Лента событий ВААК
«Абызшва тынха гIащаквыжьра: абаргвыракви амалькви»: АААК Санкт-Петербург апны уатыкв айчважвара аднагалтI
Адуней апсуа-абаза конгресси Апсны аршIыйагIвчва шIаква радкIылари «Абызшва тынха гIащаквыжьра: абаргвыракви амалькви» ахьызта уатыкв айчважвара адыргалтI. Анйара «Гранд Каньон» комплекс атшауацIыхра ашта апны йакIвшатI.
Анйара акIвыйаршатI АААК аппарат аунашвахъцIагIв, Апсны Республика а-Президент йпны йгIаныршу апхьахьа шIаква р-Совет йалу Чвыджьба Абзагв. Айчважвара йалан апсуа-абаза диаспора ргIащтийыгIвчва, ауат йрылан апхьахьаква, астудентква, джьгарта тшгIазырбауа чкIвыныргIа.
Айшва гьагьа йадзхъачIваз зымгIвагьи йгIалыркIгIатI абызшваква ргIащаквыжьра акъральыгIва ахачIв апхъаква йшрыуазакIу. Айчважвара апны акультура, ауагIахъара тшазыдырра рпны абызшва амагIны, ауи ардырри ахчари рпны йгIаншауа абаргвыраква йырзынарху азцIгIара щарда гIащтIырхтI. ЙалкIгIу гватра рзалырхтI йыдзуа абызшваква уахьчIвала раъащи ртшауацIыхри, ауи ауысла сабап гIазгуаш ахачIвкви цхърагIарала апрограммакви абзазара йалажьра шатахъу дрыбагъьатI.
Айкьангьашраква рымщтахь бызшва рклуб гIаныршара ауысла ажванахъа гIаргтI. Ауи аклуб дзачIвызлакIгьи швапхата йырхIаз ауагIа йрылайгарныс, йыбызшвала дчважваларныс лшара йнатуаштI. Ауи ащатала адырракви агвбайара цIаскви рамдара адгал йауаштI, ауыгьи абызшва тынха арыбагъьуштI, ауагIахъа культура ащаквгылра йацхърагIуштI.
Анйара йалакваз абызшва агIащаквыжьри ауагIа йрылажьри йырзынарху ари йапшу айчважвараква апхъахьылагьи йакIвшалушта йшгвыгъауа рхIватI.
Апсабара ахчара йазынарху айчважвара акIвшатI Лыхны кыт апны
Арыпхьарали жвлара джьгаррали згIвадарахчарали АААК ахъвшара АГУ апны экологии апсауышвхIаква рморфологии акафедра аметодист, арыпхьагIв ахIба Цыбулевская Майя далата апхьагIвчва рыхъаз псабарахчарала атшыбжьараква акIвнаршауаркIвитI.
Йызкьазууыз интерактив лекция акIвшатI Лыхны кыт аквтанай апхьарта апны.
ЧкIвыныргIа Апсны апынгьи адуней апынгьи экология йапщылата йаъу абаргвыраква йрыквчважватI, апсабара йазынарху рдырраква йрыладырхIатI, ауи уайгвыгIвра шатахъу, ансимш бзазара апны ушамзарархуш рхIватI.
«Аимадара» – 2024
Асквш 2024 апны «Аимадара» агIамта Ткъварчал царала йалгатI. СынчIва йцIыхъвахуз амдара Приморск аквтанай апхьарта апхьагIвчва йырзадыргалтI. АпхьагIвчва 30-гIви ауат рарыпхьагIвчви Ткъварчал къала ашIыпIа джьащахъваква ддырбатI – зымгIвагьи бзи йырбауа адзкIатштшартаквагьи алата.
Аэкскурсия асквшква 1992-1993 рагIан йакIвшаз Апсны ауагIа р-Абашта айсра йаладзыз рчвахъабага син хIврапшдза азыщтIацIарала йджвыквырцIатI. Асабиква рачвагIацIхырта ъаныз, апромышленность ащапIы ъабагъьаз, айсра агIан йгIакIвдыршата ауагIа ззгIатымцIуаз Акармара кыт атурых рархIвтI. Амдара йцаз ацIайква рщардагIв Апсны амарагIайырта шIыпIаква рпны йапхъахауата йаъан, даргьи акъала ауыхвараквагьи абзазащагьи ргвы йалалтI.
Амдара йалаз зымгIвагьи ашIыпIа хъвшараква рыцынхараала АААК ахъвшара ари апш ларпшра ъарзадыргалыз, асабиква гватра ъарзалырхыз ахъаз йшырзыразу рархIвтI.
«Аимадара» проект асабиква рзаман сабап алата йшыргуш, Апсны апны турых зпщылу ашIыпIа джьащахъваква шырдыруаш йазынархапI.
