Лента событий ВААК
АААК апшыгIв шIа йгвала архъйатI
АшIыпIа хъвшараква рыцынхарала АААК ахъвшара Арасадзыхь 2-хауа аквтанай апхьарта апхьагIвчва Чанба С. йыхьыз зхъу Апсуа драмтеатр йарцатI. Ауи апхъала ацIайква «Аимадара» проект апкъ йтата СогIвым акультура-турых чвахъабагаква йырпшытI. Ауаъа йамдауата апхьагIвчва Апсуа драмтеатр йцарныс шыргвалу ахъвшара анхагIвчва йрархIвтI. Йаргьи абар – асабиква йатаркIвах акъала хъада йаъапI, ауат рылаква атагъьазгъьазхитI. АпхьагIвчвагьи арыпхьагIвчвагьи шалаз 25-гIв йнадзауата апсуа литература ащатащтIацIагIв Гулиа ДырмытI йысквш 150 йаквшвауата йгIадырбуз аргылчIв «Йари лари» йапшытI. Аспектакль йалан Апсны ауагIа рартистква Маан Виолетти Хагба Кесоуи. Арежиссер ареспублика апны гIатгара зму артистка Аргвын Мадина лакIвпI. АргылчIв йащатахатI Гулиа йгIвыра «АчкIвыни апхIвыспи рсальамшвъаква».
АцIайква рпсып акIыхын асцена апны йыншуз йапшуан, актерква дута напIы йырзасуан, афырква закI рчпапхьадза дара рлахIвараква тшгIапхьыржвун. Аспектакль аналгагьи апшыгIвчва шIаква йырбаз амагIны ауырата йалачважватI. Ари ахваша ахъвлапын ауат щарда ргвква йыртазлуштI.
