Июль а 20 сквшы 95 лхъыцIуашын йбергьльу апсуа пхIвыс, апсуа хIвсысаква йрыуата йапхъахуз аскульптор, Гулиа ДырмытI йыхьыз зхъхIвалгIу а-КъральыгIва ахча согIа гIазквнадыргаз, аквырджьква апсуаква ангIадыркIылуаз асквшква рагIан ауагIахъа-хъахвитра мгIвайсра йалаз Эшба Марина.
Барганджиа Саид
МагIны зму закIгьи агIвымщтра, афыр йтурасы йгIацIанакIуа зымгIва гIарбара, йбзазара йалаз айгIайракви адамыхIвракви агвы йгIаквцIара – арат ракIвзапI гIвычIвгIвыс дукI йгIайыквчважварныс уыста йызкIыз автор хачIв хъадата йпахь йгылу. УадыргIванагьи – ауатква зымгIва абгата йшпаузырхъйуш? АгIвычIвгIвыс йгвтыхъраква, йхъйази йымхъйази йгвалаква зымгIва тамамдзата йгIарбауачвапI, данычвхуаш апхъала дыззхъвыцуа, дзыргвыргъьауа йа дызрынашхыйауа абгата йгьузыгIахътIуам. АгIвычIвгIвыс йдура ауагIа рыла йгIацIаужьра ахъазла ажва гьуызхъум: йанакIвызлакIгьи закI намхъауазшва йуылаухIвитI. Йара ауаса уцитI Эшба Марина – апсуа хIвсысаква йрыуата йапхъахуз аскульптор – угIалыквчважварныс уаналагауагьи. Ауи лбзазара атурых згвы мчыз, анчва йхъвыкI злаз агIвычIвгIвыс пшдза йымгIвата Апсны атурых анцIрала йгIалахуштI.
Зыхьыз газ атгIачва
Асквш 1924 июль а 20 агIан апсуа революционер ду, Апсны ахъахвитра йазабакIуаз Эшба Ефрем йтгIачва пхIа драуын Марина лыхьырцIатI. Ауат асквшква Эшба Ефрем йпхIвыс Щигровская Мариягьи дйыцта Лондон йтан, Эшба Совет Россия хвгIахвтрала ауысхарта апны дынхун. Ауаса Марина данрау амщтахь дукI йнамихуата ауат ауи акъраль йгIатыцIхра атахъхатI, йауа ухIварыквын Англия апны совет къраль йауакваз чвгьарала рыщта нкъвырцауа йалагатI. Ауат Москва йцахтI.
Асквш 1926 агIан атгIачва рпны ужвыгьи пхIакI дйытI – Лиза. Ахщчва Марини Лизи йшхвыцыз уалагата йаргванын, нцIрата йрымазгьи бзи йабабауамцара йнаргтI.
Ужвыгьи жвасквша анцIы, асквш 1936 агIан, ЭшбаргIа ртгIачва ахIвссаква йызхчушта зымгIва рапхъа йзайгвыгъуз Эшба Ефррем дрыгхатI – ауи апхъапхъа Колыма дтыргатI, хысквша анагIвс дырщытI.
Зыхьыз гуз Марина лаба йыдзщахази дъацIуи тамамта йырдырищтара сквшыкI акIвпI йцIуа. Эшба Еврем дантырга амщтахь хысквшагьи цIыхта акIвпI Лубянка апны данырщы. Ауи Москва аргванква (ужвы – Москва шIыц – аредакция ррытаразга) Троицк район апны НКВД (РСФСР АуацIа уысквала ауагIа ркомиссариат – асквшква 1917 – 1930 йгьи 1937 – 1946 рагIан РСФСР акъральыгIва унашвахъцIара апны ачвгьахараква рабакIрали ажвлара ртынчра хчарали йхъадаз ауысхарта – аредакция ррытаразга) йхъгIваз акъвырльыкъвхартакI апшцIа апны дыцIарцIатI.
Лаба даныркIы Марина жвыгIвсквша ракIвын дызтаз. ЙащтагIайуаз асквшква зымгIва, дажвындзыкIьа, ауи йлызтлапIаз агIвычIвгIвыс йыщтакI дыквшвара ахъазла амальта йлауаз тшацралхIвун, йыцтачIваквазнадзара гIалауан. Псайспамцара ауи дшбзахым лакъыль йазцатI, ауаса йыдзщахаз атамам гьылзымдыртI.
