Адуней апсуа-абаза конгресс арыпхьарали жвлара джьгаррали згIвадарахчарали ахъвшара (ОСАЗ) Апсны Республика згIвадарахчарала а-Министерства ацхърагIарала акыт апхьартаква рапхьагIвчва диспансеризация йгIакIылрщтрала проект джвыквнажьтI.

Йапхъахауата айъазагIвчва апхьагIвчва йырпшырныс йъацаз Ткъварчал район йаланакIуа Бедиа кыт акIвпI. Адиспансеризация гIвбата йшIчIвата йадыргалтI: йапхъахуз амш Бедиа аквтанай апхьарта апхьагIвчва рща дырхъвыхырныс йарттI, йгIвымшкIхуз анализ агIарбараква рымата айъазагIвчва гIарддырпшытI.

АпхьагIвчва йгIарпшытI айъазара-профилактика педиатрияла Апсны Республика згIвадарахчарала а-Министерства аъачIвагIагIв хъада Гуниа Эсма, ацIайквагьи адуквагьи йырхьпшуа аневролог, УЗИ диагностика зчпауа, «Альба-Мед» Медицина квта аунашвачпагIв Ходжава Альбина, амедицина ахщчваква Баркалая Илони Какубава Эмми, аофтальмолог Саншулиа Фатима, арентгенолог Берзениа Аслан йгьи аотоларинголог Эшба Лана. Аща рхъвыхраква зымгIва «MedLife» лаборатория йакIвнаршатI.

АААК арыпхьарали жвлара джьгаррали згIвадарахчарали ахъвшара (АААК ОСАЗ) аунашвахъцIагIв Хагба Изольда диспансеризацияла апроект акытгIвацаква рапхьагIвчва рахIа згIаланамкIуа гIахIалхIвтI.

«АзгIваква райхIара пасата йгIаудырырквын рыцIа майрата урайъазитI. Ковид апандемия, йшыгIдыруа апшта, ауагIа рзгIвадара щаквнарыстI – асабиквагьи алата. Диспансеризацияла АААК апроект акыт хъараква йырту апхьарта йцауа ацIайква рпныла хIгIалагатI. Апроект анлыхIхуаз хIара Апсны айъазарта пхатшаква райхIара ъаныргIалу акъалаква рпны шакIву гIахIпхьадзатI, кыт щарда рбзазагIвчва медицина цхърагIара рауырныс лшарата йрыму рыцIа ймачIпI. Ауи йгIалцIла акытква рбзазагIвчва айъазагIвчва йаназаману тшгьырзынадырхум йа йгьрызцадзум», – лхIватI Хагба.

Ауи йшылхIвазла, апроект ауысла АААК Апсны Республика згIвадарахчарала аминистр Бутба Эдуард тшизынанархатI. Аминистр ари агIаджвыквцIара магIын ду амата йпхьадзан дацхърагIарныс йаквикIтI.

«ХIшангIалыз апшта, а-Министерства ауыс техникала йацхърагIитI, айъазагIвчва гвыпквагьи аднагалитI, АААК адгалра уысква ахъвдаквпI, акврыдзраквагьи йара ахчала йхънагIвитI. ХIара диспансеризация ашIчIвараква зымгIва штшырзадыгIгалуашыз ауысла збжьагажваквала йгIахIцхърагIаз аминистр йтарагылыгIв Делба Саиди апедиатр Гуниа Эсми швабыж хIырзыразпI. ХIара кьангьаш гьазгIагIгуам ари хIпроект шатахъдзу, йаназаманугьи йшакIвхIыршауа, йыгIдыритI ауи хIуагIагьи хIкъральыгIвагьи цхърагIара бзита йшырзалуаш. УахьчIва хIсабиква рзгIвадара чIыдала хIахьпшрыквын уачIвы хIыжвлара рыцIа йызгIвадазлуштI», – йгIалылкIгIатI Хагба.

АААКи Апсны Республика згIвадарахчарала а-Министерстви ари анархарала рацынхара магIын ду шаму гIалылкIгIатI апедиатр Гуниа Эсмагьи.

«АААК ауысхагIвчва акытква рапхьагIвчва диспансеризация йгIакIылщт йшауаш ауысла Апсны Республика згIвадарахчарала а-Министерства тшназынадырхатI. Ари апш проект адгалра йгьи йакIвыршара йатахъдзата йспхьадзитI. АйъазагIвчва йапхъахауата йъацаз сабита 50-гIвы йырпшытI. Апхъахьыла йхIгвыгъапI Апсны анахьанат акытква рпынгьи апрофилактика рхъвыхраква акIвхIыршауамца апхьарта йцауа ацIайква рзгIвадара кIарата йацакIуазтын гIахIхIырдырларныс, ауагIа амедицина хьпшраква йахъдымрыпауата йшгIаркIылслуш рахIхIвларныс», – йгIацылцIахтI ауи.

АААК ОСАЗ анхагIвы Хьышба Науыр йшихIвауала, апхьарта йцауа ацIайква рдиспансеризация АААК рахIа йпхатшу йгьи щарда йахву апроектква йрыуазакIыпI.

