Согъвым аквта гIарбарта зал апны Мыквба Зауыр йсуратква ргIарбарта гIахъыртIытI. Ауи асуратгIвгIвы йысквш 75 йадахIвуата йадыргалтI.
Барганджиа Саид
Согъвым апны апсыуа суратгIвгIвы Мыквба Зауыр йынхараква ргIарбарта апщаша май а 2 атшын йгIахъыртIытI. АгIарбарта асквш 2019 агIан сквшы 75 зхъыцIыз асуратгIвгIвы ъаза йюбилей йадахIвуата йадыргалтI. Ауи йапшым асквшква рагIан дыздынхалыз асуратква акъала хъада аквта гIарбарта зал апны йандыргIалтI йгьи ауат апшыгIвчва гIальаматра ду рзырбатI.
Асуратква уырпшгIвацауа йахъазымкIва йухвгIагьи ауаштI: аэкспозиция йгьи гIарбартапI, йгьи джьармыкIьапI. АсуратгIвгIвы йынхараква рызджьакI Европа ахъатачIв галереяква рпны йынкъвыргитI.
Автор йгвы хътIыта йшихIвауала, йалкIгIата дзыргвышхвауа нхара щарда ззынайырхаз йпсадгьыл Апсны акIвпI.
«Ари агIарбарта апны йаныргIалу йрыуата «рыцIа йахIбадзу» сынхара асквш 1978 агIан йсчпатI. Ауи графика амальла йчпу пейзажпI. Сара йапшым амальквала, ашвыгаквала сынхарныс бзи йызбитI. Швабыж йсгвапапI агIарбарта ауагIа гIальаматра ъазырбауа. Араъа сыгIвзачвагьи щардагIвыпI, ауат йсыцыркIырныс йгIайтI», – йхIвитI асуратгIвгIвы.
Апсны асуратгIвгIвчва радкIылара аунашвачпагIв Джениа Виталий Мыквба Зауыр «асуратгIвра амаэстро» – хIва акIвпI йунашва шихIвауа. Ауи йшгIаликIгIазла, асуратгIвгIвы сквшкъомкI цIитIта «йыршIыйара ахIагIара ауи абзибагIвчва йджьадйырщитI, йаргьи Апсны апны йагъьу асуратгIвгIвчва дрыуазаджвыпI».
«ХIызпшуа анхараква цIолапI. Ауи йпейзажква уыла йгIанакIитI, йанакIвызлакIгьи лкIгIаракI гIарныпщитI», – араса йпхьадзитI Джениа Виталий.
АгIарбарта май а 15 атшындза йакIвшуштI, ауагIа ауаъа хвыдъа йнаржьылитI.
швталра йа тшаншвцIара атахъыпI.