкIвыныпгIа рбзазарагьи, ауагIахъа цIасквагьи, цри бызшви акультури рхчара ауыс зынйауа абаргвыраквагьи. Ажурнал ахъвыкI йанакIвызлакIгьи абаза кытква рпны йбзазауа ахIбачва уасаражвква ргIагвалашвахраква йырзалхпI, йгIартлитI ауаъа йгIадзынгылуа абанпараква швапхата йырзалуа ауагIа нхагIвчва йгIарыквчважвауа абзагIвраквагьи.
«АтшгIва» журнал йаланакIуата йгIацIцIыз арадиуагIатраква зымгIва йара Аджьбакь ХIаджьисмель йхъатачIв архив йахъазымкIва «Къарча-Черкес» ГТРК арадиуа афонд апынгьи рыцIа хвы зму агIатраква йрыуата йщтIапI.
«Са ари ауыс сшадгылуаз араса акIвпI: агIвычIвгIвыс сгIайыквчважвузтын ауи йхIваз ажваква ансцIата йшгIанызыжьуаш сащтан. Ауи агIан акIвын йсчпазла санразхуз. УахьчIва йъагIадзазгьи йара ауаса сынхитI. Ауат агIатраква архив йщтIапI. АгIамта анцара баргвхитI зныкI йаъаз агIаншараква гIаугвалауыршвахырныс, ауаса ауи ашвъабгъьы йануцIазтын заман ауырала йгIанхитI. Уара-уарагьи йджьаущахитI зныкI йугIвыз гIауахвхта уанапхьахуа. ЙыншалитI йара гIвычIвгIвыскI – йа йюбилейта, йа дызлаз гIаншаракI гIаурахата – уанатайыквчважвахуа. Ауи йапшу апны зныкI йануцIаз швабыж йгIауцхърагIахитI, йбзазара агIаншара хъадаква уызгIалкIгIахитI. Ауи ахIатырла сара йанакIвызлакIгьи агIатраква гватшныта сшрыдынхалуаш сащтапI», – йхIвитI ХIаджьисмель.
ГIамта бзидздза Аджьбакь ХIаджьисмель Апсуа-абаза уагIахъа р-Дуней адкIылара (ужвы АААК) йгIацIнащтуаз ажурнал «Абаза» кIара азыйыгIвлун, ажурнал Къарча-Черкес апны йамцIигун.
Аджьбакь ХIаджьисмель джьгарта дрыцынхитI Москва йаъу Библия атакIрала Россия аинститутгьи. ХIаджьисмель урышв бызшва йгIахъихын абаза бызшвала йатайкIтI «Сольман йуасаражвра», Матай йахьыла а-Инджьыль. Ужвы ари асахIат ауи акьристан зкьырква разкIкIри (псалтырь) абжьаматаква (апостолква) руысхаракви ратакIра дадынхалитI.
Алитература азкIкIраква гIанзыршаз, атакIраква зчпауа, проза згIвуа Аджьбакь ХIаджьисмель уахьчIвагьи абаза культура атшауацIыхра дазынхауаркIвитI.
Артшхъвагакви агIатгаракви
Аджьбакь ХIаджьисмель нхарала йгIатигаз, абаза литература апны йалацIара ахъазла йгIайквнадыргаз медаль, орден щарда йымапI. Ауи йгIвыраква абаза бызшвала апхьагаква йрыншвалтI, Россия ауагIахъа литератураква рантологиягьи йалашватI.
Асквш 1988 агIан гIвырагIацIщтра, полиграфия йгьи книгатира руысквала а-КъральыгIва комитети культура анхагIвчва рпрофсоюз а-Квта комитети Аджьбакь ХIаджьисмель «СССР апечать анхагIв бзидздза» хьзы гIайквнадыргатI. Асквш 2000 агIан «абаза культура гIащаквыжьра йгьи тшауацIнарыхра ауыс апны йалацIара ахъазла» КъЧР АуагIа Райззара а-ЧIахIра грамота гIайырттI. Асквш 2007 сентябрь агIан «Къарча-Черкес Республика апны гIатгара зму ажурналист» чIахIра хьзы гIайыхьырцIатI. Асквш 2008 июнь агIан литератури азъазари рынхагIвчва йырзалху КъЧР апрезидент йахча согIа далауреатхатI, асквш 2014 агIан «КъЧР ауагIа руысагIв» хьзы гIайквнадыргатI.
швталра йа тшаншвцIара атахъыпI.