АшIыпIа хъвшараква рыцынхарала Адуней апсуа-абаза конгресс ахъвшара асквш 2025 агIангьи «Аимадара» проект акIвнаршауаркIвитI. СынчIва йапхъахауата СогIвым апны культура нархара змаз программа рзадыргалтI Очамчыра апхьарта-интернат апхьагIвчва. АцIайква «Рама» керамика студии Апсны акъральыгIва музейи йдырцатI.

Керамика астудия апны апхьагIвчва апсабара йгIаунатуа апкъыгIвас – анышв йзаланхузтын йапшытI. АцIыквчпагIвчва гIархъпшылуамца ауат анышв дзыжвга, тамщакь, йапшым асуратква гIалырхын атхыпха пшдзаквагьи рыкврыгIвхтI. РнапIыла йырчпаз апкъыгIваква асабиква ранчваква согIата йрыртуаштI.

«Сара зынгьи нышвла кIара гьсымчпасызтI. Ари атшыбжьара апны закIыта шIыцра щарда здырын! Анахьанат ацIайквагьи йыргвапхадзатI. ХIыуа дзачIвызлакIгьи пкъыгIвакI йчпатI. Са йсчпаз сымма мартI а 8 согIата йлыстуаштI, йылгвапхушызшва йызбитI», – лхIватI апхьагIв Тарба Дайана. 

Амастер-класс амщтахь ацIайква амузей йцатI, ауат ауаъа апсабара, Апсны ашIыпIакви апхъанчIви заман йгIашIарышвта уахьчIвадза атурыхи гIазырбауа апещква рпны йамдатI.

АшIыпIа хъвшараква рыцынхарала АААК ахъвшара анхагIвы Симониа Херсон апроект сынчIва дахIврала йшджвыквыржьхыз гIаликIгIатI.

«Апроект ареспублика акытква йырту асабиква ртшпсщара гIамта сабап алата йшыргуш йазынархапI – Апсны ашIыпIа джьащахъваква, амузейква агьиква рпны экскурсия рзадыгIаглитI. СынчIва йапхъахуз амдара Очамчыра апхьарта-интернат апхьагIвчва йырзалхIхтI. Апхьарта аунашвачпагIвчва хIрайкьангьашын керамика астудии амузейи йхIырцарныс хIангIалтI. Асабиква рымш шыргаз йазыразпI – шIыцра щарда рдыртI, щарда рылархIватI, ужвы йырзымчхIахуа анышв йгIалырхыз рнапIлачпараква йрызпшитI. Ауаса йанаъазара – апроект йыззынарху ахачIвы архъйитI», – йхIватI Симониа.

«Аимадара» проект АААК агвып асквш 2019 йгIашIарышвта йдырхъйитI, ауи ларпшратагьи йалитI дыррагьи гIалыргитI. Асабиква ъаргауа гьапшым. АмдагIвчва Афон ШIыци Уатапи рхIатшпква, «Апсны» этнопарк, Акармар дзкIатштшартаква, «Асльанква рпарк», адельфинарий, акьльисакви амузейкви йыргалитI. Ареспублика акытква рсабиква рыхъазла амдараква апхъахьылагьи йакIвшуштI.