Лента событий ВААК
АААК ЙхIаракIу асовет аунашвачпагIв Эгьзакь Мусса Асквш ШIыц ахъазла йтшазынархара
ПIатIу зкву анбжьагIвчва! Спсы йапшу сайщчви сахщчви!
ЙалгитI ЙГIВЫНЗЫКЬИ ГIВАЖВИ ПЩБАХАУА асквш. Ауи гьмайрамызтI, ауаса уыла зыргвыргъьуз, угвы йгIатахуз агIаншараквала йырчвын.
Россия апынгьи Апсны апынгьи хIара хIгвбайара, хIцIасква гIащаквыжьрала, хIуагIахъа тшауацIдрыхрала анхара гьашIахIымрыстI.
ХIара хIацыта дзачIвызлакIгьи йбзазара шагъьхуш хIазынхун.
ЙгьмачIым хIара йазалху айсра операция йалаквуи ауат ртгIачвакви рцхърагIара къарута йадыгIгалыз.
Ашта шIыцква гуманитар цхърагIара хIщтиуан, цхърагIарала амальква йрылазырхIуш ахабзаква лыхIхуан.
Апсны апынгьи, Россия апынгьи, антахьгьыт акъральква рпынгьи хIара жвабапхьадзарала агуманитар проектква хIырхъйатI.
ХIара йхIмурад хъадата йгIанхитI зуагIа рыхъазла закI зчпарныс згвы йгIащтIнахуа, зкъару йаргвышхвауа дзачIвызлакIгьи ауи анхара дгIаланахIыркIныс.
Сара багъьата йхъасцIитI зымгIва йацыхIчIву ауыс хIыуа дасузлакIгьи йгви йпси рхъвыкI аналайцIара шакIву йагъьу адахIвраква хIанырзынадзуш.
«Алашари» Адуней апсуа-абаза конгресси рынхара йгIанарбитI ауи апш ацзакIыра шхIылу, хIаргьи хIхъагвы аквыта апхъала хIпшы йауаштI.
УахьчIва Россиягьи, Апсынгьи, адуней шабгугьи магIын ду зму апсахраква рыгIамта йтагылапI.
Ауи йапшу азаман хачIвы лухныс уыс майразшва йгьубум.
Ауаса ауи йапшу агIамтаква рагIан акIвпI ухъагьи, ууагIахъагьи, укъральгьи йрызхъауцIауа угIанхарныс йалкIгIата магIын ду анаму.
ХIара баргвырата йаъу зымгIва урайгIай йшауаш зырцIабыргыз абанпараква ршвапха хIымапI.
ХIыуа дзачIвызлакIгьи – зымгIвагьи йхIзацалу дудздзакI дахъвыкIпI. Апхъахьыла хIбзазара шагъьхуш хIазынхауата уахьчIва хIызлу хIуысква, хIгвалаква, хIгвышхвара ракIвпI хIуачIвымш ащата щтIазцIауа.
ХIкъаруква йанрызхъахIцIауа, ауи адахIвра шIыцква злагIатыгIгуш къару ангIахIыланацIауа гIамтата йалргIатI Асквш ШIыц.
СыгIвзачва тлапIаква!
Асквш ШIыц – йхIцрийу, йхIаргвану ауагIа хIрылата хIызпылуа гвыргъьахъвыпI.
УахьчIва зны йапшымкIва магIын ду амапI атгIачва злащаквгылу хIцIасква рынкъвгара, ахIбачва айгвыгIврала йкIвыршара, асабиква хIкъарукви хIбзибари рылацIара.
ТгIачвипхьадза пхара, баракьат, уачIвамш ауысла гвбзира швымазтI.
ЗгIвадара багъьа, насып, адуней бзирата йыкву швзыстахъпI.
Асквш ШIыцла!