Апсны ауагIа рартист, акиноактер КIвакIваскьыр Томас дангIадрийыз амш йадахIвуата АААК ахабарргарта портад ауи йбзазари йпхыцIи йгIарыквчважвауа абзагIвра арыхIазыртI.
Алиса Хвтаба
ЗымгIвагьи йырдыруа «АмцхIварта» йачвыхъарамкIва адзатшпурам апны йгылу, здауышква дуу ачарта йыгIвната артист гвыпчкIвынкI кофе рыжвитI. Ауат адуней азбжа гIамырдахьан йгIанхаз азбжа шгIамырдуш кьахвдза йлырхитI. Йхъыччауа йгIаргвалашвахитI Мозамбик апны асцена йыквгылата апещ лащцара йыгIвназ ауагIа рлактаква шырзалмыргуз – ас гърачIыгъраква рыхъазла ашва шырхIвуз йгьи йшгIахIвуаз. ЙгIаргвалашвахуан Торес Лолита асамолет асалон дангIабжьал ауи хъачвата йаквчIваз райхIарагIв йбергьльу аргентин актриса лгватра рхвгIарныс йшамакIуаз. Артистква рцри бызшва цкьала йчважвитI, рпсадгьылчкIвын агвбайара адуней йрыларгата ахьыз хъара йшдыргуш ахIа гвалагьи гьрымам. Ауат агастроль шIыцква, агIаншара шIыцква рпырапI… ауаса азджьакI рыхъазла ауат йцIыхъвахауата гастрольхуштI. Ауат дрыуазаджвхуштI ари хIбзагIвра афыр, Апсны йагъьыз рбаритон, ауагIа рартист, акиноактер КIвакIваскьыр Томас.
Асабихъи ачкIвынхъи
Асквш 1942 июль а 22 Гагра район йаланакIуа Бзыб кыт йтаз апсуаква Квыти Марии ртгIачва апны чкIвынхвыцкI дйытI. Ауи Виктор-хIва йыхьырцIатI. Ауаса йалын – зымгIва рыхъаз ауи д-Томас-хатI. Ауи датшатагьи Чыгв-хIва йыпхьун (Ҷыгә – зхъа йахьпшуа, йцкьу, йангIалуа гIаныцIитI – аредакция ррытаразга). Бзыб апхьарта дангIалга СогIвым индустрия техникум дыцIалтI. УацIыхъван ГнесинргIа рыхьыз зхъу Москва амузыка-педагогика институт «арыпхьагIв-вокалист» ъачIвагIа гIацIигарныс дцатI. Асквш 1973 йапхьара аналйырга Станиславский йгьи Немирович-Данченко рыхьызква зхъу Москва амузыка театр актерта далагатI. Ауи йхIвуз йрыуан Моцарт йалайцIаз «Фигаро йтацанадылра», Доницетти йалайцIаз «Дон Паскуале», Верди йгIвыз «Травиата» йгьи «Бал-Маскарад» операква йрылаз апартияква.
Асквш 1974 агIан КIвакIваскьыр СогIвым дгIайхын Гвымба Ражден йыхьыз зхъу Апсуа къральыгIва филармония артистта далагатI, ауи амщтахь гIатгара зму ашвахIварали гIахIврали Апсны АкъральыгIва ансамбль апны дсолист апхъагылагIвхатI. Ауи йацйырцауата «Райда» эстрада ансамбль апынгьи дгIахъвмаруан. Ауи классика репертуаргьи йыман, ауагIа рашваквагьи йхIвун.
