Адуней апсуа-абаза конгресс ЙхIаракIу асовет йалакву АААК апандемия атлахан йшынхаз йаквчважватI.
Баргаджия Саид
Адуней апсуа-абаза конгресс ЙхIаракIу асовет аунашвачпагIв Эгьзакь Мусса ахваша, июль а 3 атшын, ЙхIаракIу асовет йцбахауа алачIвара акIвйыршатI. Ауи видеоконференцията йадыргалтI: асовет йалакву Москва, Санкт-Петербург, Черкесск, Нальчик, Ставрополь, Аджария, Астомбыль, Сакария йшаъаз Интернетла Согъвым апны йаныргIалу АААК ауысхарта тшапырщылтI. Уыста йызквчважваз Адуней апсуа-абаза конгресс COVID-19 згIва гIаджвыквлищтара нхарата йакIвнаршаз акIвпI.
АлачIвара джвыкврымцIаскIва АААК ЙхIаракIу асовет аунашвачпагIв Эгьзакь Мусса ауи йалаз зымгIва сальам пхала тшырзынайырхатI.
Ауи амщтахь АААК архъйагIв секретарь Гицба Инар апандемия атлахан а-Конгресс уыста йахаз гIайхIватI. Ауи йгIаликIгIатI АААК ЙхIаракIу асовет аунашвачпагIв Эгьзакь Мусса йгIаритыз ахъвдаквцIараква дырхъйауата Адуней апсуа-абаза конгресс ауысхагIвчва Апсны абзазагIвчва коронавирус йачвыхчарала анхара джьгарта йшалалыз.
"Апсны апны йткIьийу аъаща шаквдыргылуата унашва ангIацIцI асахIат йгIашIарышвта АААК анхара шабгу акъраль абзазагIвчва рзгIвадара ахчара йазынанархатI. Ауи апшта, АААК ЙхIаракIу асовет аунашвачпагIв Эгьзакь Мусса коронавирус уапшIагылра ахъазла йатахъу айъазага мачви хъахчага чгIвычи йхвгIан Апсны йгIариттI. Медицина нхагата йырхвгIаз Апсны азгIвадарахчара а-Министерства апны йгIандыршаз аштаб йдрыхIазырыз ашвъа йанырцIаз акIвпI", – йхIватI Гицба.
Ауи йгIацицIахтI а-Конгресс анхагIвчва гвып йапшым ауысхартаква адызкIылыз аштаб, "Киараз" гвчIагIвчпара адкIылара, "Адгылара" жвлара хабарргарта квта джьгарта йшрыцынхауа.
"Киараз" ауысхагIвчва йрыцта АААК анхагIвчва карантин ъадзаныз рахIа йкъвльейсызу атгIачваква фачIвыла йырцхърагIатI. АААК йаланакIуа ЧкIвыныргIа рсовет йалу ачкIвынчви ахIвсси ашIыпIаква рпны йазалху хъвдаквцIара змаз ауысхартаква йырцхърагIун, ауагIа азгIва гIарыдымсылра ахIатырла йчпара атахъу гIаргвындыргIвуан, ажвчIвква йырцхърагIун. АААК ахабарргарта портал апресс-секретарь Барганджиа Саид Апсны азгIвадарахчара а-Министерства апны йгIандыршаз, коронавирус апшIагылрала йапшым ауысхартаква адызкIылыз аштаб далан, аштаб уыста йахауа ахабар ауагIа йшырзынадзуш дацхърагIун. Апортал апны агIвыраква ргIатацIара адызгалуа Хагба Изольда ауагIа йрыларшуз ахъахчага маскIаква лдзахуан.
Ауи азаман ауацIа АААК Москва йту апсуа диаспорагьи (МАД) аргваныта йрабадыруан.
"[Апсны йызлацхърагIушыз] ахча ажвлара йазыркIкIытI, ауаса йанаъазара МАД анхара йапщылу ахабарква аргамта йчпара атахъын. Ауи анархара лыхъвда йхъалцIатI АААК апхIвыс советква рунашвачпагIв Ардзынба Гета. Ансимшы хабарта йаъу азыркIкIуанта ауагIа йддырдыруан, Интернет йгIатарцIун (инфографикагьи текстгьи ацыта)", – йхIватI Гицба Инар.
