Лента событий ВААК
Мусса Егзакьи аспортсмен Харитон Агрбеи еиҧылеит
Мусса Егзакь сасра иҭааит аҧсуа хылҵшьҭра змоу Урыстәылатәи абоксиор ҟаза Харитон Агрбеи, уи иазыҟаҵаҩцәа Руслан Дотдаеви, Никита Томилови.
Харитон Агрба - цәыббра 6, 2024 шықәсазы Челиабинск имҩаҧысыз аицлабраҿы Аргентинатәи аспортсмен Клаудио Габриель Данеф дииааины, актәи абжьарабжатә капан иаҵанакуа акатегориаҿы IBF Intercontinental WBA Continental амаҟақәа иҽрыҧсеитәит.
Агрба, Мусса Хабал-иҧа иҭабуп ҳәа иеиҳәеит иҟаиҵахьоу адгылареи ацхыраареи рзы. Егзакь аспортсмени азыҟаҵаҩцәеи дрыдныҳәаланы, Адунеи ачемпион имаҟа агараҿы ақәҿиарақәа рзеиӷьеишьеит. Мусса Хабал-иҧа иажәақәа рыла, Харитон испорттә нысмҩа гәцаракны дашьклаҧшуеит, ибоит иааирҧшуа аҽадцалареи, ачҳареи, агәамчи, агәра игоит хымҧада аиааира шиго.
Аҭара ақыҭан АААК еиҿнакааит азанааҭ алхратә усмҩаҧгатә
Аҭаратәи абжьаратә школ аҿы аҵареи, асоциалтә активреи, агәабзиарахьчареи рзы АААК аҟәша еиҿнакааит азанааҭ алхратә усмҩаҧгатә. Уи рхы аладырхәит Аҟәатәи аҳәынҭқарратә коллеџь аргыларатә маҭәарқәа рырҵаҩы Алиса Барцыцҧҳаи аинформациатә агентра Sputnik-Аҧсны аҭыжьратә редактор Арда Лышәҧҳаи. Ааҧхьара зырҭаз аспециалистцәеи, аҵареи, асоциалтә активреи, агәабзиарахьчареи рзы АААК аҟәша аиҳабы Изольда Ҳагҧҳаи, аҟәша аспециалист Наур Хышбеи ашкол аҵаҩцәа ирзеиҭарҳәеит ҧхьаҟатәи азанааҭ алхра аҵакы шдуу, ирылацәажәеит ҳаамҭазы ауаа зыдҵаало азанааҭқәа, ашколхәыҷқәа ирымардеит рхатәы ҧышәа. Азанааҭ алхратә усмҩаҧгатә иалахәыз еиҭарҳәеит дара рхаҭа рнапы злаку аус шалырхыз, аҵара шырҵоз, адыррақәеи алшарақәеи шдырҳауаз, насгьы аусура ианалагоз уадаҩрақәас изықәшәаз. Ашколхәыҷқәа ракәзар, активла азҵаарақәа ҟаҵаны, ҧхьаҟатәи рпланқәа ирылацәажәеит. Аусмҩаҧгатә ахыркәшамҭазы АААК аусзуҩцәа ахәыҷқәа ирзыршеит Аҧсны аколлеџьқәа ртәы зҳәо афлаерқәа.
Аҧсны ашколқәа рҿы азанааҭ алхратә усмҩаҧгатәқәа еиҿыркаауеит уи иалахәу ҧхьаҟа рхы ззыркуа аусхкы алырхразы иақәнагоу адыррақәеи алшарақәеи рыҭаразы. Атренингқәа рыбзоурала аиҳабыратә классқәа рҵаҩцәа ирылшоит хдыррала ҧхьаҟатәи апланқәа реиқәыршәара, аҧсҭазаареи азанааҭи
рҧеиҧш заанаҵ азҧхьагәаҭара.
Еиқәҳархап аҧсабара: АААК имҩаҧнагеит аекологиатә тренинг
Аҵареи, асоциалтә активреи, агәабзиарахьчареи рзы АААК аҟәшеи, ААУ аекологиеи аҧстәқәа рморфологиеи ркафедра аметодист, арҵаҩы еиҳабы Маиа Цыбулевскаиеи иацырҵоит ашколхәыҷқәа рзы аекологиатә тренингқәа рымҩаҧгара. Изаамҭанытәиу аинтерактивтә лекциа мҩаҧысит Аӡҩбжьатәи ашкол аҿы. Маиа Цыбулевскаиа ахәыҷқәа ирзеиҭалҳәеит аекологиа закәу, аҧсабара шыхьчатәу, ауаҩы аҧсабара иаиҭо анырра зеиҧшроу, насгьы иаҳзеиҧшу аҩны - Адгьыл аиқәырхаразы иҟаҵатәу.
Ашколхәыҷқәа активла адискуссиа рхы аладырхәуан, насгьы ргәаанагара аадырҧшуан. Атренинг аҿы ирылацәажәон аҳауа аҟьашьра, ацәынхатә црыҵқәа аус рыдулара, аиаҵәара ахшьаара, апестицидқәеи ахимиатә рҵәыгақәеи рхархәара уҳәа Аҧсны ақыҭақәеи ақалақьқәеи рзы актуалра змоу егьырҭ аекологиатә проблемақәа. Аусмҩаҧгатә ахыркәшамҭазы ахәыҷқәа ирзыршеит аекологиатә хымҩаҧгашьазы аҵаҳәарақәа зну агәаларшәагақәа.
