АААК цхърагIара днарадзатI коронавирус пандемия ъагIаншаз ашвхIаусыгIвала фачIвы згхаз арепатриантква ртгIачваква. ЗымгIва шалу 126-гIв йнадзитI, ауат йрыуата гвыпкI рыцIа паса цхърагIара йахIвауата а-Конгресс тшазынадырхатI.

А-Конгресс архъйагIв секретарь Гицба Инар йшихIвазла, АААК апхъапхъа тшгIазынадырхатI Гвылрыпщ район йаланакIуа Агвыдзера кыт йтабзазауа арепатриантква, ауи амщтахь цхърагIара йазыбжу абзазагIвчва рпхьадзара дрытамамхтI. Атшазынархара йашвхIаусыгIвахаз Апсны апны акоронавирус шIкIгIара тшауацIнамхырныс ахъазла йнарахвыз ашIакIра амальква ракIвпI.

«ХIара ауат рахIвара ауысла Адуней апсуа-абаза конгресс ЙхIаракIу асовет аунашвачпагIв Эгьзакь Мусса хIйачважватI, ауи зынла йаквикIын ауыс шагвынхIыргIвуаш, хIабашталагIвчва цхърагIарата зъара рзадагIгалуаш, йшхIчпуш хIазхъвыцта хIадынхалырныс йгIахIыхъвдаквицIатI. Ауи амщтахь Эгьзакь М.ХI. афачIвква хIхвгIарныс ахъазла ахчата йатахъыз гIайщтитI», - йхIватI Гицба.

Ауи йшихIвазла, кIлатипхьадза йапшымкIва фачIвыта 18 квпшыракI раъара ташватI: шыла, нартыхв рыгъгъ, макарон, фачыгIв, хшхъгIа, манка, къвыд, томат, майонез, гIайыра масла, чай, кIартIоф. Гицба Инар йгIацицIахтI «акIлат» Москва апсуа диаспора апхъа йгIарщтийыз агречкIали апрунджьли йшнадырхъахыз. А-Конгресс ахьызла АААК архъйагIв секретарь дшырзыразу йхIватI «Апива адуней» фирма йгьи ауи ауысхагIвчва Зантариа Резои Ардзынба Ручеси, ауат афачIв «кIлатква» гIвквпшыракI рыцырцIахтI».

Ауыс йацхърагIатI репатриация ауысла Апсны акъральыгIва комитетгьи, ауат Апсны йтабзазауа арепатриантква рыхьызквала ашвъа надырхъахтI. ЙхIазырхаз ашвъа йаншвалтI Сирия, Трыквшта, Иордания, Лагъь КIавкIаз айщчва республикаква йгIартыцIхта Апсны йтабзазауа атгIачваква.

«ЗымгIвагьи ртгIачвапхьадзара йгIаквхта йацапшыта цхърагIара дхIрадзитI. ЦгIвы-быжьгIв йъанадзауа апны афачIвквагьи рыцIа йщардапI. ХIшырзыразула кIьыдата йгIалхIкIгIарныс хIтахъыпI агвчIагIвчпара адкIылара «Кьараз», ауат афачIв кIлат адыгIгалырныс ахъазла йхвгIара атахъу йашIыпхьадзата йхIдырбатI. ХIаргьи ауи хъадата йгIахIахвын датша фачIв квпшырала йнахIырхъахтI, абараса ауагIа хIырцхърагIарныс хIылшатI», - йхIватI йцIыхъвахауата Гицба Инар.

ФачIвы ззыршаз атгIачваква АААК йгьи Эгьзакь Мусса йхъатала йшырзыразу рхIватI.

«ХIара Сирия хIгIатыцIхтI, 14 тгIачвакI хIнадзитI. Араъа Агвыдзера апны хIбзазитI. ЙахьчIва хIара апсуаква, адгьаква, абазаква Адуней апсуа-абаза конгресс гIахIцхърагIатI. ХIара зымгIвагьи хIайщчвапI. Швабыж хIшвзыразпI. Анчва дшвзыразхатI! Анчва хIйыхIвитI швымч йалахIарныс, адахIвраква швымазларныс, швгвы йту гIашвыдахIвырныс. Анчва хIйыхIвитI а-Конгресс апны апсуаквагьи, абазаквагьи, адгьаквагьи тшадыркIылырныс. ЙгIаталыз амыз амсылманква зымгIва рыхъазла урычра мзыпI, Сирия апны ари амыз ангIаталра цхърагIара йазыбжу ауагIа йырцхърагIитI. Шваргьи ауи гьшвхъмаштылтI. Анчва швымч йалайырхIаргIатI, адахIвраква швымазтI!», - йхIватI Сирия йгIатыцIхыз арепатриант Йаган (Маан) Мамун.

Аразыра ажваква йхIватI арепатриант Лушба Фадельгьи.

«Ари йбаргву агIамта апны йгIахIцхърагIаз зымгIвагьи хIшвзыразпI. ХIара ауи хвду аквхIцIитI, ауи адызгалыз зымгIвагьи Анчва дшвзыразхатI. Ужвы хIызтагылу азаман апны йубитI айщчва шацацхърагIауа. А-Конгресс аунашвачпагIв Эгьзакь Муссагьи ауи анхагIвчвагьи сшшвзыразу швасхIвырныс стахъыпI», - йхIватI арепатриант.

Апсны апны акоронавирус ашIашIкIгIара згIва COVID-19 атшауацIыхра абакIра йацхърагIарныс зтахъу зымгIвагьи амаль рымапI ахча аларцIарныс Апсны Республика апынгьи Россия Федерация апынгьи Москва апсуа диаспора абанк реквизитквала йа«ХIара хIадгылтI» мгIвайсраареквизитквала йгьи Трыкв Республика ахьыла Адуней апсуа-абаза конгресс ареквизитквала, йа а-Конгресс асайт апны онлайн амальла ахча аларцIарныс. Ахчата йгIаталуа зымгIва Апсны абзазагIвчва рынцIри рызгIвадари ргIахчара йазалхта акоронавирус ашIашIкIгIара згIва COVID-19 абакIра йазынадырхуштI.