Марина, Ольга, «Олька»
Щарда мцIуата, хIызту асквш июнь агIан, Эшба Марина йгIалыквчважвауа агIвыра «Аталанти АпхIвысри: Эшба Марина асквшква дшгIарылпшуа» гIацIцIтI. Ауи згIвыз азъазарадырыгIв Войцеховская-Брендель Ольга йшлылшуз апш Марина йларгваныз ауагIа ргIагвалашвахраква азылкIкIытI, лара лчIвквагьи алалцIатI.
Ольга слачважвара шстахъыз анласхIв лпны хIанйарныс рыцIа йгIалылхтI, йауа ухIварыквын ауи атдзы апны Эшба Марина щардала дсасуан.
«Ауи араъа даъазларныс бзи йылбун, гIамта ауыра ахъвыцраква дрылата йылгун», – ллакта гвыргъьаракI гIаныпщуа йылхIвитI Ольга лтдзы абалкон дыквгылата.
Ари йдучвам атдзы амшын атшпы апны дбзазарныс зтахъу агIвычIвгIвыс йгвала йацчпадзапI: йкъагIауа ацIлауатра, зкъвадамаква бабадза йауацIызхыз ацIлаква, амшын адауыш, йаргвандзу йара адзгьи, агIайыраква йцIаркIыз, йагIвсыз асквшышв асквш хъараква йгIартынхаз, зунашва рхIвуз абалкон.
Эшба Марина лыхъаз ауи тып кIьыдаран: араъа ауи йлыгIвза аргваныз Ольга лан (йхIхIвапIта – ауыгьи лыхьыз Ольга-н) длыдзхъачIвата ргвбампIаква тырхуан, рымадзаква абархIвуан, апхын ашуара тшачвырхчун. Ольга-айцIба лакIвпIта – ауи ауат асквш 60-ква рагIан ужвыгьи д-Олька-н, ауи акIвын аныкI лапш пшката апхIвыспачкIвын дшлыпхьуз Марина Ефрем йпхIа – «анхща Марина».
Ауат йапхъахауата йананйа Ольга хвысквша ахIа дгьыртамызтI. Ан лыгIвза аргваны атгIачва дрылапхьадзанта апхIвыспачкIвын закIыла длылабжьаргьи, дъамаджьанхуз ахъазла длайсыргьи закIгьи гьаламызтI, ауаса ауатква йанакIвызлакIгьи «йлылаз аинтеллигентра дтымцIуата» йылчпун.
«Са Марина йгIвыджьхауа дсанта дспхьадзун, ансимшы хIабабун ухIва ауаштI. Ауи швабыж дгIвычIвгIвыс мчын. Апхъапхъа мачIкIгьи сылчвшвун: лара йшылтахъу акIвымкIва закI учпа йгьлымуазтI», – йгIалгвалашвахитI Ольга.
Эшба Марина книга лзылгIвырныс даквзыргвышхваз апсуа турыхдырыгIв йгьи аэтнограф Хотелашвили-Инал-ипа Мира лакIвпI.
«Марина адуней анылхIваджь амщтахь дукI йнамихуата аурам апны Мира Константин йпхIа дгIасынйатI. Бзидздзара хIчважватI, Марина Ефрем йпхIа лпсра Апсны рыхъаз йшылдзгIара дуугьи хIаквчважватI. Абарауи агIан акнига агIвра гIалрахан ауи счпара шатахъу, са саъара ауи дыздыруаз дшаъам лхIвауа далагатI. ЙгьцIаскIрым, Мира Константин йпхIа лажваква сгвы рхвгIатI», – лхIвитI Войцеховская-Брендель Ольга.
Ауи йшылхIвауала, хачIвыта лпахь йлыргылыз архъйара майрата йгьгIацIымцIтI: ауи йлапшу гIвычIвгIвыс ду лтурасы ашвъабгъьы апны йгIауырбара, сквшы-сквшымцара ауи дуыдзхъата йугаз амшква гIащаквуыргылхра атахъын.