«РыцIа паса схъа дшпагIатамшва»
ТIатIата йгуз Томас йбаритон ауи йыцынхаквуз дгIарылнакIгIун, йчпащакви йквпшыри ангIалалхрыз рыцIагьи дгIарылхIвун: йыпкъ райшата, дмахъвщахъвыта, йхъабраква квайчIвалгIашвцIата, йыпцIаква жвпIата, йлакта хъацIара гIаныпщуата акIвын дшаъаз. Ауи йквпшыра акIвпI зыхьыз гуз арежиссер Савельев Владимир «Башлыкъ шкIвокIва» фильм анхъихуаз дхъызкъьалта афыр хъада йтурасыла дгIахъвмарырныс дгIалйызрыхыз. Йтахъыз йапш актер димауамцара йгIапса-йдзышыз арежиссер акино анхъихуаз цхърагIагIвта йымаз Мыквба Анзор дйыхIватI зуагIахъа рыхъаз згвы зхьуа, хъацIара злу, зхъахв здыруа адгьылрхарджьыгIв уыла дгIацIазыжьуаш заджв дйызгIайыуырныс. Акино йащатаз ЩынкIвба Баграт йпоэма «Абыхъв ашва» бзита йыздыруаз Анзор, йдыруаз актрекви агIахIвчви йакъыльла йалихуата, айрышта арежиссер даквйыргылуан ауи атурасыла йгIахъвмаруаш дапсыуа цкьазара шатахъу. Ауи кьангьаш гьазгIайымгуазтI датша уагIахъакI йгIарылцIыз, датша культуракI йанкъвгагIву заджвгьи цIолата йгьи цкьата афыр йтурасы шизыгIамырбушыз, апшыгIвчва ргвы дшзынамдзушыз, акиногьи арежиссергьи ртшхъвара шрызгIайымгуашыз. Ауи апш мшкIы уагIала йырчвыз Чанба Самсон йыхьыз зхъу атеатр асцена дгIаквылтI ашвахIварали гIахIврали АкъральыгIва ансамбль ашвахIвагIв.
«ДабарщтIи хIыззыпшгIауа! РыцIа паса схъа дшпагIатамшва!» – йгвы йгIанагтI Анзор Томас дипшуата, йаргьи дгвыргъьачIвауа Савельев йайхIвтI загъь думауашта ауи атурасы йаквыргIапсу гIвычIвгIвыс дшаъу, йаргьи ауи дйабамдыркIва амаль шамам.
Йара ауаса йцатI – датша баритонкI дйачважван Анзор арежиссери артисти адидалтI. Ауи амщтахь ауысква ащтацауа йалагатI. Ахудсовет намкIгIамкIуата Томас ддрыбагъьатI. УацIыхъван аныла-арыла ацараква, ахъыхраква джвыквылтI. Ахъыхраква анакIвшуз амшква рыхъаз ахча бзи гIайыртуанта йхъахIараква гьгвымхамызтI, йаргьи йызнымкIва акино йадынхалуаз зымгIва – амза зыргылуаз йпны йгIашIарышвта амашинанкъвцагIв йпны йыцIшвтхуата – хъвлапынчара йызшIитырныс йылшалун. ГIвычIвгIвысипхьадза хвы йзыбара, дзачIвызлакIгьи пIатIу йыквцIара – Томас антахьгьыт дгIарылызкIгIуз хIальын. Афильми ауи афыри рыхьыз шгаз ауырата уаквчважва йауаштI.
Йауашызтын, ари абзагIвра афыр йузакъвымхуашта тшалазырпаз агIвыхьызкIлагьи хIйыпхьалапI, йауа ухIварыквын КIвакIваскьыр Томас ауаъа йнанаркIыта йынцIра ацIыхъвадза КIьахIба ХIаджьрат йыхьыз гIайхъхалтI. Асквш 1975 агIан «Башлыкъ шкIвокIва» Совет Союз апны йгIадырбатI. Ауи уагIата мильуан 20-гIв райхIа апшын ауи агIарбарала апхъагылара змаз акиноква йрыуазакIхатI. Йапшуан ауи агIвыма къральква рпынгьи.
Афильм ауагIа йыргвапхун. КIьахIба ХIаджьрат апшыгIвчва бзи дырбатI, ацIбацIбагIвчвагьи дгIалыркIгIатI. Ауи йтурасы ауагIа рфыр йгIарбагата, ахъахвитра йасимволта йалтI.
