Лента событий ВААК
Эгьзакь Мусса аспортсмен Агрба Харитон дйынйатI
Эгьзакь Мусса сасра йызгIайтI Россия йауу, зыжвлала йапсыуу апрофессионал боксер Агрба Харитони ауи йбжьагIвчва Дотдаев Руслани Томилов Никити.
Агрба Харитон сентябрь а 6 Челябинск апны Аргентина йауу Данефа Клаудио Габриэль дйайгIайын йапхъахауа квтанайбжа хIатлара апны IBF Intercontinental йгьи WBA Continental рымъаква гIатигатI.
Агрба Эгьзакь Мусса дъайцхърагIауа, йгватрагьи дъалйымхуа ахъазла дшизыразу йайхIвтI. Эгьзакь Мусса аспортсменгьи ауи йбжьагIвчвагьи драйхIвахIвтI, адуней ачемпионра йаззырцауа амгIва апны адахIвраква рымазларнысгьи дрызхIвахIвтI. Ауи йшихIвазла, Харитон йапхъаламгIвайсра гватшныта дахъпшылитI, ауи йамайчра, йнагра, йгвы амч йбитI, адахIвра дшазынадзушгьи кьангьаш гьгIайгуам.
АААК Атара кыт апны ъачIвагIагIалхрала тшыбжьара акIвнаршатI
Арыпхьарали жвлара джьгаррали згIвадарахчарали (ОСАЗ) АААК ахъвшара Атара аквтанай апхьарта апны ъачIвагIагIалхрала тшыбжьара акIвнаршатI. Ауи йалан СогIвым къральыгIва колледж апны ауыхвара уысквала арыпхьагIв Барцыц Алиси Sputnik Абхазия хабарргарала къвырльыкъвхарта аредактор Лышвба Арди. ЙгIадрайгваз аъачIвагIагIвчва АААК апны ОСАЗ хъвшара унашва ахъызцIауа Хагба Изольди ахъвшара аъачIвагIагIв Хышба Науыри рыцта апхьагIвчва йыръачIвагIахуш агIалхра магIныта йаму гIаргвындыргIвытI, уахьчIва рыцIа йатахъу аъачIвагIаква рархIвтI, дара ршвапха йаквчважватI. Ауат дара ръачIвагIаква штшырзырбжьаз, дырра шIыц шрауаз, нхара йаналагуз баргвырата йзынйуз ацIайква йрархIвтI. АпхьагIвчвагьи азцIгIараква артуан, апхъахьыла ргвтараква рхIвун. Анйара ацIыхъва АААК анхагIвчва Апсны аколледжква рхабар зну афлаерква апхьагIвчва йрыларшатI.
Апсны апхьартаква рпны ъачIвагIагIалхрала атшыбжьараква чкIвыныргIа ъачIвагIа рызгIалхра ахъазла дыррата йрымазара атахъу радзарныс ахIатырла йакIвдыршитI. Атренингква акласс ахIбаква рапхьагIвчва дара-дара рбзазара шрызлыхуаш, рпахь хачIвы шырзыргылуаш апшта йырцхърагIитI.
Апсабара хIхчапI: АААК экологияла тшыбжьара акIвнаршатI
Арыпхьарала, жвлара джьгаррала, згIвадарахчарала АААК ахъвшари АГУ апны экологии апсауышвхIаква рморфологии ркафедра аметодист, арыпхьагIв ахIба Цыбулевская Майи апхьагIвчва рыхъазла экологияла атшыбжьараква акIвдыршауаркIвитI. Йызкьазууыз интерактив лекция акIвшатI АдзыгIвбжьа кыт апхьарта апны. Цыбулевская Майя асабиква экология ззырхIвауа ралхIвтI, апсабара хчара шатахъу, агIвычIвгIвыс йгьагьара шипсахуа, Адгьыл гIащаквхара ахъазла йчпара атахъу гIаргвынлыргIвытI.
АпхьагIвчва джьгарта айчважвара йгIалалуан, дара ргвгIанаграква рхIвун. АхIауа арпIайра, ахъшвалква рыдынхалра йапщылу абаргвыраква, агIайыра штаква ыквчIвакьра, апестицидкви ахимия адгьылрбзигакви ргIарысабапра – айчважвара апны Апсны акъалакви акыткви рпны узынйауа уыс щарда гIащтIырхтI. Анйара аналгуз ацIайква экология уаквыргIапста штшукIуаш зну агIвыраква гIарырттI.