«СызлагIалагуш сыла йгьсызгIацIамыжьуазтI. ЗакI згIвуан, йнасрыскIьахуан, сатапхьахуан, псахраквакI аласцIун. Зынзамызагьи сща гIашуанта йызгIвыз ашIызжвжвахуан, уацIыхъван тшщаквскIыхуанта йатагIащтIысххуан, счIвунта мачI-мачIымцара схъвыцраква азскIкIыхуан», – лхIвитI Ольга.
ЙшцалакIгьи ауи ймайрамыз, зныкIгьи кIара гIазлымцIуашшва йылбуз анхара цIхъва айаутI, ауи йгIанацIгIаз йгIацIцIыз акнига йгьахъазым – ауи згIвыз лхъа лкIгIарата йазылчпазгьи щарда йахвпI. Ольга йылгIвитI: Марина Ефрем йпхIа дыздыруаз ауагIа ргIагвалашвахра мачI-мачI йаназылкIкIуаз ауи «ужвыгьи зны багъьата йхъалцIатI ауагIа ауи азъазари агIвычIвгIвысри йузакъвымхуашта йызбуз дгIвычIвгIвыста йшылпшуаз».
Войцеховская-Брендель Ольга лгвы Марина дгьтыцIуам. Атдзы дыгIвната даннасгIасуа йанакIвызлакIгьи закI гIалхътасхитI. «Ари айшва щардала зымгIва хIацыта хIадзхъачIван… Араъа апахь апны азаман гIгарныс бзи йыгIбун – йалкIгIата амш аншуараз… Марина амшын дапшырныс бзи йылбун…» – йгIалгвалашвахитI азъазарадырыгIв.
Апсуа хIвсысаква йрыуата йапхъахуз аскульптор
Акнига апны Эшба Марина лбзазара шакIвшаз агIалхIвауа Войцеховская-Брендель Ольга йскульпторхушыз апхIвыс анаука тамамква дшхъырхуаз даквгIашIаситI, ауи асуратчпагIв лымгIва азыпшгIара апынгьи тшгIанарбатI. Марина данхвыцыз уалагата ахIисап дазычпан, Абашта айсра Ду аналга амщтахьгьи Тбилиси аполитехника институт дыцIалтI. Бзитагьи дапхьун ауаса зны… политех нылыжьта Москва анапIылачпара азъазара аинститут дыцIалырныс йаквылкIтI. ЗымгIва тамам гIазауыз ауагIа ауаса рызныйлитI. Абарауаса ауи апсуа хIвсысаква рпны йапхъахуз дскульпторхатI.
Москва апны Марина аскульпторра азъазара йбергьльу аъаза Белашова Екатерина лпны тшазылбжьун.
Войцеховская-Брендель Ольга Марина скульпторта дшщаквгылуаз цкIы-цкIы йаллыргауамцара йгIалырбитI. Ауи йылгIвитI Эшба асквш 1953 агIан нхара дъалагаз Мотовилов Георгий йырхарджьырта апны дынхауата йапхъахауата магIын ду змаз хачIвы шгIалыхъвдаквырцIаз (Мотовилов Георгий – СССР а-КъральыгIва ахча согIа алауреат, Москва аметрополитен астанцияква зрыпшдзаз, Москва апны Толстой Алексей йчвахъабага син зчпаз йакIвта ауагIа дырдыритI – аредакция ррытаразга).
«Астудия хачIвыта йаздыргылтI Польша УагIа Республика акъала хъада Варшава аквта йтагылу Анаука атдзы апахь синта йдыргылуашыз агIвычIвгIвыс нхагIвы йтурасы лырхырныс», – лгIвитI ауи ауысла Войцеховская-Брендель.
АгIвычIвгIвыс бергьыльква рсураткви лаба йчвахъабага сини
Марина ласыта анчва йхъвыкI злу зуысгьи йазъазу дскульпторта тшгIалырбатI. Ауи Совет Союз апны йакIвшуз анкъвакъвраква дрылалуан, айгIайрагьи гIатылгун. Эшба йлылхтI Москва агIаныршара асквш 800, Баку акомиссар 26-гIв рщра асквш 40 йырзынархаз аюбилей медальква рквпшыраква. Йара ауи апшта ауи йлылхтI «СССР Амедицина наукаква ракадемия йаланакIуа архъвыхра патологии атерапии ринститут асквш 50», «Некрасов Н.А. дгIадрийищтара йцIуа асквш 150» медальква рэскизквагьи.
