АААК ЙхIаракIу асовет аунашвачпагIвгьи апхъа дгылата йамайчуа акоронавирус COVID-19 абакIра ауысла Апсны йырцхърагIитI
Барганджиа Саид
АААК ЙхIаракIу асовет аунашвачпагIв Эгьзакь Мусса коронавирус абакIра йазалху амедицина ъамапсымакви ахъыхчара пкъыгIвакви Апсны йщтитI. АААК ЙхIаракIу асовет ахъада йхвгIаз амедицина ъамапсымаква абзазагIвчва акоронавирус шIкIгIара йачвхъыхчара ауысла Апсны азгIвадарахчара аминистерства апны йгIаныршу акъральыгIва штаб йгIайыртыз ашвъа йгIахъихтI.
«Адуней шабгу зташваз аъаща гьмайрам. ГвасрапI, ауаса авирус АпсынчIвылагьи йгIадзатI, ауаса акъральгIвчва, ажвлара адкIылараква йгьи акъральыгIва нхартаква рацынхара абзирала ареспублика аъащата йызту абгата йдырхъвыхитI. Ауыс зквула заджвгьи хъатакIла дгIанхушта йгьаъам, къарута йхIыму зымгIва адхIкIылта йхIпыру архъвыхраква хIгIарыцIсуаштI», - йхIватI Эгьзакь Мусса кьангьаш йыламкIва.
Ауи йшгIаликIгIазла, АААК ауысхагIвчва гвып акоронавирус тшауацIнахуа йаналага атлахан йгIашIарышвта рыцIа йкъвльейсызу атгIачваква йырцхърагIитI, ауат йрыуапI зпсадгьыл апны йгIахъынхIвыхыз абашталагIвчва ртгIачваквагьи.
АААК ЙхIаракIу асовет ахъада дшхъвыцуала, хIызташваз аъаща ахьантара айхIара зыхъвда йхъашваз айъазагIвчва ракIвпI.
«АчымазагIвква гIащаквырыжьныс ахъазла ауат рынхаща «24/7» ащтацащала йщаквгылата руыс йадгылапI. АчымазагIвква йрылахIарныс шауаш гIаупхьадзарыквын ансимшы йгIартахъхауата йыззыбжу апкъыгIваквагьи, ахъвшвквагьи, амедицина ъамапсымаквагьи рыцIа-рыцIа йщардахитI», - йхIватI ауи.
Апсны апны акоронавирус ашвхIаусыгIвала агвжважвагIва аъаща щаквдыргылищтара АААК анхара абгата акъраль абзазагIвчва рзгIвадара агIахчара йазынадырхатI. А-Конгресс анхагIвчва джьгарта йрыцынхауа йалагатI Апсны абзазагIвчва акоронавирус шIкIгIара йачвхъыхчара ауысла йгIаныршу акъральыгIва штаб, агвчIагIвра адкIылара «Кьараз» йгьи ажвлара хабарргарта квта «Адгылара».
АААК йапымшвтуата йрабадыритI Москва апсуа диаспора. Ауатгьи Апсны йгIацхърагIитI йыззыбжу амедицина ъамапсымаквала, ахъвшвквала, афачIвквала.
РыцIа паса АААК акоронавирус апандемия ашвхIаусыгIвала фачIвы згхаз арепатриантква ртгIачваква йырцхърагIатI: ауат йрыуата гвыпкI цхърагIара йахIвауата а-Конгресс тшгIазынадырхатI, цхърагIара задзаз зымгIва шалу уагIа 126-гIв йнадзитI.
Апандемия ъадзану АААК ахабарргарта портал анхаща тшапсахтI – адуней акъральква йырту абашталагIвчва рыхъазла ашIыцраква аднагалуамцара Апсны абзазагIвчва акоронавирус шIкIгIара йачвхъыхчара ауысла йгIаныршу акъральыгIва штаб
агIарбараква йапымшвтуата йднардыритI.
УахьчIвала апандемия атлахан шабгу агIарбараквала, Апсны апны COVID-19 гIазахвыз акъральгIвчва уагIа 28-гIв йнадзитI, 23-гIв бзихахтI, заджвы дпсытI. ЙчмазагIвхаз зымгIвагьи айъазагIвчва Гвдауыта чымазагIвтара апны йырхьпшитI.
Май а 30 атшын Апсны Республика апрезидент мачвы зцIайцIаз ащаквыргылра йшгIанахIвауала, апхъала йнарахвыз ашIакIра амальква июнь а 15 агIандза рпIатла надрыскIьатI.
швталра йа тшаншвцIара атахъыпI.