«Башлыкъ щкIвокIва» сапшытI. СлахIвараква сгвы йгьсзытаршвум. ЙалкIгIата сгвы зымгIвалагьи йхвгIатI афыр хъада… Ахъахвитра бзи йбауа, дырзымрыхъвауа, ащхъаква руагIи йпсадгьыли анцIрала дрызцIабыргта… Актер ХIаджьрат ауи аъарала угвы днадзауата дгIайырбан – ауат агIвыджь алухырныс баргвыпI. Задгьыл йапаз, ащхъаква рпны йбзазаз йапхъанчIвиква йагъьыз рхIальква зылазкIыз… Акино аквчважвараква срыпхьауата ари апш санйатI: «АщхъагIвчва – къару мчыпI»… ХIаджьрат йунашва анухIвауа ауи акIвдзапI йшубауа… Йара актергьи йара ауаса йзухIвушта даъапI… ХIаджьрат фырта даналадзра угвы цIолата йгIанахвитI. Афильм анадзара бзита йгьгIатарымцIатI акIвмызтын. Ужвыгьи зны сапшыхрын…»
«ЙалкIгIата сгвы йхвгIатI актер хъада КIвакIваскьыр Томас, ауи йфыр йызхъауцIауата дгIайырбитI, уыззынамдзуш нчвата угьипшуам» («Freie Welt» марагIайырта-герман газет, асквш 1976 – аредакция ррытаразга).
«ДгIаг у-Нина»
Зыхьыз хъара йгаз актер ахIвссаква дырхъацIахарныс рыцIагьи йайхIвапсауа дцатI. ЧIыдазапI йухIварныс Томас дызгвапхуз пхIвыспа щардагIв шйыкIвгьагьашуз. ЗъарагIвуда зхабар газ ХIаджьрат йыгIвзачви йзаъачви пхIвыста йызгIаргуашыз. Ауаса йшгIацIцIызла, ауи йгвы Нина лыхьызта украина пхIвыспакI лыхъаз йтыртыруа йцахьан. Нина ауи данстудентыз ацбзазарта апны длабадыртI. ЗгIальаматраква аквшвуз ачкIвынни апхIвыспи ласыта йаргванхатI. Нина Иванов Ипполит йыхьыз зхъу амузыка училища дапхьун. Ауаса аъахIыльчва йрыбызшвамыз таца зынла дгьрымуытI. Жвасквша Томас йлахIваракви йчхIари андырхъвых амщтахь акIвпI ауат йанырхIва: «ЙауитI щта, дгIаг у-Нина!»
Абарауаса ХIаджьрат тгIачва гIанйыршатI. Насыпла йыргIвыз анакьахI хгIвысабичва гIахъшахъыцIтI. Йапхъахауата йрауыз ХIаджьрат-хIва йыхьырцIатI. Ауи йыщтагIайтI Алхаси Марии. Ныбыжь нызцIхьаз йгIариква раба дангIаргвалашвахуа ргвква гIалалитI. ЙырхIвахитI раба энциклопедия, «Адуней агьагьара» журнал аномер шIыцква дшырзапхьалуз, рпны дара-дара концерт шакIвдыршуз, ахъвлапынква пхата йгьи кьахвта йшыргуз, раба ахыгIвгьи дшраргваныз, йалкIгIата айцIба Мария йпсы шлылаз.
АгIвычIвгIвыс дуква рабадырра
ХIаджьрат йгьихъазым Томас кино апны зтурасыла дгIахъвмарыз. Хъадамызтынгьи угвы йгIатахауата йаъан ауи Попков Владимир йхъихыз «АхыгIв рыгвква» апны йгIайырбаз атурасы. Афильм Довженко йыхьыз зхъу акиностудия апны аэкран йаквдыргIапстI. Араъа ауи Лондон Джек йроман афыр хъада лаба Солано Энрике йтурасыла дгIахъвмартI.