Ауи лнапIы йгIацIцIтI асквш 1957 Брюссель апны йакIвшуз Адуней гIарбарта апны Совет Союз апавильон ахъаз йырчпаз акомпозитор Мусоргский йсурат. Йара ауаса ауи йгIанлыршатI ацIбацIбагIвчви азъазарадырыгIвчви хвду зквырцIаз атеатр азъазара ауысхагIв дудздзаква Станиславский, Щепкин, Ермолова, СССР ЙхIаракIу а-Совет адепутат ЛакIоя Василий ртурасквагьи.
Асквш 1961 агIан Марина «Грузия ССР апны гIатгара зму азъазара анхагIвы» хьзы гIалквнадыргитI. Апсны йауаз азъазара анхагIвчва ауи апш чIахI ангIарыквырцIуз зынзамызан. ГвынгIвырапI ауи агIан Марина Абхаз АССР апны гIатгара зму азъазара дшанхагIвыз.
Абашта айсра Ду йаладзыз Апсны абзазагIвчва йырхъмаштылгата асквш 1980-ква рхъаква рагIан Гвдауыта апны Чвахъабага адкIылара гIахъыртIытI. Марина ауи архитектор Лакрба Тамара длыцта дадынхалуан. Ауи адкIылара анырба Лыхны абзазагIвчва дара ркыт апынгьи ауи йашIырпшыта закI дыргылра ртахъхатI, ахчагьи азыркIкIытI.
Марина араъагьи дынхатI, ари азын ауи длыцын лыгIвза, Москва йауаз аскульптор Акимушкина Вера.
Марина лынхара-бзазара апны зунашва газ нхара лщардан, ауаса лынцIра шабгу апны йлынхара хъадата йалыз Согъвым аквта апны йдыргылыз лаба Эшба Ефрем йчвахъабага син акIвпI. Войцеховская-Брендель Ольга йгIалгвалашвахитI ауи ангIахъыртIуаз атшын Марина дырзашIамрысхуа ауырата дшчIвыуаз.
Апсны ауагIа р-Абашта айсра анакIвшуз Эшба йчвахъабага син хы агвыквырпсауата йайхстI. Ольга йшылхIвахуала, Марина ауи алахь йадамыгъата йылпхьадзан йгIащаквлыргылхырныс гьлымуытI, ага лаба йылахьхаз атамам лымдырыргьи.
ГIайхра
Москва апны тшагвынзыргIвыз, ауаъа гIвзачва зщардаз, нхарала щардагIвы йырпщылаз аскульптор йанакIвызлакIгьи лпсадгьыл дгIайхырныс лтахъын. Войцеховская-Брендель Ольга йшлыгIвуала, Эшба Марина Апсныдъа, Очамчырадъа лбзазара лыла йгьгIацIамылуазтI.
«Ауи «Советская Абхазия» газет акорреспондент Аршба Тариэл дйабадыритI. Москвагьи лыгIвзачвагьи нылжьитIта Тариэл дйыццитI, асквш 1960 агIан ауат рпа Владимир драуитI», – лгIвитI лкнига апны Ольга.
Марина лпа йакIвын лбзазара гIвычIвгIвыс хъадата йалаз. УахьчIва Владимир Согъвым дтапI, ауаса ажурналистква драчважварныс бзи йгьибум, тшгIацIимырпышрквын рыцIа йгIалихитI.
Марина йапхъахуз лхъацIи лари алыцIхтI, сквшквакI анагIвс гIванхауата тахIа дцатI. Ауи дылхъапщылахатI Акаба Нури. Ауат рынцIра шабгаз йацбзазахтI, Нури апхъапхъа адуней йхIваджьтI, Марина ауи йпсра швабыж йлылстI.