Ауи йгIацицIахтI ахъаркIьыдара агIамта агIан АААК фачIвыла йгIапсуз арепатриантква ртгIачваква йшырцхърагIузгьи. Ауат йшалу тгIачва 126 йнадзитI.
Ауатква зымгIва йрыццауата а-Конгресс анхагIвчва Апсны ашIыпIа хъвшараква руысхагIвчва йрыцта акытква рпны йгIаджвыквырцIаз апроектквакIгьи дырхъйун.
"Ауи йапшу апроектква йрыуапI Адзыбжа кыт апны апарк аныргIалра. [Ауи акIвымкIвагьи] Адуней апсуа-абаза конгресс анхагIвчва ауыс ахчала йгIацхърагIауа агвыпи дари Очамчыра район йаланакIуа Баслахв кыт йауу арыпхьагIв шIа тдзы йыргылырныс йцхърагIитI. Май а 21 Адуней апсуа-абаза конгресс КIавкIаз айсра азарар зквшваз ауагIа рджьабауата йшцIасхаз апшта амшын атшпы апны АщамакIа апсуа чвамзи НартргIа рымци адыркIытI. Адуней апсуа-абаза конгресс Атара, Пакваш, РекIа, Баслахв, АкваскIьа, Гвып кытква рпны асабиква рыхъаз агвыргъьахъвквагьи аднагалтI", – йгIашIипхьадзатI Гицба Инар.
АААК ахабарргарта портал аунашвачпагIв Лазба Амина апандемия атлахан агIан апортал анхара ахабарква рыргарагIваца йшазынархаз гIалхIватI. Ауи агIамта ауацIа АААК асайти асоциал сеткви рпны Апсны апны коронавирус азгIва апшIагылрали ауагIа хчарали ауысква шаъау гIазырбауа агIвыраква гIатарцIун.
"Ауи абзирала адуней шабгу апны хIабашталагIвчва Апсны апны СOVID-19 йшабакIуа ауысла шIыцрата йыншауа зымгIва рдырырныс лшара раутI. Йара ауи апшта АААК ахабарргарта портал апны Апсны ауацIагьи КIавкIаз шабгулагьи коронавирус гIаздысылыз рпхьадзараква азкIкIыта йгIаталуан", – лхIватI Лазба.
Апандемия йампшуата а-Конгресс апортал апны абызшва йазынарху апроект шIыц "Апсышвала хIчважвитI/абазала хIчважвитI" джвыкврыжьтI. Лазба Амина йшылхIвазла, ари аонлайн-проект абзирала абаза уагIахъа йгIарыцIанакIуа зымгIва йъабзазалакIгьи рцри бызшва рзырдыруаштI.
АлачIвара апны Адуней апсуа-абаза конгресс Аквта рхъвыхра комиссия йагIвсыз асквшла аотчетгьи йаздзыргIвытI. Ауи дгIапхьатI "Алашара" жвлара адкIылара Черкесск апны йгIаныршу ахъвшара аунашвачпагIв йгьи АААК Аквта рхъвыхра комиссия аунашвачпагIв Мыква Мурат. Ауи асквш 2018 май мыз йгIашIарышвта асквш 2020 май мыздза а-Конгресс ахча шгIадрысабапыз цкIы-цкIы йалыргата дгIаквчважватI. Мыква Мурат йгIаликIгIатI а-Конгресс амлыквнкъвгара йапщылу анхара шабгу зладыргалыз ахча а-Конгресс алазара ахъазла ашвачIвкви ацхърагIаракви йшгIарылырхыз. АуагIа дара-дара йгIаларцIаз ацхърагIараква сом мильуан 47-и зыкь 220-и йнадзатI, алазара ахъазла ашвачIвква – сом зыкь 33.
"Архъвыхра комиссия шапшуала, а-Конгресс афинанс-млыквнкъвгара нхара агIарбараква ауашта йаъапI. АдкIылара анхара алазырпIатIушыз мыгIвхъгаракIгьи гьхIымбатI. Гвбжарата йхIымакваз а-Конгресс абухгалтерия йырдхIырдыртI даргьи афинанс ъадаб рыбагъьарала чпачIвыта йаъу швъата йагвындыргIвыта архъвыхра комиссия йшазыгIарщтийуаш рахIхIвтI", – йгIачважвара алйыргатI Мыква Мурат.
