АААК йаланакIуа Ан-абачва рклуб апны атгIачва психология ауысла йбергьльу аъачIвагIагIвчва КоннерргIа Ричарди Оксани алата анйара акIвшатI.
Барганджиа Саид
АААК йаланакIуа Ан-абачва рклуб январь а 25 атшын йакIвшаз анйара йгIалалырныс йгIадрайгватI Апсны апны йбергьльу апсихологква, тгIачвакIта йацбзазауа КоннерргIа Ричарди Оксани. Аклуб алачIвара ауатыкв йтан атгIачва разазаъащакви асабиква рызгIвадари йырзынарху ауысква.
АААК йаланакIуа Ан-абачва рклуб аунашвачпагIв Квициниа Кама анйара гIахъылтIуата йшгIалылкIгIазла, атема хъада «АтгIачва асабиква ргIадзныргылра щатата йаназалуа» уыс щарда гIацIанакIитI, ауи йгIалцIла амагIны швабыж йдупI йгIадрайгваз асасчва рынйара.
КоннерргIа хъацIи пхIвыси сквшщарда цIитIта психология нархарала йапшым ауысква йрыдынхалитI, йалкIгIата атгIачва психология. Ауат асквш 2007 йгIашIарышвта йацынхитI. Коннер Ричард – коучинг йгьи тгIачва уысквала йажва хвду амапI, гIвычIвгIвыскI йа атгIачва рпны психология уысла дъачIвагIагIвпI. Оксанагьи ауагIа драйкьангьашитI – тшгIалзыназырхауа гIвычIвгIвыс кIьыдазтынгьи тгIачвазтынгьи.
Датшагьи ауи асабиква рбжьарала асеминарква адылгалитI, йалкIгIата, автор тренинг «Асабиква рныбыжьла йызтазлакIгьи рбжьара ушадгылуаш», агIвычIвгIвыс йъапкъ-тлапкъква йгьи гIахIвра-пIатIаура нархара зму атренингква, актёр ъазарагьи йазылбжьитI. Оксана педагогта дынхауищтара 19 сквша цIитI, ауат асквшква рпны «зшан баргву» асабиквагьи дрыдынхалтI.
АъачIвагIагIвчва йшырпхьадзауала, асабиква рпсихика азгIвадарагьи ръапкъ-тлапкъква рызгIвадарагьи зпщылу ани аби разазаъаща акIвпI.
«АъащакI хIташвата йхIчпуш анхIымдыруагьи йанакIвызлакIгьи хIшангIалуаш хIащтазара атахъыпI. АтгIачва разазаъащаква рмагIны гIахIгвынгIвуата ани аби акъыльаквшвара анрызбжьам ауи йгIахъшахъыцIуаш хIылахIхIвара атахъыпI. Ани аби рангIалра швабыж йуыс цIолапI, агIвхъатакIлагьи джьауапкIра гIадырбара атахъыпI», – йхIвитI багъьата Ричард.
Асабикви ауат ран-рабачви разазаъаща ауыс налырдзахуата Оксана йгIашIылпхьадзатI асабиква гIаугвынгIвырныс, ауат рбжьара тшдырра гIауырбауата уадгылра ахъазла йбергьльу амальта йлырххьу.
Аклуб алачIвара шабгу АААК YouTube канал апны швапшы йауаштI>>
Ажва ахъазла, ауи йшылхIвазла, атгIачва рпны азазаъащаква, ащагащаква цIасла йщаквгылазара атахъыпI. Ани аби рсабиква рпны йанакIвызлакIгьи «рчпащала йшвапхапI».
ЙшцIасхаз апшта, аклуб йалу ан-абачва анйара гIальаматра ду азрыман, азцIгIара щарда дыргылуан.
Анчва рыуа азаджв гвалымста угIанызымжьуа азцIгIаракI лыргылтI: «Асабиква рыхъазла йшпагъьу: акъыльаквшвара збжьам ани аби йрыцбзазарныс акIвма момкIва ауат ралыцIхра акIвма?»
«Азазаъащаква шагъьхуш акIвпI йанакIвызлакIгьи йынкъвцара атахъу. Ауаса йнахвхауа амальква сабап рыцIамызтын, асабиква ауралагьи швапха гвымха дуырбауа ацкIысгьи алыцIхра рыцIа йагъьпI», – йджьауапхатI Коннер Ричард.
Датшагьи магIны зму бжьара уыскI йалачважватI: асаби йхIаль пызтшуа аткIьийри аргIачIвари ъагIвысуа шпаудырра атахъыйа?
