Аконгресси ИАЕ «Алашареи» аусзуҩцәа рзы мчыбжьык иназынаԥшуа ицоз атренинг мҩаԥысит Аҟәа маи аҵыхәтәантәи амшқәа ирылагӡаны.
Адунеизегьтәи аԥсуа-абаза конгресси ИАЕ «Алашареи» русзуҩцәа рзы аҽазыҟаҵаратә тренинг мҩаԥысит Аҟәа, АААК аофис аҟны лаҵара 23-31 рыбжьара. АААК анапхгара ари аусмҩаԥгатә еиҿыркааит акоманда еиҳагьы еилаҵәаны, еилибакааны аусушьа иақәшәарц азы.
Атренинг апрограмма еиуеиԥшым ахырхарҭақәа рыла еибаркын. Азыҟаҵара мҩаԥыргон Санкт-Петербургынтә ааԥхьара зманы иааз аспециалистцәа: абизнес-тренер, аҭиреи аилацәажәарақәеи рзы иексперту Дмитри Тверев, иара убас абжьи, аҿаԥыци, ажәаҳәаратә ҟазареи разыҟаҵаҩ Лариса Кудрина.
Атренинг архәыцра иазкын. Акоманда уажәазы рҿаԥхьа ишьҭоу ахыдҵақәа анализ рзуны, реиҳа еиӷьны ишынагӡатәу иалацәажәеит. Аҽазыҟаҵара аетапқәа руакы анапхгаратә ԥышәа аизырҳара иазынархан, еиуеиԥшым аҭагылазаашьақәа раан имазеины ухы иаурхәаша.
«Ҳара ҳҽазаҳшәеит иахьынӡауа аԥсҭазааратә ҭагылазаашьақәа ҳҽырзааигәатәны аусура. Сара ианакәызаалак иаҳа еиӷьысшьоит иконкреттәу ахықәкы анықәгылоу, атеориа мацара акәымкәа, акоманда уажәазы изҿу, ма уаанӡа иҟарҵоз аҿырԥшқәа рыла аҭагылазаашьақәа еилҳаргеит», – иҳәеит Дмитри Тверев.
Иара еиҭеиҳәеит, атренинг аҳәаақәа ирҭагӡаны, АААК уажәазы иамоу авакансиақәа руак ахь аусура инеирц зҭаху иҿцәажәара шымҩаԥысыз.
«Ҳара абри аиҿцәажәара ҳҽазыҟаҳҵеит АААК аҟәшақәа руак анапхгаҩи сареи, уи еиликааит уаанӡатәи азнеишьеи уажә ҿыц иаҳҵази шаҟа еицәыхароу», – иҳәеит азыҟаҵаҩ. Иара иажәақәа рыла, абас иаразнакала атренинг аҵакы ззеилкаауа даара имаҷҩуп, аха Аконгресс аҿы ус еиԥш ауаҩ дыҟазаап.
Абизнес-тренер иазгәеиҭеит убасгьы, аҽазыҟаҵара ахәҭақәа реиҳарак ишазԥхьагәарҭоз аколлектив рдинамикатә ҭагылазаашьа.
«Даараӡа акраҵанакуеит ауаатәыҩсатә ресурс узхо-иузымхо аилкаара, абра зыӡбахә ҳҳәо апроектқәа зегь назыгӡо зусҭцәоу адырра. Еиҳарак сзеигәырӷьаз – атренинг цонаҵы анапхгаҩцәа иааиԥмырҟьаӡакәа ирысҭоз аинформациа аус адырулон. Ус анакәха, баша акгьы мҩамсит, алкаақәа ҟарҵеит, урҭ зегь реихшьаларагьы ҳахьӡеит ҳапрограмма инақәыршәаны. Иаҳҳәаз зегь нагӡахар, алҵшәа заманахоит», – ҳәа иажәа хиркәшеит Тверев.
Абжьи, аҿаԥыци, ажәаҳәа ақәыргылареи рзы атренер Лариса Кудрина хықәкыс илыман агәыԥ алахәцәа ауаа рҿы иқәгыланы ацәажәареи аимадара иаша алхреи разыҟаҵара.
«Сара сҽаԥхьа хыдҵас иқәгылаз – сҵаҩцәа имырхьаацәакәа, имарианы рхы аиҭаҳәашьа дырҵара акәын, рнапы злаку, нас аус ахьыруа ауаа мыргәамҵкәа ирарҳәаратәы. Ҳара абжьы ақәыргылареи ииашаны аԥсыԥлагаҩагашьеи, артикулиациеи, адикциеи аус рыдаҳулон», – ҳәа еиқәылԥхьаӡеит лара.
Кудрина иазгәалҭеит Аконгресс акоманда активреи азҿлымҳареи шаадырԥшуаз, алҵшәа бзиа аиура шырҭахыз.
