АААК Ан-абачва рклуб алачIвараква Гагра апны йакIвнаршауаркIвитI. Ари азын ауатыкв йгIатаргатI ацIайква йапшым аныбыжьква рагIан йырпщылу абаргвыраква, асаби ушйангIалуашгьи йаквчважватI.
Кирвал Камила
Адуней апсуа-абаза конгресс Гагра апны Ан-абачва рклуб ужвыгьи алачIваракI аднагалтI. Декабрь ахъа йакIвшаз анйара ацIайква йапшым аныбыжьква рагIан йырпщылу абаргвыраква йырзынархан.
Аклуб агьагьара апхIвыскви асабикви йырзагIвыршатI. АцIайква кIьыдата йрыдынхалуан, апхIвысква руатыкв апны апсихолог КортIуа Элана щарда цIуата унагIвара йалу анчви ужвы саби дзауырныс йазпшуа ахIвсси драчважвун.
А-Конгресс анхагIвы Хагба Изольда йапхъахуз алачIвара йалакваз ужвы рыгIвзачвагьи гIардта йшгIайыз анылба гвыргъьарата йталцIаз хIыцагIвылшатI.
«ЙахьчIва ан-абачви апсихолог КортIуа Элани магIын ду зму ауыс гIащтIырхтI – ацIайква йапшым аныбыжьква рагIан йырпщылу абаргвыраква. Ауи щардагIвы йрымагIальаматта йгIацIцIтI. Айззара йгIадгылыз апхIвысквакI хгIвы-пщыгIв сабичва рымапIта ауат рпсихология шщаквгылуа ашIдырпшы йауитI, баргвырата йызшIашвауагьи рбитI. ЗымгIвагьи йырдыритI асаби сквшыкI, хысквша, быжьсквша, жвыхвсквша данырталра йапшым апсихология баргвыраква шгIаншауа, ауат ауи йщагащаква рпынгьи штшгIадырбауа», – йгIахIгвалалыршвахтI Хагба.
Апсихолог КортIуа Элана АААК Ан-абачва рклуб апны йапхъахауата дгьгIачважвум. Ан-абачва ауи йлынйапхьадза йзызцIгIуш рщардапI.
«Гвы ашвтзапI ан-абачва айчважвара джьгарта йшалу, ргвы йту шырхIвауа, азцIгIараква шгIащтIырхуа – ауат айчважвара рымаджьащахъвапI. Швабыж йугвапапI ауат асабиква ргIзара-бжьара, ртшауацIыхра йырпщылу ауысква гвалымста йшырзаъам анубауа. Саргьи ауи саргвышхвитI, саргвыргъьитI», – лхIватI апсихолог.
КортIуа Элана йгIацылцIахтI ауи йгIалцIла анйара йалакву драчважварныс шылзымайру.
Лобян Перуза пщгIвысабичва гIадзынлыргылтI, ауат йгIадрихыз агIвысабичва драндупI. Перуза лпхIайцIба Камила лзгIвадара йшылтахъу апш дгьарыпIатIауам. Ауаса ауи атгIачва ргвы гькIанарыхIум.
«СгIариква духатI, ауат рсабиква срылапIта шIыц-шIыц абзазара саланахIвахитI, сцIайква шгIадзынгылуаз гIасгвалашвахитI. ЙахьчIва айчважвара щарда срызнархъвыцтI. Асаби йзгIвадара данащахIауа атгIачва датшата йбзазауа, абзазара датшата йапшуа йабжьитI. АгIвычIвгIвыс ага дымчызтынгьи ари йапшу анйараква адгаллара атахъыпI, ан-абачва ауат швабыж рпсы гIатаркIитI», – лгвгIанаграква хIыцагIвылшатI Лобян Перуза.
Аклуб алачIвара йалан ацIайква йапшым аныбыжьква рагIан йырпщылу абаргвыраква бзита йыздыруа апхIвысква. Ауат дрыуапI Гагра апны АААК Ан-абачва рклуб айззараква зымгIва йрылазлауа, гIвсабичва зму Пичугина Мира. Ауи йшылпхьадзауала, ага абзазара уабжьахьата уаъазтынгьи аъачIвагIагIвчва ухъатала урачважварныс лшара уауазтын йагIвщтра гьатахъым.
«Ага щарда гIгIарыгьи, йыгIдырыргьи – абараса уабабауа уанайчважвауа швапха амудитI, Элана лакIвпIта – данчважвауа «слыздзыргIвында»-хIва учIвапI. Сара ужвыгьи зны багъьата йхъасцIатI ан-абачва «абаргвыраква йгIарылызгуш» бжьагажва йлыхта йшаъам. ЙгIасгвынгIвытI абаргвыраква аныбыжь йшапщылу, ауат асаби йшйызхIауа йшаквшахIатхауа, уырчвырхIарагьи шатахъым. Зны дкъвинарухузтынгьи – кIара гьалам, ауыгьи йшуылшауа апш абзира йазугара атахъыпI», – лхIватI Пичугина.
Ан-абачва ауатква йъадзарылачважвуз асбиква рхъвыцща, ачваквпшыраква шырдыруа гIадырбун. Арт-терапевт Чхаидзе Тина ауат ачваквпшыраква тамамта йшалдыргуш йазылбжьун, асабиква ашвыга зигIваква гIардыруан, йшрыпхьауа рхIвун, йашIдырпшуан.
11 сквша йырту Хагба Илларии Кецба Самири рнашхква рнапIылачпараквала йгIадырбатI.
«ЙахьчIва хIара амзагIвцIла пшдзачкIвынква, асыхаква хIчпатI, ауи ауыс хIаларкIвапI. Са схаритI, афетр садынхалитI, цIыпх сыха счпун. Ашвъабгъьы гIахIахвитI, йхIыму аджыпхала адзакIьаква гIатхIырситI, йаквцIлахIыркIыхитIта йанбаххра йауацIыхIххитI», – йылчпуз гIахIгвынлыргIвытI Иллария.
Самира тшъадзалбжьуз лащайцIба Банрат дихъпшылырнысгьи дахадзун – ачкIвынхвыц дгьызгIвадам. Самира ауат бзита йшабагвынгIвуа гIахIалхIвтI, атгIачва зымгIва джаз йаздзыргIвныс бзи йшырбауагьи хIзыгIахъылтIтI.
«ХIара ауи хIпсы йалапI. Багратгьи, хIащахIбагьи, хIыммагьи, саргьи джаз бзидздза йыгIбитI», – лныбыжь йаквнаумыргушта гвыбзыгъата дгIахIачважвитI апхIвыспа.
Анйара шакIвшаз даквчважвауата Хагба Изольда ан-абачва рлахIвараква гIалырбатI: ауат аклуб апны рыцIа щарда йанйаларныс ртахъыпI, арат йрапшу анйараква сабапра ду рылапI йгьи йджьащахъвапI.
«ХIара хIыхъаз ауи гIатгара дупI йгьи хъардугапI, йауа ухIварыквын Адуней апсуа-абаза конгресс асабикви ауат ранчви рабачви йырпщылу апроектква йырцхърагIитI», – йгIалылкIгIатI Хагба.
ЙащтагIайуа, сынчIва Гагра апны йцIыхъвахуш АААК Ан-абачва рклуб анйара декабрь аквта агIан йакIвшуштI.
швталра йа тшаншвцIара атахъыпI.