АААК Апсны акультура апны гIатгара зму анхагIвы, агIвгIвы, «Ахьдз-Апша» орден II ахIагIара анкъвгагIвы Аббас-оглы Адиле апрель а 23 атшын йлыртлапIаз й-99-хауа лйымта мшла йлайхIвахIвтI.
Барганджиа Саид
АААК ауысхагIвчва гвып апсыуа уагIа рыгIвычIвгIвыс ду Аббас-оглы Адиле лйымта мшы апрель а 23 атшын йлызцан йылхъыцIыз асквш 99 ахьызла йлайхIвахIвтI.
Аббас-оглы Адиле лунагIва апны Адуней апсуа-абаза конгресс ащтийыгIвчва пхата йгIарпылтI, угвы йалалуа Адиле лбзазара ахабарква йрыздзыргIвытI. ЙгIалкIгIара атахъыпI ари атшын асасчва турых магIны зму азал апны йшдрайгваз. АтгIачва ари апещ арчIаджьра гьхъатаркIуам закIгьи тшампсахуата апхъала йшаъаз апшта йгIащаквырыжьныс ахъазла. Ауи абльынква «йырдырхитI» Лакоба Нестор йхъатала дызлаз айчважвара щарда йгьи атгIачва хъвлапынква.
Лныбыжьла ага днаскIьахьазтынгьи Аббас-оглы Адиле йанакIвызлагьи асасчва драйгвыргъьитI йгьи гвапата дырпылитI. Аббас-оглы Адиле АААК рщтийыгIвчвагьи йарауаса ажва гвапала дгIарпылтI: «Бзи швызбитI, Анчва дшвзыразхатI швъагIайыз, Анчва дшвзыразхатI съашвхъмаштылуа. Бзи швызбитI».
Ари атшын пIатIу ду зкву апхIвыс йлызгIайтI лцрикви ларгвандзакви. Ауат амаль рымата йгьагIвырщтуам р-Адиле ду тшлыкIвдыршарныс. Аргваныта йаъамыз, йызгIамикваз телефон йлызгIастI, ахIврапшдза шIахIваква лзыгIарщтитI.
«Мма дангIадри амш ангIаталра ахIвахIвракви ахIврапшдзакви щардапI. Ауи швабыж йхIгвапапI. МагIны ду азыгIбитI ауагIа дъархъмаштылуа, йалкIгIата йхIгвапапI мма лбзазара атурых йгIадзынгылуа абанпара гIальаматра ъазырбауа. Анчва дшвзыразхатI», – лхIватI Аббас-оглы Адиле лпхIа Льильа.
Адуней апсуа-абаза конгресс апхIвысква рсовет аунашвачпагIв Ардзынба Гета йшгIалылкIгIазла, швабыж амагIны дупI «турых гIамтакI йыргIвыгу агIвычIвгIвыс дуква» хIхъамштылуата йшхIылшауала йыгIбарныс, рыхьыз щтIыхIхырныс.
«Аббас-оглы Адиле апхIвыс лбагъьара ауысла дшвапха бзипI. Лылахь йаныз абаргвыраква, йткIьийыз архъвыхраква лчхIатI дгIарыцIсын сквшы 99 раъарагьи гIанылцIытI. Ари амш зымгIвагьи йацыхIчIву гвыргъьахъв дута йхIпхьадзитI, ауи акIвпI уахьчIва араъа хIызгIайыз. МагIны амапI ауагIа ауи лкнигаква йрыквгIацапахуамцара йрыпхьарныс, й-1930-хауа асквшква рагIан хIыжвлара рбзазаща шаъаз тшахадыргIвазарныс. Швабыж йхIтахъыпI хвду ззыгIбауа Аббас-оглы Адиле лысквш 100 ахьызлагьи хIлайхIвахIвырныс», – лхIватI Ардзынба Гета.
Аббас-оглы Адиле турых зхъырхIвгIауа Апсны асовет апхъагылагIв Лакоба Нестор йтгIачва дрыуапI, ауи йхъапщыла Лакоба Сария (лабаргIа рткъвымхьызла Джих-оглы) дылтацапI, атгIачва йрыуата абгата йгIанхаз ауи азаджв лакIвпI. Асквш 1938 агIан Лакоба Нестор йъахIыльчва дъарыуаз ахъазла «ауагIа драгъата» дырпхьадзан дыркIытI. Асквш 1953 агIан, дъатыргаз 16 сквша анылга амщтахь,
Аббас-оглы Согъвым дгIацапахтI. Аббас-оглы Адиле книга щарда дыравторпI, ауат йрыуапI лгIагвалашвахраквала йалу акнига «Йсхъаштылхырныс йгьсылшум». Ужвы Адиле Согъвым йтагылу лабаду йтдзы апны дбзазитI. ЙцIыхъвахауа амызква руацIа ауи закIгьи гьылбахуам ухIва ауашта лылаква ацакIтI, ауаса йшылцIасу апшта ауралагьи багъьара гIалырбауа йгIаталуа амш дапылитI.
Не мало времени прошло, как я прочла книгу Адиле Аббас- оглы «Не могу забыть»...Не возможно было сделать даже паузу пока не прочла от корочки до корочки. Очень долго была под впечатлением... Как можно это забыть??? Конечно нельзя забыть.
Адиле Аббас-оглы, с днём рождения Вас! Здоровья Вам и долгих лет жизни!
С почтением и уважением, Мзия Берзения
швталра йа тшаншвцIара атахъыпI.