Зыхьыз дута йгуз актерква Хмельницкая Алена, Жигунов Сергей, Шевельков Владимир, Кваша Игорь датшагьи апсуа актер йаргванхатI, уадыргIвана ауат рыуа азджьакI сасра-тшпсщара йызгIайлун. Томас датшагьи йбергьльу гIвзачвала тшйырду йауашын. Искандер Фазиль йхъатала ауи йпны дсасытI. Анйара агвы йгIатыцIуаз, йауыраз айчважвараквала, айшва йгIаквдыргылуаз ашарабзараквала зымгIвагьи ргвы йгIатахатI. ЙалкIгIата асас йгвапхатI апшвыма йара йгIайкIыта йрыдзыз алосось. Ашварацри апслачвакIри заман щарда рзалихуан. Ауи километрпхьадзара амидата пслачва йкIуа амш анигуз тшпсщарата йзалуан. ЙгIайкIыз йзаъачви йыгIвзачви йдирыфныс бзи йбун.
ЙуачIвхуз айсра гIалагатI
Асквш 1972 август агIан ашвахIварали гIахIврали АкъральыгIва ансамбль йызкьазууыз гастроль рымата Греция йцатI. УагIала йырчвыз апещдуква Апсны йауаз артист джьащахъваква пхата йнардасуан. Аншлагква, анапIасра дуква, арайгвараква, йызшымтаз асцена бзазара. АжвгIванд шцкьаз йгIаддызшва ауат йгIарадзатI рцри Апсны жвамшкI цIуата амца йшалу, СогIвым агъа йшикIыз ахабар. АнгIалраква, ахачIвборчква, апшыгIвчва, пасата йамцIырчIвахьаз абилетква… Ахъачваква ъанквынхатI, ахIвссаква рыладзква хъыпI, асцена угIаквылра атахъыпI, апшыгIвчва рызпшитI. Ауаса ушпагIаквылуаш? Угвы йшпауаш? Томас йымхIвакIва йамуашта йпхьадзауа ажваква йхIвитI. Араъагьи фронткI йшапсу, ари ахъвлапын йрызхъазцIата йрызгIайыз апшыгIвчва йрайжьата амаль шамам. Рпсадгьыл ахъаз йабакIуата зыхьыз атурых йгIалазжьырныс йахадзахьаз афырква рджьабауата астадион шабгаз аладыргылтI, дакъикъакI йдзыргIвын агвып аконцерт джвыквырцIатI. Щымта щажьыта йгвжважвауа Греция йгIатыцIхтI. Рпны айсра цитI, ртгIачваква йырхъазыпI, йаладзхьаз аъапI. ЙангIайх Томас Бзыб кыт йауата абджьар ззыкIуаз адикIылын унашва рхъицIауа айсра дпшцIалтI. Айсра ачвгьараква зымгIва дрылсуа йызхъазцIаз йкытлагIвчва, йыгIвзачва, йайщчва айгIайрадза рапхъа дгыла дцатI.
ЙцIыхъвахауата
Асквш 1994, айсра бзидздза цIуата йалгахьатI. Ауаса аъащаква аквыргъвгъвараркIвапI, тшуырльальата амаль гьамам, агьагьарала йыншауа шварагIварапI, фырта тшыкIра атахъыпI… Йара акомандиргьи йгвы гьтынчым. Грузия амажа ахьыла ужвыгьи зны данцушыз апхъала Томас йцри кыт Бзыб апны йаргванкви йцрикви дгIархъыкIвшитI. ДрызцатI рткъвым ахIбачвагьи, айцIбачвагьи. ТIакIв анцIра акIвпI зымгIвагьи йанырдыр ауи… дъагIахънымхIвыхуаш дшцуз. Йгвы закI шыншушыз гIайнахIвуан, ауаса йпсадгьыл, йуагIа, йыдзхъагылата йайсуаз йыгIвзачва йрызйымаз абзибара, йара йыгIзаща ауаъа дымцарныс дгьадымрыхвитуазтI. Дшцузымца СогIвым апны афилармония адзхъа дгIашIастI. ТшытракI ансамбль йауаз йыгIвзачва драчважвитI, ари йцIыхъвахауата дцауата, уацIыхъван дгIайхта бзи йбауа ауыс, асцена, агвып дрызгIайхырныс йыргвыгъитI.