«Иалахәыз зегьы активла рхы аадырԥшит. Абри аҩыза аиԥыларақәа иҵегь имҩаԥыслар, уи ԥышәа дуӡӡоуп, удырра иазнарҳауеит, аофис аҿы уусура иацхраауеит. Иҟоуп аколлектив аҩнуҵҟатәи аимадарақәа, нас иҟоуп анҭыҵтәиқәа: адәахьы ауаа ҳашрацәажәо, урҭ рҟны ҳхы аарԥшышьа ахьынӡаҳалшо. Доусы аус ахьиуа икомпаниа ахьӡала ихы аӡыргашьа идыруазароуп уи дацәымшәо-дацәыԥхамшьо, насгьы ииҳәо уаҩы агәра игартә», – лҳәеит азыҟаҵаҩ.
АААК акоманда аудиториа аинформациа рызнагашьа аформатқәа аус рыдырулеит, атеориа аганахьалеиԥш апрактика аганахьалагьы.
Лариса Кудрина агәра ганы дыҟоуп, абас еиԥш иҟоу атренингқәа шхәарҭоу зеиԥшла аколлектив азгьы, алахәцәа аӡәыцыԥхьаӡа рзгьы. Хазы игоу аблок азкын ауаа ремоциақәеи ремоционалтә интеллекти.
«Ауаҩы цәеижьла, нас психологиа деимархха дызку ауадаҩрақәа аус рыдулара, раԥырҟәҟәаара уи ицәажәашьа ианыԥшуеит, иаҳа ихы агәра иго дҟалоит, ихы иаиҭо ахәшьарагьы еиӷьхоит», – ҳәа азгәалҭеит Кудрина.
Иааидкыланы иуҳәозар, атренинг алахәцәа ирҵеит априоритет алхразы иҟоу иуниверсалтәу амҩақәа, ахықәкы ақәыргылашьа алгоритм, аколлегацәа рыбжьара «аекологиатә еизыҟазаашьа» закәу – даҽакала иуҳәозар аколлектив ӷәӷәазарц азы доусы ииҳәаша-ииуша.
АААК аинфопортал аредактор хада Амина Лазԥҳа илҳәеит, атренинг иалахәыз лаҳасабала, лаԥхьаҟа илыхәаша адыррақәа рацәаны ишлырҳаз.
«Аконгресс аусзуҩцәа лассы-лассы ауаа рҿы иқәгыланы ицәажәоит, ус анакәха, ари атренинг хәарҭара ацын доус иажәаҳәаратә лшарақәа реиӷьтәразы, ҳаззааԥсо аусбарҭаҿы ҳзакәу ииашаны аиҭаҳәаразы, иара аусбарҭа ахаҭагьы ахыԥша аларҵәаразы. Унапаҵаҟа аус зуа ииашаны адҵа шрыҭатәу, урҭ русушьа ишацклаԥштәу, акоманда аус ргәы шазҭаҵатәу, уҳәа убас иҵегь хәарҭара злоу азҵаарақәа аус рыдаҳулеит. Атренинг аҿы Аконгресс зҿу зегьы еихыршәшәаны ҳазнеит, ари нахыс ҳусура ауаа рзы еиҳагьы ихырҳаганы иҟаларц», – лҳәеит Амина Лазԥҳа.
Ауаажәлар рымадаразы АААК аспециалист Изольда Ҳагԥҳа Аконгресс анапхгара иҭабуп ҳәа ралҳәеит абри аҩыза аҽазыҟаҵарақәа ахьеиҿыркааз азы. Лара иазгәалҭеит, атренинг шыцхыраагӡахаз иааиуа ахәышықәса рзы ихадароу аусқәа ралкааразы (уажәтәи АААК акоманда хәышықәса раахыс аус руеит, хара имгакәа имҩаԥысраны иҟоу аизара ду аҿы аилазаара аусура аихшьалақәа ҟаҵахоит – азгә.).
«Астратегиа умамкәа уҭышәынтәаланы узыҿиаӡом, ахықәкы ииашаны ақәыргылашьа узақәшәаӡом. Аконгресс еиԥш аус рацәа зхахьы изго аилазааразы хәышықәса – ҿҳәара дууп, шьҭахьҟа ҳхьаԥшны ҳзыхьӡаз-ҳзынԥаз гәаҭаны, ахыдҵа ҿыцқәа ҳаманы ԥхьаҟа ацаразы», – лҳәеит Ҳагԥҳа.
Санкт-Петербургтәи атренерцәа раԥхьаӡа акәны Аԥсны иааны иҟан, ҳажәлар рысасдкылашьа ргәы иахәеит.
«Гәык-ԥсыкала иҭабуп ҳҳәар ҳҭахуп абас иԥханы аԥсуаҵасла ҳахьшәыдышәкылаз», - лҳәеит Лариса Кудрина.
Ари аҩыза атренингқәа уажәшьҭа аамҭа-аамҭала имҩаԥыслоит, ҭагалан азы иазԥхьагәаҭоуп убасгьы Аконгресси «Алашареи» аусзуҩцәа рзанааҭдырра аизырҳара иазку атематикатә лектори.
шәҭалароуп, ма шәыҽҭажәыҩроуп.