Согъвым апны апсыуа литература апатриарх Гулиа Дырмыт йюбилей йадахIвуата йадыргалыз агIарбарта гIахъыртIытI.
Барганджиа Саид
Апсыуа литература ащатащтIацIагIв йгьи ауыжвгIанчIви апсыуа гIвыра агIаныршагIвы Гулиа Дырмыт йысквш 145 йадахIвуата йадыргалыз ачвахъабага гIарбарта апщаша мартI а 14 атшын Апсны Республика асуратгIвгIвчва радкIылара агIарбарта зал апны йгIахъыртIытI.
Гулиа Дырмыт йлитература-мемориал музей йадыргалыз ари агIарбарта апны йаныргIалын йапшым асквшква рагIан йхъырхыз ауысагIв йсуратква, апсыуа, аурышв йгьи акырт суратгIвгIвчва суратта йырчпаз йпортретква, Рухадзе Гиви йчпаз аскульптура, архив швъаква йгьи ауысагIв йнапIлагIвыраква.
Амузей аунашвачпагIв Корсая Светлана АААК ахабарргарта портал йшгIаралхIвызла, агIарбарта агIахътIра анахьанат аюбилей мшква йрыквшватI: йапхъахауа апсыуа газет «Апсны» асквш 100, Гулиа Дырмыт йлитература-мемориал музей асквш 45 йгьи Гулиа Дырмыт йпа, апсыуа гIвгIвы ду Гулиа Георгий ййымта мшы.
«СынчIва йшцазла, Гулиа Дырмыт йысквш 145 йадахIвуата йгIахъхIтIуа агIарбарта йпахIба данйы атшын йаквшватI. ЦIыпх йара ари атшын, йара араъа Гулиа Георгий йысквш 105 йадахIвуата суратхъыхра гIарбарта адыгIгалтI. Ари аквшвара Анчва йъамырта гIацIцIуаштI», – лхIватI ауи.
Корсая Светлана лгвы йасуата йшгIалылкIгIазла, алитература-мемориал музей атдзы апны гIарбарта, айззара, анйара ду акIвдыршарныс амаль гьрымам, ауи йгIалцIла ауи аквта гIарбарта зал апны йакIвдыршарныс йангIалтI.
«Амузей аъаща швабыж йхIатлапI. АгIарбарта хвыцква ахолл апны йадыгIгалитI, ауаса ауи мачIчвапI. АгIарбартаква йауацIыхта йъакIвхIыршуш зал ду гьхIымам», – лхIватI ауи.
АгIарбарта ангIахъыртIуаз дгIачважватI акультура йгьи атурых-культура тынха рминистр Арсалиа Эльвира. Ауи йшылхIвазла, Гулиа Дырмыт йбзазари йыршIыйари знархару аэкспонатква разкIкIрала амузей анхагIвчва нхара ду акIвдыршатI. «АгIарбарта аэкспонатква Апсны абзазагIвчвагьи асасчвачгьи гIальаматра ду рзырбушта йаъапI, йалкIгIата чкIвынргIа. Аурышв гIвгIвы дуква Апсны йангIайрыз Гулиа Дырмыт йтдзы акIвын апхъапхъа йъадгылуаз», – лхIватI Арсалиа.
Айззара апны дгIачважватI Апсны Республика апрезидент йкьангьашагIв Зантариа Владимиргьи. Ауи йгIаликIгIатI апсыуа литература ащаквгылра ауыс Гулиа Дырмыт йалацIара шIырпшыра амамкIва йшдуу.
«ШвырпшыстI араъа йаныргIалу ашвъакви асураткви, датша зджьарагьи йгьаъам, йгьубушым ауат. Сшхъвыцуала, ауат асуратквала бжьагажва щарда рылацIа йауаштI йгIадзынгылуа чкIвынргIа, апхьартаква рапхьагIвчва», – йхIватI Зантариа.
Апрезидент йкьангьашагIв дшгвыгъауала, Гулиа Дырмыт йлитература-мемориал музей йащтагIайуа асквш апны йдырчIаджьырныс рылшуштI. Ауи акъраль аунашвачпагIвчва рыхьызла агIарбарта адгалагIвчва зымгIвагьи дшырзыразу йхIватI.
«ХIара ауи ауыс ахъазла швабыж хIгвы цхIитI, йшпакIву ухIварыквын ауи хIныхIварта йагIвызапI. Амузей анхагIвчва зымгIвагьи Анчва дшвзыразхатI амузей аэкспонатква абараса швъарызсакъхауа, ауагIа ауат тшрыхадыргIвазарныс амаль ъарышвтуа ахъазла», – йхIватI Зантариа Владимир.
Апсны Республика асуратгIвгIвчва радкIылара аквта гIарбарта зал апны Апсны ауагIа руысагIв Гулиа Дырмыт йысквш 145 йадахIвуата йадыргалыз агIарбарта хвымшкI руацIа йынхуштI.
Апсыуа литература ащатащтIацIагIв, ауи апатриарх, Апсны ауагIа руысагIв, арыпхьагIв, апхьахьа, абызшвадырыгIв Гулиа Дырмыт асквш 1874 февраль а 21 атшын Гульрыпш район йаланакIуа Уарча кыт апны дйытI. Гулиа Дырмыт гIвыра, наука нхара ду щарда дыравторпI, ауат йрыуапI асквш 1912 йгIацIцIыз йапхъахуз апсыуа книга «Ауысакви амшыркъваракви».
Ауи йапхъахуз адрама гвып «ШыйачIва» дыргIаныршагIвын, йгIаджвыквцIарала Апсны акытква рпны йгIахъвмаруан йапхъахуз апсыуа театр труппа, ауи йакIвпI асквш 1919 агIан апсыуа бызшвала йапхъахауата йгIаншаз агазет «Апсны» йаредакторхазгьи.
Асквш 1967 агIан Апсны апны Гулиа Дырмыт йыхьызла алитература, азъазара йгьи архитектура знархару акъральыгIва согIат щаквдыргылтI. АсогIат хысквша апны зны йыршитI.
швталра йа тшаншвцIара атахъыпI.