АААКи «Алашара» жвлара адкIылари рынхагIвчва рыхъазла май ацIыхъва СогIвым апны мшквакI руацIа атшыбжьараква акIвшатI.
БжьымшкIы йнайыз атшыбжьараква Адуней апсуа-абаза конгресси «Алашара» жвлара адкIылари рынхагIвчва рыхъазла СогIвым йаъу АААК ауысхарта апны май а 23 йгIашIарышвта а 31-дза йакIвшатI. АААК аунашвачпагIвчва ауи анхагIвчва гвыпта йацынхара ахIатырла йгIарцхърагIуш адырракви амалькви рауырныс йырзадыргалтI.
Атшыбжьараква йапшым анархараквала йалыхын. Ауат акIвдыршатI Санкт-Петербург йгIатыцIта йгIайыз аъачIвагIагIвчва: хвгIахвтрали айчважвараква акIвыршарали аъачIвагIагIв, абизнес-бжьагIвы Тверев Дмитрийи ауагIа рпахь гIачважварала, абжьы щаквыргылрали йатахъу ажва гIаурали абжьагIвы Кудрина Лариси.
Атшыбжьара апны зымгIва ракъыль ацдрыпшгIара атахъхалун. Агвып АААК апахь уахьчIва йгылу ахачIвква йрылапштI, ауат сабапта йгIаргуа рыцIа йайхIата йуырхъйа йшауаш йалачважватI. Атшыбжьараква рхъвыкI аунашвахъцIара йазынархан – ауыгьи йазалху аъащаква йрыквыргIапста.
«Абзазара апны йызлашвалауа аъащаква цкIы-цкIы йалхIыргун. Сара теория сапхьауа ацкIыс йыншалауа ауысква йгIархъыхта сынхарныс рыцIа йгIалсхитI, ауаса [агвып] ужвы йызлу йа ауи апхъала йзынйахьаз ашвапхаква рыцIа йузалыргитI», – йынхаща гIахIгвынйыргIвытI Тверев Дмитрий.
Ауи йшихIвазла, атренинг анакIвшуз АААК апны уахьчIвала йхвиту ъанатIакI зкIныс зтахъу заджвы ауи даквыргIапсызтын гIаддырдырдзауата йачважватI.
«Айчважвара АААК ахъвшара аунашвачпагIв дхIыцта тшазадыгIгалтI, йаргьи адгылщаква злапшым гIайгвынгIвытI – йшаъази йшцази», – йгIацицIахтI ауи йгьи йгIаликIгIатI: дъадзанхауа йшибазла, «ауыс зынла йгIазгвынгIвуа заджвмаджв ракIвызлитI», ауаса араъа ауи данйатI.
Абизнес-бжьагIвы хIгватра азынайырхатI атшыбжьараква агвып ужвы рынхара шашIадымрысуа гIапхьадзахауата йшадыргалуаз.
«МагIын ду амапI йгIаугвынгIвырныс: уагIата йаъу нахъума, дызда йазалхта знапIыла ауат апроектква зырхъйуш? Сзыргвыргъьаз ачIвыйа: мшигIадза ахъвшараква рунашвачпагIвчва йырзынахIырдзуз аинформация йадынхалуан. Ауаса йанаъазара – азаман ахъазгIваца йгьхIымрыдзтI, зымгIвагьи атшыбжьараква закI гIарылыркIгIатI, рылкIгIараква йызланхауа апрограмма апны йгIадырбатI. ХIызквчважваз зымгIва рзычпузтын – бзидздзахуштI», – йажва цIхъва айттI Тверев.
АуагIа рпахь гIачважварала, абжьы щаквыргылрали йатахъу ажва гIаурали абжьагIвы Кудрина Лариса анхагIвчва агIачважваракви абадырракви йырзылрыхIазырныс хачIвыта лпахь йгылан.
«Абжьы щаквыргылра, ажва гIаура, агIачважвара йырзызбжьауата сара йсмурадын [атренингква йрылаз] тынчта рхъа, йъанхауа аорганизация йызгIаквчважвауата, ауагIа йрабадырта йызрангIалуа йсрыхIазырныс. ХIара дасу йбжьы щаквхIыргылуан, йпсыптагаща, йнапIчпаща, йчважваща хIрыдынхалуан», – йгIашIылпхьадзатI ауи.
Кудрина а-Конгресс агвып джьгарра, азыгIальаматра шгIарныпщуаз гIалылкIгIатI.