Зхъа змырдууаз агIвычIвгIвыс, швара зымдыруаз абакIгIвы
Асквш 1962 агIан Эшба Марина Апсны апны йгIаныршаз Грузия ССР АсуратчпагIвчва радкIылара ахъвшара даунашвачпагIвхатI. Ауи аъанатIа апны ауи мурад хъадата йылкIытI Апсны асуратчпагIвчва радкIылара кIьыдата йылчпарныс. ЛгIапсара ахъазгIваца йгьымдзтI: сквшквакI анагIвс Эшба Абхаз АССР АсуратчпагIвчва радкIылара унашва ахъылцIауа далагатI. Ауи ншара ахIатырла Марина ауырата, айрышта дабакIра атахъхатI, ларгьи швара зымдыруа, азахвара йащту апхъагылагIвта тшгIалырбатI.
Войцеховская-Брендель Ольга йылгIвитI Марина АсуратчпагIвчва радкIылара даунашвачпагIвта дъадзагылаз рыцIа уыс дута йылчпаз йшрыуу асквш 1966 агIан Москва апны апсуа суратчпагIвчва гвыпкI ргIарбарта адгалра. ЙгIаугвынгIвра атахъапI Грузия Апсны апны апсуаква андымрыпIатIауаз асквшква рагIан ауи шайгIайра дууыз.
Марина лхъатала агIарбарта йалазлуш асуратква гIалылхуан, лара лчIвыкIгьи налмахвуата апсуа скульптор шIаква Иванба Виктори Чкадуа Юрийи рыршIыйара гIадырбарныс лшара рылттI.
Асквш 1996 агIан Апсны ателебара апны ажурналист бергьльы Зантариа Владимир йрыхIазырыз Эшба Марина йгIалыквчважвуз агIатра гIадырбатI.
Марина лхъатала йылзынархаз агIатра апны зынзаджвыкI – йара ауыгьи ауырамкIва – акIвпI дъадзагIадырбаз. АуигIвацагьи апшгIвы ауи агIвычIвгIвыс лгвы амч йнарбатI. ДщаквкIыта, йалыргата ауи лабакIра ахабар лхIвитI.
«Араъа, Апсны апны, йынхуз асуратчпагIвчва, заджв-гIвыджь ракIвмызтын, Грузияла йгIарщтийыз ракIвпI, ауат архарджьыртаква, атыдзква, афатарква рыртуан, бзита тшандыргIалуан. АъанатIаква ркIуан. Ауатква рыцIагьи сацIадырсыгьтI. АчIвыйа араса йызца: апсуа суратчпагIвчва шIаква ага талант рымазтынгьи апсуа апхьарта апны йапхьа йгьамуазтI – аквырджь апхьарта йцара атахъхун? АчIвыйа ауи аъара гвбайара злу ауагIахъа рщапIы рыцIухра затахъу? ГвынгIвырапI сара сшабгаз ауи абакIра сшалалыз, йауа ухIварыквын ауат [аквырджь унашвачпагIвчва] йрымчпуз гьаъамызтI. Са йсыласхIвун щтахьла сгIатхъата амаль шамам», – лхIватI Марина заман айшысла акадр дангIатал.
ХъацIа хIаль злаз апхIвыс пшдза
Марина згвы хътIыз дгIвычIвгIвыс райшан, лбзазара ашвапхаква йшгIадырбауалагьи – нбжьагIвра лзынкъвгун. Драргванын ауи датшагьи апсуа политика йгьи къральыгIва уыснкъвгагIв дукI – Отырба Аслан – йтгIачва, уацIыхъван – ауи йпхIа Алла… Отырба Алла Апсны апны йбергьльу дпианисткапI, ужвы Согъвым апны дбзазитI, Гулиа ДырмытI йыхьыз зхъу Апсны агуманитар рхъвыхраква ринститут апны дынхитI. Ауи пхата дгIалгвалашвахитI лбзазара йауата щарда зпщылаз гIвычIвгIвыста йылзалыз лыгIвза ахIба.
Ауи Марини лари асквш 1960-ква рквтаква рагIан йабадыртI.
«ХIаби Марини нхара уысла щардала йанйалун. Зны ауи хIпны сасра дгIайтI. Ауи зынла уыла дгIацIашвун. Зджьара йгIанымхауата дпшдзан! Сара ауи агIан жвыхвсквша сыртан. Ауи пхIвысра швабыжта йлылан, дгIауайгвыргъьауа, угвы дыквшвауата даъан. Ауи йацхта хъацIа хIаль мчгьи лылан. ХIара асабиква ауи зынгьи дгьгIахIмайуыбзузтI», – йгIалгвалашвахитI Отырба.