«Ужвы хIара Бедиа кыт апны йхIчпаз анахьанат рпынгьи йхIчпарныс хIпырапI. ХIара мзигIадзапхьадзагьи гIвкыткI хIцауамца асквш ацIыхъвадза апхьагIвчва 1000 йырдхIырпшра хIгвыгъапI. УахьчIвала Апсны акытква рпны апхьарта 111 нхитI, ауат рпны сабита 10000-гIв апхьитI», – йхIватI Хьышба.

Ауи ари анхара щарда шгIацIанакIуа, а-Конгрессгьи апроект йацызкIта ахчала йацхърагIуш ауагIа йырзыпшгIарныс йшхIазыру гIаликIгIатI.

«АуагIа гвалымста йшгIанымхауа йаквшахIатхауа ашвапхаква щардапI. АжвапIта, СогIвым йаъу MedLife лаборатория аунашвачпагIв Ахуба Лариса лгIаджвыквцIарала айъазагIв йатахъыта йанщаквйыргылра апхьагIвипхьадза йща ужвыгьи гIарбараквакIла ласыта йуырхъвыхырныс йауата лшара гIараутI. ХIуыс йгIалалтI Гагра йаъу «Альба-Мед»  Медицина квта, ауаъа йгIахIыртыз анхагаква сабипхьадза йзгIвадара апхъапхъа йшлыхIхыз ацкIыс рыцIа цIолата йхIырхъвыхырныс хIылдыршатI. Ауи йайхIахугьи – амедицина квта адиректор Ходжава Альбина лхъатачIв абадырраква гIалрысабапын аквта зцынхауа Москва йауу аъачIвагIагIвчва асабиква ркардиограммаква йырну хвыдъа йгIарнырхтI», – йгIаликIгIатI Хьышба.

Ахвыцквагьи адуквагьи йырхьпшуа аневролог Ходжава Альбина Бедиа аквтанай апхьарта апны апхьагIвчва йшырпшыз йалакIыта даквчважватI.

«ЙахьчIва йапхъахауата АААКи хIари йхъару акытква рапхьагIвчва медицина нархарала йалакIыта йхIырхъвыхра ахIатырла рдиспансеризация ацIыхъва хIтагылтI. «Альба-Мед»  Медицина квта амедахщчва хIыцта хIара Бедиа аквтанай апхьарта апхьагIвчва электрокардиограмма рхъыхIхтI, ауат йгIадырбаз Москва йауу акардиофизиологква йхIызгIанырххтI. Ауи акIвымкIвагьи абрахеоцефал артерияква (ахъвди ахъи рщаныкъвартаква) УЗИ амальла йхIырхъвыхын асаби невролог дахIырпшыхтI, флюорографиягьи хIчпатI», – лхIватI Ходжава.

Аневролог йгIалылкIгIатI апхьагIвчва зымгIва рпны ухIва ауашта, йалкIгIата апхьагIвчва хвыцдзаква рпны, неврология згIва шрылу йаквшахIатхауа апсахраква шгIарауыз.

«ХIызпшыз сабипхьадза йпны неврологияла намхъара хвыцкI гIахIаутI. Акласс айцIбаква рпны ачважвара тшауацIыхра гIахьшвитI. Аратква асаби апхьарта дыцIамылскIва йгIардырра атахъыпI. Диспансеризацияла апроект абзирала ари апроблема хIзыгIахътIтI, ужвы ауат асабиква хIшрайъазуш ацIыхъва хIтагылуаштI. Ауи йапшу ацIайква дасу йыквыргIапсу терапия гIалхIхуаштIта 14 сквша йырталындзыкIьа йхIырцуштI», – йгIацылцIахтI Ходжава.

Бедиа кыт аквтанай апхьарта адиректор Меладзе Ия апроект адызгалызгьи ауи йалаз айъазагIвчвагьи асабиква йъарпшыз ахъазла дшырзыразу лхIватI.

«ЙахьчIва хIара хIапхьарта АААК анхагIвчви згIвадарахчарала а-Министерства айъазагIвчва гвыпи гIайтI. ХIара диспансеризацияла апроект адызгалыз зымгIвагьи хIырзыразпI. ХIкыт абзазагIвчва щардагIв медицина профилактика йгIакIылсларныс гьрылшум. АпхьагIвчва анализква рчпатI, атерапевт, алор айъазагIв, аокулист гIарпшытI, рентген, УЗИ, флюорография рхъырхтI. Зпны кIара гIарауыз ран-рабачва айъазагIвчва йрачважварныс лшара рыман. ЙгIазпшыз рызджьакI ашвъа йанырцIан рылапш йацIазлуштI», – лхIватI ауи.

Диспансеризацияла апроект амедицина квтаква ъаныргIалу акъалаква йырчвыхъару акытква рапхьагIвчва йнардзата медицина цхърагIара шрадзуш йазынархапI. Апроект адгалагIвчва хачIвыта йдыргылитI асквш 2023 ацIыхъвадза акытква рапхьагIвчва 1000-гIвы райхIа диспансеризация йгIакIылырщтныс.