«ЗымгIвагьи джьгарта йынхун. Ари йапшу анйараква ужвыгьи йакIвшалушызтын араъа йырдырыз гIарыхъвуштI, ауи акIвымкIвагьи рынхара апны йгIартахъхуш дырра раутI. Йалухуашта йаъапI агвып руацIа абагвынгIвра йгьи уызцынхауа ауагIа рангIалра, ауат йшаквнагу апш тшдырбара. ХIара зджьакIы хIанрабадыруа гвыпта хIшынхауа гIалхIкIгIитI – ауи майрата, тынчта, ауагIа йазхъадуырцIауата йчпара атахъыпI», – лхIватI абжьагIвы.
АААК агвып аздзыргIвчва хабар шдурадзуш ддырдыртI, АААК ахабар ргара шатахъугьи гIадырбатI.
Кудрина Лариса кьангьаш гьгIалгуам ари йапшу атшыбжьараква дзачIвызлакI йыхъазгьи сабап шрылу. КIьыдата йадынхалтI угвы йтшауа алахIвараква шщаквукIуаш.
«Умахъащахъаквагьи ухъвыцщагьи раквыргъвгъвара узыщаквырчIвузтын ауи учважваща апны йахъазымкIва штшукIуа апынгьи ухъа хвыта йаквуцIауа апынгьи тшгIанарбитI», – йгIахIгвынлыргIвытI Кудрина Лариса.
Йшабгу йгIауахвырквын аздзыргIвчва тшъадзарбжьуз ауыс апны йхъаду шгIалукIгIуш ддырдыртI, ахачIвква шлухуаш тшазырбжьатI, уызцынхаквауа «зарардъа уыс шрыцухуш» йаквчважватI, айшыста йухIвушызтын – агвып разазаъащаква згIвадазлара ахъазла дасузлакIгьи дшчважвуш, штшикIуаш алдыргатI.
АААК ахабарргарта портал аредактор хъада Лазба Амина дызлаз атшыбжьара лхъа ахъазла щарда шгIалылкIгIаз лхIватI.
«А-Конгресс анхагIвчва ауагIа рпахь йгIачважвалара атахъхалитI, ауаса йанаъазара тамамта ушчважвуш, уара йумагIну, агвып рпны уыста йухауа, йара аорганизация йачпауа шгIауырбуш удырра атахъыпI. Унашва зхъуцIауа анхагIвчва хачIвы шрызуыргылуаш, рынхаща шуырхъвыхуаш, рыцIа бзита йынхарныс йшаквуыргвышхвуш датшагьи йгIахIыхъвуш уыс щарда хIрыквчважватI. Атшыбжьараква рагIан а-Конгресс уыста йахауа зымгIва, ауат рсабапра йалархIа йшауаш хIрыдынхалуан», – лхIватI Лазба Амина.
Ажвлара рабадыррала АААК аъачIвагIагIв Хагба Изольда ари апш тшыбжьара рзадызгалыз а-Конгресс аунашвачпагIвчва дшырзыразу лхIватI. Ауи йгIалылкIгIатI атренинг «йащтагIайуа ахвысквша рагIан уыс апхъата йгIагылуаш гIалхра» йшахъваз (уахьчIва йаъу а-Конгресс агвып хвысквша йынхитI, АААК йызкьазуу айззара ду хIпырапI, ауаъа йагIвсыз агIамта ауацIа йырчпаз рхIвуштI, йащтагIайуа агIамта шIчIвара ауацIа хачIвыта йдырхъйуш лырхуаштI – аредакция ррытаразга).
«Зпахьла йпшыта хачIвы лызымхуа организациякIгьи апхъала йгьзынаскIьушым, тамамта мурад гьазыргылуашым. А-Конгресс апш хачIв ду зквызцIауа адкIылара ахъазла хвысквша гIамта бзидздза йнадзитI, ауи ауацIа хачIвыта йгылаз, ауат шлырхуаз йгьи йшдырхъйуз бзи-бзи йырхъвыхра атахъыпI», – лхIватI Хагба.
Санкт-Петербург йауу абжьагIвчва Апсны йапхъахауата йгIайын йызрайгваз рсасбзибари ргвапари хвду аквырцIатI.
«Анчва дшвзыразхатI пхата швъахIпылыз, апсуаква йшырцIасу апш хIъашврысасыз», – лхIватI Кудрина Лариса.
АнхагIвчва рыхъазла атшыбжьараква апхъахьылагьи йадыргаллуштI. СынчIва адзын агвып ръачIвагIадырра йаладырхIара ахъазла йазалху алекцияквагьи акIвдыршарныс йаквдырпшитI.
швталра йа тшаншвцIара атахъыпI.