УацIыхъван ЭшбаргIа ртгIачва зымгIва рыцIа аргваныта йыздырхыз Алла йшылхIвауала, Марина лымчра данцIайызгьи йгIалырбалун. Ауи йызнымкIва йылхIвахуан Марина лан.
«ДхвыцыркIвата Москва йанбзазуз ауи лхъа багъьата йталкIытI дшапсыуу, – йгIалылкIгIитI Алла йгьи Эшба Марина апхьарта даныцIаркIваз асквшква рагIан йыншаз закI гIалхIвитI. – [Москва] апхьарта апны Марина лтдзахьыз рымаждьащахъван, йлыцапхьаквуз йылмагIну, дъауу йазцIгIалун. Марина ауатква лаба йалхIвхтI. Ауыгьи дшапсыуу, Апсны йара йшипсадгьылу гIалгвынйыргIвытI. Йгьи йгIацицIахтI Марина лан дшапсыуам, апхIвыспачкIвынгьи [лыбызшвала] йылмагIну лара-лара йщаквлыргылныс дшахвиту. Ауи щарда дымхъвыцуата йылхIватI: сара уара уапшта сапсыуапI. ЙащтагIайуаз атшын ауи апхьарта дангIай апхьара сахIат шцуз дгIагылын акласс шабгу йгIарылалхIватI дшапсыуу. Ауи агIан Марина лбагъьара арыпхьагIвгьи гвы алттI».
РыцIагьи йаргванхатI Алли Марини асквш 1990-ква рагIан, ауат адызкIылуаз щардан. Йапшын ауат рбзазара йалаз рыцIа йнашхыйаз агIаншараквагьи: Аллагьи Маринагьи рцри ахщчваква рпхатI.
«Ауи алахIвараква дукI тшрылымтуата лхIвалун. Ауаса лахщи лари швабыж йазаргванын», – лхIвитI Отырба Марини ауи лахща Лизи разазаъащаква рыхъазла. Лахща лпсра Эшба швабыж йлылстI, бзидздза йылбуз ауыснадзара лыла йгIацIамылхуа дцатI.
«Ауи (лахща лпсра – аредакция ррытаразга) Марина лщапIы лыцIнахтI, дынхарнысгьи гьылтахъыхмызтI. ХIани сари архарджьырта дцахырныс хIлыхIвун. Лара лахIварала саргьи ауаъа слыццун, ауаса йанакIвызлакIгьи хIгIацапахуанта хIгIайхуан. Зны [архарджьырта] хIгIаджвылцIхырныс тшадыгIгалхьата – «Ба бцах, са сгIанхапIта мачIкI сынхапI» – лхIватI», – йгIалгвалашвахитI Алла.
Эшба Марина анчва йгIалылайцIаз ахъвы йанакIвызлакIгьи уыла йабун, ауыс апынгьи йатахъхалун. Ауи аэкспертквагьи щардала йырхIвалун, хвы змаз агIацIщтраква рпынгьи йыргIвуан, ауаса йхъадаз – ауи лынхараква азъазара апны дукI алзымцуз ауагIагьи рпсы йазынадзун. Ауи лыршIыйара атурых йапщылапI, абзазара йахъвыкIпI. УахьчIва, жвасквшапхьадзара анагIвсгьи, ауат уыла хъыркъьалитI, угвы апны закI гIадрыхIвачвитI, йа хьыгIакI, йа гвыргъьаракI гIадыршIыхитI.
Эшба Марина асквш 2002 май а 17 тшытракI данчмазагIвха амщтахь адуней лхIваджьтI. Ауи скульптурата йылчпаз зымгIва лпсы йауата закI рылалцIатI, дыздыруаз зымгIвагьи ргвква лгвы йауата тшыткI рызгIаталыжьтI, Апсни апсуа уагIи тынха ду рызгIанылжьын ахрат дцатI.
Амедальер Эшба Марина Ефрем йпхIа лынхараква араъа швырпшы йауаштI >>
швталра йа тшаншвцIара атахъыпI.