Апсуа-абаза уагIахъа ргвбайара ахчара йазынарху АААК апроект апкъ йтата йхъырхыз, апсуа ашва йгIаквчважвауа абзазара йгIахъыху афильм шIыц СогIвым апны ажвлара хабарргагаква рыхъаз йгIадырбатI.
АмичIба Амра
Апсуа ашва йгIаквчважвауа абзазара йгIахъыху афильм шIыц ажвлара хабарргагаква рыхъаз СогIвым апны май а 16 атшын йгIадырбатI. Афильм апсуа-абаза уагIахъа ргвбайара ахчара йазынарху АААКи «Алашара» жвлара адкIылари рпроект «Амазара» апкъ йтата йхъырхтI.
Афильм зымгIва рапхъа йапшытI Апсны ажвлара хабарргагаква рынхагIвчва, йазалхыз асасчва йгьи афильм йалакваз. Дакъикъа 27 руацIа апшыгIвчва ауагIа рцуарадкI рыхъазла щарда рдыртI: апхъазаман агIан ауат анырхIвалуз, ауагIа рбзазара йауу гIаншарата йызпщылаз, йхъадахугьи – йшырхIвауа. Араъа йугIитI гара ашва, фыр ашва, нхара ашва, тацанадылра уарад, ацIаси адини йырпщылу ауарадква. Афильм апны ауат рхIватI Гвдауыта йауу «Ахьышьҭра» гвып ашвахIвагIвчва.
Афильм ангIадырба ауи йапшуаз йрылаз ашвахIвагIвчва гвып заджвгьи дыззымпшуаз флешмоб гIаларгатI: ауат гIагылын афильм йалаз ауарадкI йара ауаъа апещ ауацIа йырхIватI.
АгIарбара сасыта йгIадрайгваз Апсны а-Фыр Кобахиа Батал йшибазла, афильм гIанзыршаз аршIыйагIвчва апсуаква йырцIасу ашвахIваща акъабатква рзыгIахърышвттI.
«Афильм йадынхалкваз хIара хIчIвы зымгIва йрыларгатI. Афильм хъмаштылга согIата йгьаъам. Сара скультура зджьакI рыхъазла «хъмаштылга согIата» йалуазтын [ауи] ауат ргьагьара йгьангIалуам. Сара абзазара йгIахъыху апсуа фильмква йахърыкъьу гвщтIыхра анрылубгIауа йгьсгвапхум. Ари афильм апны йубауа цIоларапI, апхъанчIвирапI, эпоспI», – йпхьадзитI ауи.
Кобахиа Батал багъьата йхъайцIитI «Апсны апны «Ахьышьҭра» йрагъьта заджвгьи ашва шйымхIвауа», йгвгьи йасуата йхIвитI агвып уарад шырхIвауа анугIауа ъазынзамызу. РыцIа йгIаликIгIатI ауи арежиссер Аргвын Мадина лынхара, атеатр апны йынхауа арежиссер абзазара йгIахъыху фильм ъахъылхызгьи «швапха бзита» йпхьадзитI.
Афильм йапшыз Аквта гIарбарта пещ адиректор Арсалиа Эльвира йшылпхьадзауала, агвбайара йазынарху АААК апроект «Амазара» «хвы аквцIауачвапI».
«Агвбайара ахчара йазынарху а-Конгресс анхара кIьыдата разыра ажва азухIварныс аквнагапI. Мадина лрежиссер пшыщала амузыка агIвычIвгIвыс йдунейпшыща злащаквгылу акультура къабат йузакъвымхуашта йшалахъву лзыгIарбатI», – лхIватI Арсалиа.
Апресса рыхъаз агIарбара йалакваз афильм АААК ахабарргарта портал зланхауа ацбызшвакIлагьи йъатаркIыз магIын ду азырбатI, ауи «апсуаква ртынха байа адуней шабгу йрылагара йацхърагIуштI».
«ХIгIащаквхара ахIатырла [хIкультура] хIышта утыцIтагьи тшауацIнахIрыхра атахъыпI. ЦбызшвакIла йгауа ахабар гъагъата тшауацIнахитI, аъачIвагIагIвчва йырхъазымкIва щардагIвы йырзынадзитI. ЩардагIвы йрымдырнысгьи ауаштI ари апш зджьарагьи йумауаш культура шхIыму. АшвахIвагIвчва гвып йрылу, Анчва йхъвы злу ашIаква рбзирала ауи гIащаквхатI», – лхIватI Арсалиа Эльвира.
Афильм ангIадырба амщтахь Адуней апсуа-абаза конгресс апресс-квта апны ауи гIанзыршаз рпресс-конференция акIвшатI.
Ауаъа йгIачважваз афильм арежиссер Аргвын Мадина, АААК апхIвыс советква рунашвачпагIв Ардзынба Гета, апресс-конференция акIвзыршуз АААК ахабарргарта портал аунашвахъцIагIв Лазба Амина, «Ахьышьҭра» гвып рунашвачпагIвчва Гвынба Эсми Джениа Саиди, амакъымгIаныршагIв Агрба Темур, аоператор АгIвдза Наала аршIыйагIвчва гвып шадыркIылыз, асценарий шыргIвуаз, ашваква шгIалырхуаз, афильм йшадынхалуаз агьиква йырзынархаз азцIгIараква джьауап рырттI.
АААК апхIвыс советква рунашвачпагIв Ардзынба Гета ажурналистква йралхIвтI апроект апкъ йтата йащтагIайуата йыздынхалуаш асквш 1929 агIан йгIацIцIыз акомпозитор-этнограф Ковач Константин йкнига «Апсуа уагIа рашва 101» шIыцта йгIацIщтхра шакIву. Ари ауыс йалазлуштI культурала Апсны а-Министерствагьи.
Адуней апсуа-абаза конгресси «Алашара» жвлара адкIылари рпроект «Амазара» апсуа-абаза уагIахъа ргвбайара тынха йазынархапI. Ауи йагIаджвыквцIагIву АААК ЙхIаракIу асовет аунашвачпагIв Эгьзакь Мусса йакIвпI. Апроект апсуа-абаза уагIахъа ргвбайара тынха уыжвгIанчIви интернет амальквала ауагIа йшрылаугуш йазынхитI. РыцIа пасата апроект апкъ йтата апсуа гIахIвра, апсуа уагIа рашва «Нарҭаа рышҭыбжь» йгьи абазаква рхIваспачпаща йгIарыквчважвауа хфильмкI хъырхын йгIадырбатI.
швталра йа тшаншвцIара атахъыпI.