Сквш 51-хауата днайуата, амажа ахьыла дшцузымца Томасгьи йыгIвзачвагьи амина йахъанагитI. Йрымдыруаз машинакI амгIва йапырагылан – абензин йалгатI. Томас йгвы мгIвауата анкъвцагIвы дицхърагIарныс йтахъыта амгIва адзакIьала мачIкI дыквцIтI. Йыздыруазда ауат аметIрквакI шракIвыз ауи йбзазари йаджальи йрызбжьаз.
«Томас йапшу ауагIа урызсакъра… йхчара атахъын», – йхIвитI нашхыйадза атгIачва рыгIвза Мыквба Анзор.
Арат фыррала, кIкIарала, хъыччарарала, нашхыйарала йырчву агIаншараква – ауи агIвычIвгIвыс джьащахъва йбзазара йдучвам йахъвыкIта акIвпI йшаъу. Угвы цIукIгIауа ухъвыцитI: зъарайа ужвыгьи ари Анчва йхъвы злаз артист, агIвычIвгIвыс хIальаль йхIвушыз, йгIадзынгылуа абанпара йдйырдыруашыз? ХIфыр ймагIныз рыцIа цIолата йхIылахIхIвара ахъаз хIара ауи йыгIвзачви йцрикви щарда хIрачважватI. Ауат йацшIакIта йырхIвун ауи йапш гIвычIвгIвыс шаъахым. ХIара ауи дызлаз афильмква хIырпшуанта йгIахIгвынгIвуан… ауи йапш фыр шаъахым. ХIара атгIачва ркIартква хIырпшуанта йгIахIгвынгIвуан ари атгIачва рыхъазла ауи йапш абагьи хъацIагьи шаъахым. ХIара ауи йбаритон пшдза хIаздзыргIвуанта йгIахIгвынгIвуан ауи апш бжьы зынгьи йшхIымгIахуаш.
КIвакIваскьыр Т. йхIвуз ашваква (Апсны арадиуа архив йгIалхпI)
«Мцата йбылныс йшхвиту»
Томас щардала йхIвалуз, бзи йбуз ажвата йыман: «Амца аҧырҧырҳәа иахысаат». Ауи датша бызшвакIла амагIни алахIваракви уымрыдзуата йгьузыхIвушым. «Мцата йбылныс йшхвиту» рыцIа йаргванхуштI. Ауи ласхIварата, йаргьи дгIамачвыста мцата далашвауазшва йхIвун. Йбзазарагьи йара ауаса йцатI: ласыта, йачIвата йкIкIауа, мцата йбылуа.
P.S. Ужвыгьи хабар хвыцкI. Ауи магIын дукI азубушта йаъамызларнысгьи ауыпI, ауаса сара йсымаджьащахъвахатI. Томас лаквакI йыман, ауат зымгIва йара хьзыкI акIвын йрымаз – Джульбарс. Ауи сымагIальаматхан йынкъвсцауамцара джьащахъвакI гIаздыртI. Джульбарс зхьзыз ала атурых бергьльыта йгIацIцIтI. Абашта айсра ду (асквшква 1941-1945) агIани ауи аналгабырги мина гIазауаз алаква зыхьыз атурых йгIалахазгьи рылан. ФгIвыла йымчыз Джульбарс уагIа щардагIв гIанахчатI. ЛахъвгIахъасракIла Томас йынцIра шIызчIваз аминагьи Джульбарс йгIанайауара атахъызарын, ауаса ауи гьйыцымызтI…
швталра йа тшаншвцIара атахъыпI.