«Асаби йдырра атахъыпI йчпаща гIвына шаму, ауат агIвынаква рта дантымцIуа йхъа дшахвиту», – араса йылпхьадзитI Коннер Оксана.
Согъвым йтагылу АААК а-Дискуссия клуб апны асасчви аздзыргIвчви анайчважвауа асхъан лкIгIара зму ауысква ауатыкв йгIаталлитI, рджьауап, ажва ахъазла, интернет апынгьи йумауата. Ари азынгьи йгIаншатI ауи апш тема. Ауи зпщылу апсуа тгIачва цIасква ракIвпI.
Апсуа цIасла йайцIбу апа унагIва даналалра йани йаби рпны дгIанхитI, щардала йгIаншитI асабиква ргIадзныргылра андуи абадуи йахъцачвата йангIалалуа. Ани аби здымгылуа абжьара уысква рпны андуи абадуи рхъвыцща ушпапшIагылра атахъыйа, гвыбгъангьи гIалымцIуата?
АзцIгIара джьауап алттI Оксана.
«Араса йанцара апхIвыс луыс гIванла йбаргвхитI. УнагIва йалалгIвацаз хъацIи пхIвыси ран-рабачва йрылата йбзазузтын руыс рыцIа йбаргвхитI. Ауаса ари апш аъаща йташвалитI атгIачва шIа кIьыдата йанбзазауагьи. Араъа акъвльейраква уырзыпшгIара атахъыпI. Ажва ахъазла, ан заманкIла асаби йбжьара ланхъва йлызхъалцIата длайкьангьашла, длангIалла ауаштI», – лхIватI апсихолог.
Коннер Ричард йшгIаликIгIазла, ажва ахъазла, америка тгIачва апны азазаъащаква шщаквгылула араъа йгIадрахаз аъаща агала йгьаквшвум.
«Ауаъа асабиква ран-рабачва рпны йкIьыдапI, зныбыжьла йнаскIьахьу ан-абачва ажвчIвква ртдзы апны йбзазитI, ауаса йанцара ауат атгIачвакIпIхIва ухIварныс баргвыпI. Араъа, Апсны апны, зымгIва датшапI, ауагIа разазаъащаквагьи ращтаныкъващагьи датшапI», – йхIватI ауи.
АъачIвагIагIвчва ацIыхъва йшырхIвазла, анасып йамадза хъаду агIвычIвгIвыс аргванква ракъыльаквшвара акIвпI, ауи ауысла апсуа культура цIасква амаль бзи щарда рылапI.
«Апсны апны йгIадзынгылуа агIвычIвгIвыс ахъатаква зымгIвалагьи цIагыл йауитI. Ауи анахьанат драпшмызтынгьи йхъазы дгьгIаныржьуам. Йхъа дахвитпI. АтгIачвагьи дшаъу апшта акIвпI бзи дшырбауа», – йгIацицIахтI Ричард.
МагIны зму темата йгIадрахатI атгIачва гIащаквхарныс ахъазла апсихолог йа апсихотерапевт йцхърагIара йаназыбжу, ауаса ахъапщылачва рыуа азаджв, йгIахIахвырквын ахъацIа, айрышта ауи данапшIагылуа. Йылшушма араса йанцара агIвыджь рыуа азаджв атгIачва раъаща йхъазы йагъьичIвырныс?
«Теорияла йгIахIахвырквын йылшуштI, ауаса швабыж дгIапсауата. АгIвыджь рыуа ахъацIа ауи дапшIагылуазтын, сара, ажва ахъазла, апхIвыс слыдынхалуа салагуштI, йалныс ауыпI, ауи амщтахь ахъацIагьи дгIацапахта йхъапщыла йлыцикIырныс», – йхIватI Коннер Ричард йхъвыцща ауатыкв йгIатайцIауата.
Анйара гIвсахIаткI райхIа йакIвшатI, ауи азаман ауацIа азцIгIара щарда дыргылтI. Оксани Ричарди дара ртгIачва ршвапхагьи гIаргтI – ранчва, рабачва йшрангIалуагьи рпа Артёми дари разазаъаща шщаквгылугьи йрылачважватI.
Адуней апсуа-абаза конгресс йаланакIуа а-Дискуссия клуб йазалху проектта йгIаннаршатI Ан-абачва рклуб. Ауи анхара ноябрь а 30 атшын йджвыквылтI. Ан-абачва рклуб йалалырныс рылшитI анчва, абачва зымгIвагьи. АдгалагIвчва йшырпхьадзауала, ауи ауысла йхъаду «азыгIальаматри, атахъыри» ракIвпI.
швталра йа тшаншвцIара атахъыпI.