Адуней
апсуа-абаза
конгресс

Апрель а 12 Санкт-Петербург, «Арыпхьара ашвырква» театр апны ажвлара уыснкъвгагIв, абзихагIв, асквшква 1990-2000 рагIан Санкт-Петербург апсуа диаспора йрунашвачпагIвыз, «Апсны» жвлара чIахI зму аунашвачпагIв, Санкт-Петербург пIатIу зкву абзазагIв Айба Рауф йысквш 90 йазынархаз культура хъвлапны акIвшатI.
Айззара Адуней апсуа-абаза конгресс ЙхIаракIу асовет аунашвачпагIв Эгьзакь Мусса йхIвахIврала йгIахъыртIытI. Йтшазынархара апны ауи Рауф Тархун йпа йбзазара шабгу абагъьара, агвышхвара, ауыс азцIабыргра йшыргIарбагу гIаликIгIатI. Мусса ХIабальа йпа ауи згIвадари баракьати йымазларныс, йтынха уагIа щардагIв хвы шазырбауа йгьи йшырхчауа ъайбауа дайгвыргъьарныс шизыйтахъу йхIватI. АхIвахIвра швъа ауатыкв дгIаталын дгIапхьатI АААК Аппарат аунашвачпагIв Таниа Кан. Ауи Эгьзакь Мусса йыхьызла аюбиляр согIа йыйттI.
ЙхIвахIвраква гIайщтитI Апсны Республика апрезидент Бжаниа Аслангьи. Ауи Айба йызгIвадара багъьата, йгвы щтIыхта, бзи дызбауа йцриквала дкIвыршата насыпла йырчву сквшщарда ницIырныс дйызхIвахIвтI. АхIвахIвраква йрыцызкIыз Россия апны Апсны рхIвачIвгIвы Квициниа Алхас йсальамшвъа апны Рауф Тархун йпа апатриотра зпсы йалу, зпсадгьыл гвыла-псыла бзи йызбауа дгIвычIвгIвыста йгIвытI.
РхIвахIвраква гIархIватI зыхьызква дута йгауа асасчва щардагIвгьи: Апсни России ркъральыгIва уысхагIвчва, апхьахьаква, адипломатква, агIвырагIацIщтыгIвчва, акультура анхагIвчва, йапшым акъральква йрыуу йыгIвзачва, апхьарта апны дызцапхьакваз. ЩардагIвы аюбиляр йхъатала йайхIвахIвра ахIатырла ауаъа йгIайтI.
Айззара адыргалтI Санкт-Петербург апсуа диаспори Адуней апсуа-абаза конгресси. Агвыргъьахъв йгIадгылыз рыхъаз ашва рхIватI йбергьльу адуэт «Ахщчва Берзениа». ЛыршIыйара гIалырбатI дуней анкъвакъвра щарда рпны айгIайра гIатызгаз, акультура аинститут апны «Эстрада-джаз вокал» нархарала йапхьауа Смыр Аида. АААК апны йгIандыршаз «Абаза» гвыпгьи асасчва апсуа гIахIвыщаква ддырбатI.
Ахъвлапын апрограмма йауата асасчва Рауф Тархун йпа ахчала дацхърагIата йхъырхыз «Апсуа лабиринт» фильм ахъвыкIгьи йадырпшытI. Акино ъадзахъырхуаз арежиссери аоператори дрыцта ауи йхъатала Апсны шабгу дгIахъыкIвшатI.
Айба Рауф Апсны ахъазла рахIа йбаргвыз агIамта – Абашта айсра анакIвшуз асквшква 1992-1993 рагIан апсуа диаспора дырхъадан. Ауи йуысхаща абзирала ауи йбаргвыз агIамта адиаспора рынхара ажвлара-политика бзазара апны магIын ду змаз нархарахатI. Амамыр заман агIангьи Рауф Тархун йпа закIы йашIысыз чкIвыныргIа, анаука нхагIвчва, йапшым адкIылараква дашIамсуа дырцхърагIун. Ауат йрылан аъачIвагIагIвчва шIаквагьи йбергьльу аполитика уыснкъвгагIвчвагьи.