Адиаспора 17.11.2019 12:00 34166

Трыквшта апны апсуа культура квтаква р-Федерация й-VI-хауа асъезд акIвшатI. Ауи нархарата йаман а-Федерация аунашвачпагIви ауи аунашвахъцIарта йалаквуи ралхра.

Барганджиа Саид

Трыквшта апсуа культура квтаква р-Федерация (Апсуафед) й-VI-хауа асъезд апны ноябрь а 16 атшын ауи даунашвачпагIвта даталырххтI уахьчIвала йахъаду Аквсба Атанур.

Адапазар апны йакIвшуз айззара нархарата йаман Апсуафед аунашвачпагIви ауи аунашвахъцIарта йалаквуи ралхра. Алхраква акIвшарныс ахъазла уахьчIвала Трыквшта апны 17 йнадзауа дернекипхьадза, йа культура квтипхьадза, рделегатква асъезд йырщтитI. Аделегатква ашвъа йананырцIа амщтахь асъезд анхара джвыквылтI, апрезидиум алырхтI, ауи дахъадан Апсуафед ахIба Ардзынба Джималитин.

АААК ртланыкъвала асъезд далан ауи архъйагIв секретарь Гицба Инар. Ауи йшихIвазла, ацынхара уысква йрылачважвауата асъезд апны щардала ахьыз рхIватI Адуней апсуа-абаза конгресс.

«Асъезд ангIахъыртIы аделегатква гIачважвауата Апсуафед йгьи АААК рацынхара амагIны шдуу рхIватI, апсуа-абаза этнос аэтнокультура тынха арыбагъьари атшауацIнарыхри руыс апны а-Конгресс йаму агыларта гIалыркIгIатI», – йхIватI Гицба.

Апсуафед даунашвачпагIвта йаталырххыз Аквсба Атанур айззара йалазгьи йадызгалызгьи зымгIва дшырзыразу йхIватI, асъезд анадзара хIаракIыта йшакIвшаз гIаликIгIатI. ЙгIачважвара апны ауыгьи йгIаликIгIатI а-Федерация йгьи АААК джьгарта йшацынхауа.

«Са йызбитI адиаспора а-Конгресси а-Федерации рацынхара бзира алата йшырпхьадзауа, ауи гвлахIарапI», – йхIватI ауи, АААК «йцрийу адкIыларата» йпхьадзауа, уадыргIвана йгIацицIахтI «ауат йацацхърагIауа йынхара шатахъу».

«Ауи зымгIва ззыхIчпауа хIуагIахъа, хIкультура йгьи хIпсадгьыл ракIвпI», – йхIватI ауи унашвачпагIвта дъаталырххыз ауысла АААК ахабарргарта портал дгIарачважвауата.

Асъезд апны ауи йалаз йрызцауата йгIапхьатI Адуней апсуа-абаза конгресс ЙхIаракIу аунашвачпагIв Эгьзакь Мусса йтшазынархара.

«Трыквшта апны хIэтнос йауу ауагIа радкIылра, апсуа йгьи абаза бызшваква рарыпхьара, хIуагIахъа культура агIатгараква ауагIа йрылагара, Апсуара апхъанчIви цIасква ргIахчара, чкIвынргIа ауат разыбжьара, Апсны Республика ахьыз бзита йыргара ауысквала апсуа культура квтаква р-Федерация алацIара хвыта йаквнагауа аквуцIарныс гьмайрам. Угвы йаланархIитI Къарча-Черкес Республика йтабзазауа хIайщчва рабадырри рыцынхари ауыс тшъауацIнахуагьи», – араса йгIанахIвитI ахIвахIвра тшазынархара.

Йтшазынархара апны Эгьзакь Мусса датшагьи йгIаликIгIатI уахьчIвала а-Конгресс йауацIыхта йархъйауа анхара агIвыма къральква рпны, Трыквштагьи рылата, апсуа-абаза жвлараква рбзазаща рыцIа цIолата йшунардыруа йгьи АААК анхара джьгарта йгIалалырныс йгIайрайгватI.

«Швыуа азджьакI ауи анхара йалан Къарча-Черкес апынгьи, Апсны апынгьи. ХIапхъа Трыквшта адиаспора агIащтийыгIвчва ауат акультура-спорт гвыргъьахъвква рахIагьи джьгарта йшгIарылалуашла хIгвыгъитI. ЙхIгвапапI чкIвынргIа ауат ауысква джьгарта йъарыцыркIуа. Щарда мцIуата зынхара джвыквлыз а-Дискуссия клуб (АААК апроект шIыц – аредакция ррытаразга) апны чIащыгIвара злу агIахъвыцра шIыцква ймачIымкIва йгIаншитI. ЧкIвынргIа азаман йацчIвырхъитI», – йхIватI Гицба Инар Эгьзакь Мусса йтшазынархара дгIапхьауата.

Апсуа культура квтаква р-Федерация – жвлара адкIыларапI. Ауи Трыкв Республика апсуа диаспора ъабзазауа йапшым аштаква рпны йгIаныршу 17 квтакI (дернеккI) гIацIанакIитI. Трыквшта апны уахьчIвала Апсуафед йаднакIылитI апсуа-абаза уагIа йрыуата 15000-гIв райхIа.