"Алашара" анхагIвчва ареспублика аунашвачпагIвчва, а-Парламент, азгIвадарахчара а-Министерства, абаза кытква рунашвахъцIартаква рхъадаква, аполиклиникаква, ачымазагIвтара, абаза кытква рпны йаныргIалу айъазартаква рунашвачпагIвчва аргваныта йшрыцынхауа.
"Алашара", абаза кытква рпхIвыс советква, "Апсадгьыл" руысхагIвчва, акытква райъазартаква ркъарула асквш 2020 июнь а 3 йадахIвуата абаза кытква рпны коронавирус гIаздысылыз зъарагIвы йнадзауи хъвшвыти айъазага мачвати йатахъуи гIарддырдыртI.
ЙчмазагIвхаз йрыуата зтгIачваква рыцIа йкъвльейсызу 100-гIвы Эгьзакь Мусса йхъатала дырхъпшылитI. Йара ауи апшта АААК ЙхIаракIу асовет аунашвачпагIв КъЧР айъазартаквагьи йатахъу хъвшвыли нхагали дырцхърагIитI.
Аджария дауата Адуней апсуа-абаза конгресс ЙхIаракIу асовет йалу Лазба Натали айшыста йгIалхIватI Аджария апны уахьчIвала апсыуата гIвынызкьыгIв раъара шбзазауа, ауат апсуа жвла 55 йшрыуу. Ауи йгIалылкIгIатI Аджария "шта йачIвата" ахьыз шырхIваз – ауаъа коронавирус аджвырагIв йгIайыдсылта гьщаквдмыргылтI. А-Конгресс ауысхагIв йшылдыруала, Аджария апны чмазагIвыта йгIарауыз зымгIва ауаъа йагIвсуата йгIатанагакваз ракIвын – ауат зынла йдыркIьыдан азгIва тшгьауацIнадымрыхтI.
АААК ЙхIаракIу асовет йалу, КъБР апны йгIаныршу а-Конгресс ахъвшара ахъада Пшенокъва Владимир йкьазу ангIадза алачIвара йалакваз Къабард-Балкъар апны аэпидемия ауыс зкву йахайыргIвазатI. Ауи йшихIвазла, "аъаща хьантаркIвапI, ауаса апхын ацIыхъвадза йщаквгылхуашта угвыгъа йауаштI".
Ауи Къабард-Балкъар Республика апны йгIаныршу АААК ахъвшара апандемия атлахан акъвльейсызква йшырцхърагIуз йхIватI. Ауаъа йчмазагIвхаз рыхьызква ашвъа йанырцIунта КъБР азгIвадарахчара а-Министерства йрыртуан.
АгIачважвараква зымгIва цIхъва ритуата АААК ЙхIаракIу асовет аунашвачпагIв Эгьзакь Мусса йгIаликIгIатI ужвыгьи шварагIвара шIыц гIацIшвтуазтын ауагIа тамамта ахабар шырзынауырдзыш уазхъвыцра шатахъу. Ауи йхIватI коронавирус ауыс зквыз атамам ласыта йшхIымдыр, ауи гIдырзарквын, ажвапIта, Черкесск апны азгIва гIашIакIы йшауашыз. Ауи акIвымкIвагьи Эгьзакь Мусса йхIватI йащтагIайуа алачIвара зджьара йайззата йакIвдыршушта дшгвыгъауа, йауа ухIварыквын, "зымгIвагьи абагIагвалашватI, йаргьи уадзхъачIвата уанайчважвауа агалагьи рыцIа йагъьпI".
Адуней апсуа-абаза конгресс ЙхIаракIу асовет алачIвараква йахъымпауата йакIвшалитI. Ари апхъала алачIвара асквш 2019 октябрь а 16 атшын Согъвым апны йадгалан, ауаъа а-Конгресс уыста йархъйахьази апхъахьыла хачIвыта йгылуи – агIвыма къральква рабадыррагьи алата – йаквчважватI
швталра йа тшаншвцIара атахъыпI.