Адунеизегьтәи
аԥсуа-абаза
конгресс

Адунеизегьтәи аҧсуа-абаза конгресси арҿиара знапы алаку аҿар Рхеидкыла «Аҧсны» алахәцәеи еиҿыркааит «Абызшәатә ҭынха аиқәырхара: ауадаҩрақәеи урҭ рыӡбашьеи» зыхьӡыз астол гьежь. Аиҧылара мҩаҧысит аҿиара акомплекс «Гранд Канион» аҵакыраҿы. 
Аиҧылара модераторс даман АААК аппарат аиҳабы, Аҧсны Аҳәынҭқарра Ахада инапаҵаҟа иҟоу аҵарауаа ҿарацәа Рхеилак алахәҩы Абзагә Ҵәыџьба. Адискуссиа рхы аладырхәит аҧсуа-абаза диаспора ахаҭарнакцәа, урҭ рыбжьара иҟан аҵарауаа, астудентцәа, активистцәа. 

Астол гьежь иалахәыз еицҿакны иазгәарҭеит абызшәа аиқәырхара аҳәынҭқарра адҵа хадақәа ишыруаку. Иара убасгьы ишьҭырхит абызшәа акультуреи амилаҭтә хдырреи рҿы ианнакыло аҭыҧ иадҳәалаз азҵаарақәа, иалацәажәеит абызшәа аҭҵаареи аиқәырхареи ирҧынгылоу ауадаҩрақәа. Ҷыдала игәцаракны иазхьаҧшит ақәӡаара иаҿу абызшәақәа рҭагылазаашьа, уи иднарбеит абызшәа аиқәырхара иазынархоу астратегиақәеи апрограммақәеи раларҵәара шаҭаху. 

Адискуссиа аҳәаақәа ирҭагӡаны, алахәцәа аҧшьгара ҟарҵеит абызшәатә клуб аҧҵаразы. Ари аҩыза аклуб ауаа ирылнаршоит ахатәы бызшәа ахархәареи аҧышәа егьырҭ ауаа рымадареи. Адыррақәеи акультуратә ҵасқәеи ахьеимырдало ари аклуб абзоурала абызшәатә ҭынха еиқәырхахоит, акультуратә хдырра рӷәӷәахоит. 
Адискуссиа алахәцәа агәыӷра аадырҧшит абызшәа аиқәырхареи аларҵәареи рызҵаара анаҩсгьы аҿиара аиуп ҳәа.

Аҵареи, агәабзиарахьчареи, асоциалтә активреи рзы АААК аҟәшеи ААУ аекологиеи аҧстәқәа рморфологиеи ркафедра аметодист, арҵаҩы еиҳабы Маиа Цыбулевскаиеи иацырҵоит ашколхәыҷқәа рзы аекологиатә тренингқәа рымҩаҧгара. Изаамҭанытәиу аинтерактивтә лекциа мҩаҧысит Лыхнытәи абжьаратә школ аҿы.

Аҿар алацәажәеит Аҧсни уи анҭыҵи иҟоу аекологиатә уадаҩрақәа, аҧсабара иазку рдыррақәа дырҭбааит, хаҭала иалацәажәеит аҧсабара ишеиҷаҳалатәу, абзазаратә ҧсҭазаараҿы аекологиатә хымҩаҧгашьа иаша шаарҧштәу.

«Аимадара» - 2024 шықәсазтәи асезон хыркәшан Тҟәарчал ацарала. Ахыркәшаратә ҭыҵра еиҿкаан Приморсктәи абжьаратә школ аҵаҩцәа рзы. 30-ҩык аҵаҩцәеи урҭ рырҵаҩцәеи иддырбеит Тҟәарчал ақалақь аҭыҧ ҧшӡақәа, иаҭааит зегьы бзиа еицырбо аӡхыҽҽақәа. 

Аекскурсиатә маршрут хацыркын 1992-1993 шықәсқәа рзтәи Аҧсны Жәлар Рџьынџьтәылатә еибашьраан иҭахаз рбаҟа амҵан ашәҭқәа рышьҭаҵарала. Ахәыҷқәа ирзеиҭарҳәеит ашахтиортә қалақь Аҟармара аҭоурых, қәҿиарала аус зуаз араион ааглыхра зеиҧшраз, аибашьраан амацәаз иҭакыз ақалақь шеиқәхаз. Аныҟәара иалахәыз реиҳараҩык раҧхьаӡа акәны Аҧсны мрагыларатәи ахәҭа иаҭааит. Ирбаз архитектуреи ақалақь атмосфереи зегьы дыршанхеит. 

Аиҿкаареи ахәыҷқәа гәцаракны рызныҟәареи рзы аныҟәара иалахәыз зегьы иҭабуп ҳәа рарҳәеит аҭыҧантәи ахаҭарнакрақәа аус рыцура иазку АААК аҟәша. 

Апроект«Аимадара» хықәкыс иамоуп ахәыҷқәа рыҧсшьара хәарҭала аиҿкаара, аҵак ду змоу Аҧсны акультура-ҭоурыхтә обиектқәа рҭаара.