Ансисквша йакIвшауа акультура-спорт фестиваль «Абаза» асквш 2019 агIан КъЧР апны цынхауата йакIвшатI. Апсны йауата Черкесск йаъаз агвып йангIайх амщтахь ауи агIаншара пшдза рыла йшабаз рхIвахтI.
Барганджиа Саид
Апсны йауата VI акультура-спорт фестиваль «Абаза» йалаз агвып ауи ауыс ахъазла ргвгIанаграква гIархIватI.
ЙшцIасхаз апшта, ансисквша Черкесск къали КъЧР абаза кытква рыуа закI апни йакIвшалауа «Абаза» фестиваль уагIа щардагIв злазлауа гIвуыс дукIла йалапI: Абаза уагIа рхъвмарракви Апсны акъральыгIва баракъ амш йаквшвауата йадыргалуа Абаза уагIахъа ркультура амши. Арат агIвуыскI йанакIвызлакIгьи уагIа швкIыгIвпхьадзара азыркIкIитI.
Очамчыра йауу ашвахIварала арыпхьагIв Цвижба Лика афестиваль йапхъахауата даъан. Ага ауи акIвшищтара мчыбжьыкI агIвсхьазтынгьи ауи ллахIвараква гьымхьыстI, йгIалгвалашвушгьи лщардапI.
«Сара Апсны, хIпны саъазшва йызбун – ауи аъара пхата хIдрайгван. СгвыргъьачIвауа ужвыгьи зны сцарын, зымгIва атазбахрын», – лхIватI Цвижба.
Апсуа-абаза уагIахъа йрыуу ъабзазауа акъральква йгIартыцIта йгIайыз спортсмен 600-гIв райхIа рылан Абаза уагIа йцбахуз рхъвмарраква. Ари аспорт анкъвакъвра йгIадгылтI Апсны, Ставрополь шта йауу агвыпква. Ахъвмарраква йрылан 13 абаза кыткI йгIадыргылыз ажвизгвыпкIгьи (Къазма ахкыткI гвыпкIта йадкIылапI), Москва апсуа диаспори Черкесск къала йту абазакви ркомандаквагьи.
Апсны аволейболасчва ргвып йхынхауата анкъвакъвраква рпны апхъагылара гIатыргатI. Ауат ркапитан ЛакIоя Амра агвып зымгIва рыхьызла дгIачважвауата «ахIвссаква ахъвмарраква йрылазларныс йандрайгвара йгвыргъьауа йшцауа» гIалхIватI.
«Ауат йрапшу ахъвмарраква Апсны апынгьи йакIвшалара атахъыпI. ХIара пхата йхIылахIхIвитI ауаъа йшгIахIпылуа. Ахъвмарраква сквшыкI апны зны ахIа йъакIвымшауа хIгвы йаситI. Афестиваль ъадзакIвшауа ахымшкI руацIа алахIвара пшдзаква хIдырчвитI! АуагIа рыцIа-рыцIа йщардагIвхауамцара ауи йгIалалырныс хIтахъыпI», – лгвгIанаграква хIыцагIвылшатI ЛакIоя.
Апсуаква рделегация йалан Апсны къральыгIва университет журналистикала ахъвшара апхьагIвчви арыпхьагIвчви: ауат амшква Черкесск апны апсуа политик дудздза Багапщ Сергей йгIайыквчважвауата Апсны къральыгIва университет апрофессор Бебиа Екатерина йылгIвыз акнига апрезентациягьи акIвшатI.
«ХIара уыста йакIвшуз рыуа закIгьи агIвхIымщтра хIтахъынта хIгIапсатагьи йгьхIымбатI. Ауат амшква зымгIва сара КвтIол (Апсны акыткI – аредакция ррытаразга) апынгьи ауи апш фестиваль акIвырша йшауашыз сыла йгIацIазыжьуан. Са сазхъвыцуан щардагIвы йнадзауа хIдиаспорагьи алата ауи апш гвыргъьахъв хIпынгьи йакIвыршазарквын йшбзихушыз. Кьангьаш гьазгIазгуам ауи ауыс авластгьи йшацнакIуаш, йхIыдзхъагылата [ауи ауыс] адгалра йшацхърагIуш», – лхIватI Бебиа.
Ауи лахIварала АГУ апхьагIвчва дрынйатI Адуней апсуа-абаза конгресс ЙхIаракIу асовет аунашвачпагIв Эгьзакь Мусса.
Ауи анйара шибаз йхIвахуата АГУ йпщбахауа акурс астудент Читанава Айнар йгIаликIгIатI аконгресс аунашвачпагIв йынйара йгIайыхъвуш йгьи магIны зму щарда шгIайнатыз.
«АААК ахъада Эгьзакь Мусса йынйара гвыхътIыла айчважварата йакIвшатI, ауи гIвсахIаткI аъара йнайтI йаргьи швабыж щарда гIацIанакIтI. ХIара ауи йхIтахъула хIицIгIарныс лшара хIыман, йаргьи даланахIван джьащахъвара щарда гIахIайхIвтI, йсабихъа даквчважватI, йбзазара швапха хIыцагIвишатI», – йхIватI астудент.
Къарча-Черкес ацара шабгугьи йгвы йгIатахатI ачкIвын.
«ХIара йхIгвапан Абаза уагIа рхъвмарраква хIъарылаз. Къарча-Черкес апны хIара хIайщчва ъату ареспублика хIылаквала йыгIбара йахъазымкIва ауи абзазагIвчвагьи хIрабадыртI, нхара уыслагьи швапхакI хIырхIатI. Черкесск хIъадзаныз амшква руацIамхIара, АГУ ажурналистика хъвшара астудентква, хIыздынхалуа агIвыраква рыхъазла ахабарква азхIкIкIуан. Бзихушын ауат йрапшу ауысква араъа Апсны апынгьи йакIвшауазарквын», – араса йпхьадзитI Читанава.
Акультура-спорт фестиваль «Абаза» Къарча-Черкес апны ансисквша йакIвшитI. СквшигIадзагьи ауи агеография рыцIа-рыцIа тшауацIнахитI, йгIаланакIуа аштаква щардахитI, агвыргъьахъв апрограмма рыцIа-рыцIа йджьащахъвахитI, ашIыцраква гIалахIитI.
швталра йа тшаншвцIара атахъыпI.