Лента событий ВААК
Абызшви литератури рфестиваль: АГУ апны уыса гIапхьарала айгIайыгIвчва гIалырхтI
АГУ афилология факультет апны Абаза уагIахъа рыбызшви рлитератури рфестиваль апкъ йтата Апсны апны ауысапхьагIвчва ранкъвакъвра афинал тур акIвшатI.
Ареспублика йапшым акъалакви арайонкви йгIартыцIыз апхьагIвчви астуденткви апсуа бызшвала ргвы ацчпата уыса йшызгIапхьауа гIадырбатI. Ауат йгIалырхыз ауысаква гIазквчважвузла йгьапшымызтI, ауаса айхIара ацри шта апшдзари ауагIахъа ркультура абайари йырзынархан.
Анъквакъвра йалакваз штшдрыхIазырызи ръазари ажюри йдырхъвыхуан. Ауи йалан: АГУ апны филологии журналистики рфакультет адекан Хагуш Батал, АГУ апны йгIаныршу АмкIваб В.П. йыхьыз зхъу Апсуа-адыгьа филология а-Квта аунашвачпагIв АмкIваб Ахра, апрофессор, КЧР ауагIахъаква рыбызшваква рхъвыхрала а-Квта адиректор ПIаз Сергей, Гвдауыта 2-хауа аквтанай апхьарта апсуа бызшвали литературали арыпхьагIв Рыста Людмила, «Алашара» адкIылара апны «Абаза бызшва тшауацIнарыхра» хъвшара аунашвахъцIагIв Меремкъвыль Зауыр йгьи Апсны Республика апны гIатгара зму арыпхьагIв Халбад Валентина.
Анкъвакъвра агIарбараквала апхьагIвчва йрыуата быжьгIвы айгIайта йгIалыркIгIатI, кIьыдата проза гIапхьара ахъазла согIа заджвы йквнадыргатI. Ауи акIвымкIвагьи цыгIвстудентчва октябрь ацIыхъва Черкесск апны йакIвшуш афинал йалазларныс КЧР йцуштI.
«Абаза уагIахъа рыбызшви рлитератури рфестиваль – 2026» проект «Алашара» адкIылари Алиев У.Д. йыхьыз зхъу Къарча-Черкес къральыгIва университет апны йгIаныршу КЧР ауагIахъаква рыбызшваква рхъвыхрала а-Квти йадыргалтI. Ауи акIвыршара йацхърагIитI Къарча-Черкес Республика арыпхьарали наукали а-Министерства, Апсны Республика арыпхьарала а-Министерства йгьи Апсны акъральыгIва университет (АмкIваб В.П. йыхьыз зхъу Апсуа-адыгьа филология а-Квта).
Апсны аделегация афестиваль йанкIвызлакIгьи йалазлитI: апхьагIвчви астуденткви анкъвакъвра апны ауысаква йгIарыпхьитI, апхьахьакви аъчIвагIагIвчви «Тобыль апхьараква» наука-практика конференция апны йгIачважвитI.
